像Kobe Bryant一樣努力
#人生哲理 #MrBusiness
-----------------------------------
點樣先叫做成功？我有個指標，唔熟嗰個行業，都聽過佢鼎鼎大名，又或者成為行業Icon，咁就係成功了。就算無睇開籃球比賽，又無特別留意體育新聞，都會識得佢，佢就係籃球界傳奇人物Kobe Bryant。
世界上最恐怖嘅人，係能力比你高，仲要比你更勤力的人。縱觀世界體壇，不乏有天份嘅運動員，但要事業平步青雲，成為傳奇人物，不斷鞭策自己一直進步係基本條件。Kobe之所以成為咁多籃球人偶像，就係佢有天資之餘，仲不斷付出毅力和汗水，令自己長期處於巔峰狀態，面對後起之秀的挑戰，仍然可以屹立不倒。
“Have ever seen the scene of Los Angeles at 4am?”
對於記者提問成功之道，Kobe曾用半玩笑反問句作答。成功道理好簡單，就係練習練習再練習，當其他人沉醉美夢，自己就清晨爬起身練習，或者去健身室鍛練身體。球壇上天之驕子，早已名利雙收，仍然不忘初衷，繼續擁抱籃球夢，提升自己，對冠軍嘅渴求，對勝利嘅專注，教其他人點唔服？
NBA球壇久唔久就出現超級新星，有望繼承「籃球之神」米高佐敦地位，論能力、話題性、星味、反敗為勝魔力，Kobe可以話係最接近嘅一個。不過與其做「新米高佐敦」，Kobe更希望用自己名字闖一片天。當年被記者問到用什麼動物形容自己，Kobe答道：「Black Mamba」(黑曼巴)。黑曼巴是一種非洲毒蛇，天性猶如殺手，勇猛好斗，Kobe期望自己在球場上能似黑曼巴一樣速攻，招招致命。而佢亦講得出做得到，多場逆境比賽中化腐朽為神奇，帶領球隊奇蹟反敗為勝，先後5度帶領湖人奪得NBA總冠軍、4度當選明星賽MVP、11次入選最佳陣容及2面奧運金牌等。對NBA球壇影響深遠，影響力亦覆蓋全球，所以稱Kobe為另一位「籃球之神」絕不為過。
“Rest at the end, not in the middle.”
Kobe為籃球事業奮鬥終生，各個訪問、演講中經常借自己故事勉勵其他人不斷努力，目標達成前千萬別鬆懈自己，只要努力去做，一切皆有可能。無論你係咪Kobe迷，都應該學習佢對事業、人生嘅態度。雖然Kobe已離開大家，但他永不放棄的曼巴精神會永遠長留籃球迷心中。
