《無異之地》極樂謊園（六）
等到摩天輪轉返落最低點後，我第一時間就衝出車廂。可能係因為起身得太急，所以落地嗰陣仲係有少少頭暈。
「咦？」Alice見到我嗰刻顯得有啲意外，「點解妳咁快就返到嚟……」
「阿海呢！？」我慌張咁問：「點解阿海會唔見咗㗎？我明明係同佢一齊上去……」
「咁係因為佢嘅旅程仲未完結。」本來同緊另一位男接待員傾偈嘅June行埋嚟講：「既然未完結，咁當然仲停留喺另一個空間。」佢講到呢度瞇起雙眼打量我，「而照道理，妳嘅旅程應該都只係只係啱啱開始先係……」
「係囉，好少可會咁。」Alice認同，「Cheryl，妳仲記唔記得返出嚟之前最後一幕係見到啲咩？」
「……最後一幕？」一嘗試回想返，我就成個人開始震起嚟，「我……我見到阿海同Zoey喺澳洲嗰陣瞞住我見面……佢哋仲……仲搞埋一齊……」
接著，我又諗返起漆黑之中嘅嗰句說話──趁仲有機會，快啲離開呢度。
「吓？」Alice聽完好驚訝，「冇理由㗎，呢座摩天輪應該唔會睇到……」
轟隆───────！
遠處突然傳嚟一聲震耳欲聾嘅爆炸聲，打斷咗我哋之間嘅說話。因為發生得好突然，所以周圍嘅人都嚇到停低腳步，一臉疑惑咁互相對望。
＝＝＝＝＝＝＝＝＝
一至五集：
https://www.facebook.com/pg/Echo.of.Heart/photos/?tab=album&album_id=1736011713197304
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
＝＝＝＝＝＝＝＝＝
幾秒後，可以見到有黑煙由爆炸嘅位置徐徐升起，而我哋頭先正正就係喺嗰邊行過嚟。
「June，係『血慾騷』嗰邊傳嚟！」頭先同June傾偈嘅男接待員最先反應過嚟講：
「係唔係March今晚又有新嘢玩冇事先講定？」
聞言，我即刻諗返起阿廉同Bella。呢下爆炸聽落咁嚴重，佢哋好可能會受到波及……
「我諗唔係，上次園長先提醒佢要跟規則做嘢。」June冷靜咁回應，然後轉過頭望向Alice，「Alice，我同November要過去嗰邊睇下發生咩事，呢邊兩位客人就交畀妳。」
「明白。」Alice點點頭。
「等等……我有幾個朋友仲喺嗰邊！萬一佢哋出咗咩事……」
「Cheryl，放心喇，佢哋一定唔會有事。」Alice好有信心咁講：「『死亡』喺呢個地方可以話係平常事喇。」
「吓？」我愕然，同一時間注意到開始有遊客向住爆炸方向行。
明明嗰邊應該好危險先係，但佢哋反而係表現得相當雀躍，就好似期待緊嗰邊會畀到乜嘢「驚喜」佢哋咁……實在係太過荒謬，太過不可理喻了。
「Alice，妳一陣見時機成熟嘅話，就帶佢哋去『蛻變』區喇。」說罷，June就同November兩個一齊趕去爆炸現場。
幾秒後，Alice轉用輕鬆嘅語氣同我講：「呢個樂園最刺激嘅地方，係妳永遠唔會估到下一秒鐘會發生咩事。」
雖然佢係咁講。但對我而言，留喺度嘅每一分每一秒都只會係折磨……
可能見我冇回應，又若有所思咁望住摩天輪，Alice再繼續講落去：「啱啱妳真係見到阿海同Zoey搞……起埋一齊？」
我點點頭。
「照計係唔應該出現咁嘅情況。Cheryl，等我簡單解釋下……其實頭先妳合埋眼之後見到嘅所有嘢都係一場模擬嚟。」
「模擬？咁即係全部嘢都係假？」一聽到呢句，我就好似搵到一絲希望咁。
「話真唔真，話假亦都唔假。」但Alice卻係咁解釋：「呢座摩天輪會透過妳過去嘅人生經歷去作出分析，去計算出一個幸福嘅『未來』。所以重點從來唔係真定假，而係妳肯唔肯行出一步去接受……只要妳願意，妳喺裡面見到嘅『未來』係絕對係有可能發生……」
「但阿海同Zoey……」
「問題就喺呢度。」Alice打斷咗我，「既然係模擬，理應係唔會睇到其他人過去所經歷嘅事，所以妳嘅情況係非常特殊……再加埋呢下爆炸，感覺好似唔係巧合？」
我正想回應，但就喺呢個時候，Alice部手機突然響起上嚟。
「私人號碼？」Alice望咗眼螢幕後皺起眉頭，接聽後將手機擺喺耳邊，「喂？」
下一瞬間，佢突然合埋雙眼陷入昏迷狀態，成個人失平衡向後跌低。因為發生得太突然，所以我根本嚟唔切捉實佢。
「Alice！？」我即刻跪低想檢查佢嘅狀況。
然而就喺下一瞬間，我注意到Alice部手機突然轉去咗另一個畫面──係一個純白色背景，上面寫咗三行黑字：
【讓愛麗絲繼續夢遊仙境吧。
Cheryl，妳想離開就只有這次機會。
快拿起手機，照我的說話做。】
「夢遊仙境？」我戰戰兢兢咁拎起部手機。下一秒，畫面又轉了。
【這個地方只有謊言，找不到希望的。】
就好似戳中咗我內心想法一樣。我終於作出覺悟企起身，準備照住對方下個訊息去做：
【首先，回頭向『血慾』區的方向走。】
臨離開之際，我先望咗眼摩天輪，但仲未見到阿海嘅身影。接著，又望返去昏迷當中嘅Alice……
「對唔住……」我對住Alice講：「但我……可能真係唔屬於呢個地方。」
語畢，我就轉身開始走。雖然冇辦法斷定對方係幫緊我，但反過嚟去諗，亦都諗唔通對方點解要害我。呢刻，我就好似喺茫茫大海飄浮緊一樣，難得搵到個疑似救生圈，當然係奮力游過去想捉緊……
【轉右】
一直行，途中有段路係非常接近「血慾騷」嘅大型帳蓬。可以見到現場係起緊大火。但唔單止冇人嘗試救火，旅客亦都冇走嘅意欲，反而仲好似體驗緊營火大會一樣。
再認真望多眼，可以見到有兩個壯男正一前一後咁抬起一位用粗木棍綁住，臉朝向下嘅女人……
「燒死佢、燒死佢、燒死佢！」而周圍仲有人唔少人叫囂助勢。
「燒死佢呢個殺人兇手！幫出面嘅人報仇！」
「唔好呀……求你哋放過我……唔好……啊啊啊啊啊啊……」
雖然睇唔清楚綁住嘅人係邊個，但可以肯定接住落一定唔會發生咩「好事」。所以我都唔敢久留，繼續照指示行。
【再轉右，落樓梯。】
轉眼間，就去到某座大型過山車嘅附近。其實遠眺嗰陣真係睇唔出有古怪，到呢刻近距離望清楚，可以見到成條路軌上面加咗唔少詭異嘅裝置──而最令人不安嘅，係一個好似斷頭台咁嘅刑具。但鋒利嘅斬首刀並唔係好似一般咁打直放，而係打橫放，高度正好係半身咁高……
說時遲那時快，下一秒正好有列過山車伴隨住尖叫聲駛過嚟。下一瞬間就經過我路頂，即將駛到去斷頭台……
「啊啊啊啊啊啊啊───。」
明明上一秒佢哋仲係尖叫緊，下一秒卻全部人都靜晒。接著，有大量鮮血濺到我兩米以外嘅行人路。同一時間，有幾顆人頭、幾隻斷手喺路軌上面跌落嚟……有一顆人頭仲要彈到四五米咁遠。
「吖？！」見狀，我當堂嚇到向後跌低，右腳因為咁而扭傷，「痛……」
我係唔係眼花？佢哋……過山車上面嘅人全部都俾斷頭台殺咗？但佢哋玩之前唔知會發生乜事咩？點解仲會夠膽玩……
然而，再過多幾秒之後，地上面嘅鮮血同人體殘肢突然化成灰燼，最後慢慢飄走……彷彿一切都冇發生過咁。
下一刻，手機螢幕嘅訊息又變了。
【快站起來，他們開始來找妳了。】
一見到呢個訊息，我即刻用盡全力撐起身，忍住痛楚一拐一拐咁繼續行。
「嗄……嗄……」唔知行咗幾耐，螢幕畫面又變了。
【加快腳步，他們快要看見妳了。】
我回頭望，果然有兩個疑似June同November嘅身影，即將就會行到去過山車路軌下面……
【假如讓他們抓到妳的話，妳就永遠都不能離開這裡。】
越睇就越慌。呢刻，眼淚終於忍唔住奪眶而出。到底我係做錯乜嘢先要接受呢種懲罰？到底呢場惡夢幾時先完……
「阿海……」我抹一抹眼淚。雖然抹唔走腦海裡面佢同Zoey背叛我嘅一幕，但到咗呢個關頭，始終都係會想起佢，「救我……」
【下個路口轉左，快到了。】
就喺我行到去轉角位之際，突然有人出現捉住我右手手臂，再用力拉走我。
「唔！？」我下意識想大嗌，但對方反應更快，即刻用另一隻掩住我嘴巴。
「殊！」
曾經有一秒鐘，我仲以為真係阿海嚟救我。但唔係，面前係一個中年男人，佢戴住一頂草帽，身上面著住反光衫，睇落十足一個清潔工人咁。
「唔想俾人捉住就唔好出聲，跟我嚟！」佢一講完就鬆開手，然後就轉身行起上嚟，「快！」
一開始我係有少少猶豫。直至望完手機，見螢幕冇再更新先跟上去──莫非，呢個中年男人就係用短訊幫我逃走嘅人？
行咗一小段路後，中年男人帶我嚟到一個大型垃圾桶前面。本來我仲以為佢會叫我匿入去。但唔係，佢先用力推開個垃圾桶，隨即見到地上面有個隱藏嘅鐵門。
「下面有個地下室……妳暫時匿落去先。」中年男人打開道鐵門之後講。
事到如今，我實在諗唔到拒絕嘅理由，所以照佢嘅說話爬梯落去。
爬到一半嘅時候，我其實都有少少擔心會踩入另一個伏，又或者地下室會係污糟潮濕又充滿住怪味。但結果我又錯了……當我爬到落最底，映入眼簾嘅係一個乾淨企理嘅地下室，仲有陣檀木香嘅味道。唯一敗筆就係光源唔夠，所以顯得有啲昏暗。
「記住唔好出聲！」留喺上面嘅中年男人再一次提醒後，隨即將隱藏門閂埋。
未幾，一把熟悉嘅男聲喺上面傳嚟。
「喂，陳伯，你見唔見到有個後生女仔經過？」係November，估唔到身處地下室都仲可以聽得一清二楚。
「呢度成日都有後生女仔經過……我唔知你指嘅係邊個。」中年男人，即係陳伯禮貌咁回應。
「廿幾歲，著住黑衫長裙、粗框眼鏡，神情慌慌張張咁嘅……」
「哦……真係冇見過。」陳伯回應：「係喇，頭先『血慾』區係咪發生爆炸？你哋知唔知發生咩事？」
「內部機密，就算知都唔同得你講，總之我哋已經處理好。」November不太客氣咁講：「June，雖然March唔同意，但我硬係覺得係同『嗰個人』有關……妳知喇，佢一直處心積慮想破壞呢度……」
「Stop。」June打斷咗佢，「喺外人面前唔好講咁多。November，我哋去嗰邊繼續搵……」
「嗯……特別係『小屋』，一定要檢查清楚。」一講完，就聽到有腳步聲慢慢遠離呢度。
再等多兩三分鐘後，陳伯先至重新打開隱藏門，慢慢爬到落嚟。
「我估短時間之內佢哋應該仲喺附近，所以要委屈妳留喺度多陣。」陳伯邊講邊點著一盞油燈，成個地下室瞬間光咗好多。
「多謝你……」我感激咁講：「陳伯，頭先係咪你用手機訊息幫我逃走？」
「手機訊息？」陳伯皺起眉頭望向Alice部手機，然後搖搖頭，「當然唔係，我呢種人點會有手機喺身……」
「咁點解……」
「係咁嘅，我離遠見到妳行路跛下跛下，似係避緊人咁，所以咪出手幫下妳囉。」陳伯講到呢度臉色一沉，「事實上，我都唔係第一次遇到呢種情況喇。」
「吓？」我愕然。
「小妹妹，呢個『樂園』雖然有種令人著迷嘅魔力，但並唔係個個都鍾意。間唔中會有好似妳呢類人，接受唔到呢種瘋狂……所以諗盡辦法逃離呢度。而『樂園』入面嘅員工，就會稱呢班人做『異類』。」
「咁呢班人……最後走唔走到？」我問。
「據我所知，成功嘅例子只有一個。」陳伯落寞咁講：「為咗守住『樂園』嘅秘密，班員工一定會傾盡全力去捉你哋。只要俾佢哋捉住，一係你就認命加入成為『樂園』一份子；一係……」
「……就要死？」我突然諗返起啱啱坐過山車被斷頭嘅人。
「唔需要死……事實係比死更慘。」陳伯轉過頭望向木檯上面嘅一張合照，「唔加入佢哋嘅話，就要永遠被困喺度，出唔返外面嘅世界。」
可以見到合照裡面，除咗有年輕十幾年嘅陳伯，仲有個幾歲嘅細路女。
「唔怕同妳講，我啊……已經足足留咗喺度十四年喇。」
（待續）
終於忙完，連載速度可以恢復正常啦（希望）。而呢一章《極樂謊言》去到今集已經連載到差唔多一半，接住落嚟應該係 KEEP 住緊湊。
睇完又鍾意嘅朋友，不妨分享出去同埋留句 #留言派嬲 ～我哋 100 SHARES 繼續，下篇暫定星期六。
＝＝＝＝＝＝＝＝＝＝＝＝＝＝＝＝＝＝＝
【非呃嬲植入式廣告時間】《無異之初》《時間守衡者》《絕命上映》《絕望走廊》《絕無轉機》《無限次告白》《醉後的藍》已經登錄各大書局。
IG: echoofheart
純白色背景 在 PM baby 攝影- 純白色的背景可愛的插圖加上寶貝逗趣的表情就 ... 的推薦與評價
純白色 的背景可愛的插圖加上寶貝逗趣的表情就變成可愛的紀念照做成彌月卡也特別有趣喔！ 【寶寶的第一個紀錄 珍貴的初生模樣】 #PMbaby #新生兒寫真#新生兒到府攝影. ... <看更多>