【《詭打牆》：密室50人要死剩1個，邊個有資格活下去？】
#晞Netflix記事
喺一間神秘密室入面，五十個人要不斷每兩分鐘內，投票殺死邊一個人，其他人睇唔到你投邊個，如果冇人投就會由機器自動揀個人殺，直至最後一個人。大家唔知發生緊咩事，但喺有限時間下，都要各懷鬼胎，令自己成為最後一個。
《詭打牆》個故事設境幾得意，一開場就係喺間密室，而呢個半鐘99%時間都冇離開過個密室，認真可以話係慳水慳力，全靠食腦。不過，有別於普通密室電影得幾條友，呢套多達50個人，你話群戲又唔係，因為兩分鐘殺一人好快殺曬，但要喺咁短時間幫大部份角色配個性格背景，甚至本身嘅立場同思想都不斷轉，而成套戲又真係拍得到冇乜冷場，功架都幾勁。
乜嘢人值得活下去、點樣先係最優秀人種、一個人喺殘酷社會下要帶住個咩假面具，要點樣先可以留到最後一刻（有時唔聲唔聲反而冇人會搞你），套戲都作出咗唔錯嘅解讀，就住年紀、宗教、種族、案底，甚至讀書成績、出身，喺世俗眼中，都可以決定一個人有冇資格「活下去」，但每個人都有唔同嘅立場，絕境當前可能有人會捨身成就大義，都有人滿口仁義道德，背後無非都係人不為己、天諸地滅。將社會縮影、人性探討議題用咁樣方式帶出，確有幾前衛嘅意念，比同類嘅密室題材有一定分別。
除咗人性，故事同時都有玩到數學方法，希望用呢個方式去破解遊戲規則，睇時都幾有玩味，而結局點樣甩身，都幾出人意表，係一個幾靚嘅twist。
不過咁睇啦，《詭打牆》對比同類密室電影，就衰在冇咗個有情理嘅故事骨幹。開咗個好靚嘅頭，但易地而處喺個咁樣環境，大家都知道最後要死、生存機會只有1/50，搞咁多嘢、講咁多廢話，甚至玩到投票「靠邊站」，都係多此一舉，睇睇吓都知道係絕望。除咗主要幾個角色較「有原因」去玩落去，其他二打六仲講咁多，睇得多都覺得累。結局係估你唔到，但咁樣完法只覺得冇頭冇尾、似是而非，我就寧願好似《心慌方》果類開放式結局仲好。
冇戲睇，呢套都值得一睇，個半鐘都冇，kill time不錯之選。英文名叫《Circle》。
【‼️留意‼️】
「晞。觀影記事」Patreon加強版已經開幕，更多精選深度獨家電影文章，請即訂閱：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
