長文慎入，同埋好嬲唔想睇下有冇錯別字
今日如果仲有未飲曬嘅Pepsi Blue，我會一嘢吹左佢😡😡😡😡😡😡😡😡😡😡😡😡😡
本來今日寫咗第二樣嘢，都要抽起佢個第日再Post。
～～～
話說上個禮拜，有個大陸女仔過黎打第三針，即係最後一針嘅子宮頸癌疫苗。打完之後，佢係咁Chur啲姑娘，問支針嘅成效Exactly有幾高，係唔係100%？點解你會打晒先至問，而唔係考慮開始打第一針之前去問呢個問題呢？
OK，當然個症睇左我，等我解答佢嘅疑難。我已經攞定個Product Information。呢張野係藥廠Officially出，上高有一大段係HPV針嘅Efficacy，因為HPV病毒能夠引起嘅病非常之多。人哋嗰張野有文字版，同埋整咗啲Chart，寫呢支針對各式各樣嘅病，能夠有幾高嘅保護性。
好坦白講，係醫療界入邊冇野係100%。有邊一個醫生可以同你講，食呢隻藥你100%會好返。做呢個手術，會有100%成功率。疫苗一樣，唔會打咗有100%效力。今期都話流感疫苗得幾成效果啦。
我攞住張紙，指埋俾佢睇，話呢到有啲病話Efficacy係70%+，有D 係90%+。呢度再細分某個年齡階層嘅HPV保護程度等等。我叫佢自己返去睇吓，因為真係冇得喺度逐樣續約同佢講。睇唔明再返嚟。
佢又問可唔可以做啲化驗，睇吓打完晒3支針出唔出到抗體。講真，呢支針一世人只係需要打呢3支。（之後藥廠再研發勁啲嘅子宮頸癌針，能夠覆蓋多幾廿款病毒嘅Subtype再算。）佢打第一針之前，又唔係處女，點知你自己有冇Already惹到啲乜HPV菌返嚟，所以可能你已經有某D抗體。咁代表支針有效，定係代表你之前瀨過好多次嘢而好返呢？咁樣驗係冇意思。所以香港唔似大陸，唔會Routine Offer驗Antibody。打針跟足時間完晒一個療程就OK。唔需要再驗啲乜嘢抗體。當然你想嘥錢我實歡迎架。
好似乙型肝炎針咁，好多人明明打晒一個療程，但係抽血驗就出唔到抗體。以前就話會打加強針，但係最新嘅Guideline都已經唔打加強針。只要針卡證明你打晒3支就已經夠。我連呢個例子都解釋埋比佢聽。前前後後我睇咗佢十幾廿分鐘，用盡我畢生嘅力量去解釋俾一個Layman聽。
佢最後話大我話佢全家都係醫生。我話你返去睇吓你有咩唔明，唔明可以問埋佢地。佢話阿媽係兒科醫生咋，我話呢支針外國政府已經會幫九歲嘅兒童打，所以兒科醫生都會識。同埋唔使做專科都應該要識答呢啲問題。唔係點解你要問我，唔問專科？
之後答完佢就離開我間房，離開埋診所。嗱，我講得唔好，你可以叫我解釋到你明白為止。你唔鍾意我，你可以搵我隔離個同事再講一次。你覺得都係唔Gur，你又可以同護士反映。
通常最痴線嗰啲，唔會大吵大鬧嗰啲。係無聲無息嗰啲先至係計時炸彈。今日我被通知，佢寄左投訴信俾上頭嘅。佢封信好好笑。佢用超級爛嘅英文寫，但係中間夾雜一啲中文。點解你唔用Google Translate翻譯下呢（例如佢唔識寫街市係wet market）？
重點係佢封信全部Grammar都係唔啱/唔通。佢有時寫啲嘢仲喺度讚我，搞到我都唔知係讚美定係投訴信。佢話 I quickly get to see doctor (咁即係讚緊我俾佢比服務佢啦？)。又話我lady-like （可能漏咗個No字？）跟著又話我Illiterate （當然佢串錯）。我成個Consultation入面，幾時讀過野或者寫過野比你聽？其實你知唔知呢隻字點解？其實你係咪講緊自己？唔好咁啦，呢個唔係你錯！努力讀書咪得囉！唔好自己貶低自己！有病要食藥啊！
總之我Get到嘅佢想話我好冇禮貌，好似係街市同佢講野咁Rude。又話我冇解釋啲嘢俾佢聽 （大佬我對住你幾十分鐘，唔通鐘意又老又醜又肥，想見多你幾面咩？）。我好辛苦睇唔明佢寫咩。哦，所以我係Illiterate！或者佢用心良苦，特登寫到咁樣樣，咁大陸化等我睇得明係唔係？真係多謝你呀！
當然我經理就隨即打俾我問吓發生咩事。我講完之後佢問我病人態度點。我話佢無理取鬧，寸，唔係好態度囉，你諗下出面都搞佢唔掂。
但係事實就係，唔使講我經理都應該會出封道歉信俾佢。次次我哋護士/醫生俾人投訴，經理都係唔會幫我地。老細會打嚟話你冇做錯，但係身體很誠實，信係會照出。
返Hae工都要有Work Morale架呀老細。
～～～
我決定訂一箱藍可樂返嚟，我又好掛住佢啦⋯⋯😭
