關於 prop trading ，我們在網路上蒐集到這些相關的討論、資訊與評價

［八號風球都有開心大發現］網上係換唔到美金嘅（但買到走地波）

1. 朋友用匯豐戶口，網上半夜港紙換美金，發現換唔到。問我係咪美國打仗，定外匯管制，嘻。

2. 咁其實有試過嘅都知，半夜網上換美金，正常係換到的。星期一至五夜晚都得。大銀行嘅刁寧房，理應有night desk，廿四小時。咁埃汾果時返蕉行都係做刁寧房，就冇呢回事（後來可能有，因為當年標哥同小弟有份寫份night desk嘅咩規章規制）。

3. 咁呢啲，商業決定啫。你冇night desk，咪唔好廿四小時畀個客上網自己襟。有嘅，咪可以做多啲生意。自己計數。冇人當更但照畀客襟得唔得？梗係唔得啦。輸死你呀。

4. 講過N次咯，銀行自己根本唔鍾意，亦唔需要自己take position．我back to back 食你差價咪得，使乜坐住幾億英鎊同你賭？你唱幾多，我咪去interbank拎再加個差價畀你。最多自己坐少少存貨，但嗰啲同快餐店差不多，我放住啲嘉頓包在舖啫，唔係我自己睇好佢升值。

5. 當然銀行有prop trade（Proprietary trading．自營交易），本人都玩過，但另一回事。而且內部監管極嚴。同埋近十幾廿年已經越嚟越discourage 呢樣嘢（不過話說回頭，最新近一季，啲大行又因為trading而救返好多收入。因為市場混亂時大行傾向買嘢，咁之後反彈咪有得執）（https://bit.ly/3kZtZGX）

6. 冇人返night desk但又開廿四小時畀客襟有乜後果？咪會輸死。半夜發生咩事你咪死得。即時有night desk都可以出事，早幾年有次，瑞士法郎忽然棄守盯住歐元（呢個固定匯率好求其，話改就改），忽然間升三成。果時匯豐咪改唔切價，畀人係咁襟（https://bit.ly/3189yzZ）。咁照計係有人的。有人都咁，冇人你估下有乜後果？

7. 咁所以，平時半夜係唱到美金嘅。但8號風球就唔得啦，因為冇人返工掛。銀行有寫到明的。之但係，唔係WFH？定呢啲規矩之前定落就冇改？照計我估8號波都有人返嘅，只係封咗啲網上銀行盤以策安全。WFH呢啲同樣道理，費事節外生枝啦

8. 不過，朋友又問個有趣問題。係喎，明明馬會都落到走地盤。咁馬會點都有人返掛。果然馬會員工專業過銀行，8號波都風雨不改等你有得賭

9. 而真係長知識，朋友講先知，原來美職聯（MLS）係唔開走地的。明顯我冇佢咁大賭瘾，我連有MLS賭都唔知。似乎明顯都係因為時差。當然亦係有冇人賭。歐聯咁大生意就點都要有人返。

—————————————————
Ivan Patreon 狼耳街華人，一個星期至少三篇，一個月一舊水唔使，一星期已近400人訂，仲有兩篇免費試睇：https://bit.ly/31QmYj7

How to Get a Proprietary Trading Job — A Complete Guide https://bit.ly/2B3BsCx

［美國銀行股好耐冇威過］咁當然有啲原因

TLDR：美國放寬法規，銀行可以放心去炒，當然利好股價。但點解係而家？都係因為聯儲局係始作俑者。

1. 美股昨晚（星期四）大升，因乜？因為銀行股，好少見。亦因為咁，你見道指標指升得多過納指。

2. 銀行股升乜？其實都幾反常。要知道再之前（星期三）先因為美國疫情又爆，舊經濟股大插，銀行都不例外。事實上，今年全年銀行股都係不滯，未爆肺炎時跑輸，爆埋後大跌，反彈就彈少少，跌就跌多多。

3. 咁做乜昨晚銀行股會升？就係多謝侵侵啦，監管當局，放寬Volcker Rule。作為一個金融從業員（但冇做過美資公司），咁我當然都歡迎，但，其實What for？做乜係而家？都有原因

4. Volcker Rule係乜？簡單嚟講，係限制銀行自己渣鑊鏟，做prop trade （proprietary trading，自營交易，見工聽到人講prop trade 唔好以為炒地產）。放鬆呢個限制，銀行可以易啲拎自己嘅錢—其實即係客戶嘅錢（＊），去炒。

5. Volcker Rule，就name after N年前嘅聯儲局主席Paul Volcker 雪茄伏，舊年死咗了，舊文寫過佢（https://bit.ly/2YyecpF）。但唔係佢做主席年代搞嘅嘢，係幾新嘅嘢。

6. 又係因為金融海嘯。大家檢討，咁有人覺得，華爾街銀行太冒進，自己拎自己錢炒，唔好，造成災難。但點解係Volcker講出嚟有說服力？咩鮑威爾同耶倫未出場，光頭佬伯南克臨危受命仲在其位，格林斯潘呢？被認為係金融海嘯始作俑者之一（因為遲遲唔加息，有事就救市）。就只有N年前出手夠狠，惡打通脹，夠膽得罪華爾街嘅Volcker，有江湖地位講。

7. 實情就係，世事分久必合，合久必分。出事後咪管，到冇事就會有人嘈話太緊。大半世紀前，美國大蕭條大股災，促成Glass-Steagall Act，將普通commercial bank 同investment bank 分開。但幾時收皮？正係克林頓嘅年代，新自由主義黃金年代，1999年。又有人認為呢個都導致咗金融海嘯，又想重新要返。

8. 講返Volcker　Rule，搞一大輪，其實2015年中先生效，都未夠5年—唔止，大銀行仲拎唔少豁免，理由話仲有好多唔太易甩手嘅嘢冇咁快賣到出街。話咁快，而家又話放鬆了—但其實今年年頭已經放鬆過些少。

9. 總之，銀行就十分歡迎放寬啦Volcker Rule，反正雪茄佬死咗，唔會彈起身。
10. 你問我，就梗係銀行家背後發功啦（雖則我冇證據）。咁做乜聯儲局呀監管機構呀咁易話為？唔知喎，可能侵侵知自己選情不妙，要討好啲銀行家。

11. 當然，時機上，都有道理嘅。我做華爾街說客都識講。如果講bread and butt
12. 嘅loan and deposit 業務，銀行就係過河濕腳嘅生意。畀利息拎某啲人嘅錢，借畀其他人收高啲息，收差價。

13. 問題嚟啦喎，銀行當然係左手交右手，但in general，銀行係鍾意高息環境。首先銀行有自己投資，例如買債券，咁當然高息好。二來，高息年代，銀行可以2厘拎錢3厘借出街，執一厘淨息差。聯儲局再減息，我可以0.5厘拎錢1.5厘借出街，都係執一厘息差，但如果再減呢？

14. 聯儲局不停咁減息，甚至直接買債，直接借錢畀公司。咁問題就嚟啦，借錢畀企業嘅息口壓到0.4%（亞馬遜蘋果之類咪係），但我存款，正常只能零息不能負利率（否則你會拎去曲奇餅罐），咁我根本冇可能執到一厘息差。

15. 所以，一句，減息，低息環境，銀行就仆街架啦，因為息差受壓。亦因為咁，你見過去10年，全世界嘅銀行，冇乜邊間股價有好過。所以坊間啲評論屌匯豐，我覺得係多餘嘅，你唔睇下其他銀行？正如你屌國泰咩服務唔好（你老味你畀幾錢？），你唔睇下其他airline 股價？哦你話唔好同其他人比—但個問題係，呢啲行業就係好受政府影響嘛。如果純原教旨主義市場撚去講，聯儲局根本就係與民爭利啦。

16. 仲有喎，都仲未講，啲Virtual bank 之類，有機會威脅銀行，仲有啲支付平台呀，或者科企咁—佢地又係咪同一個框規管先？又好似唔係喎。等於酒店投訴AirBnb，又唔係全無道理。

17. 所以，銀行經營艱難（是真的），而既然好大程度上因為政府（個利息都係政府壓出嚟），大條道理嘈啦。

18. 政治，講到尾就分餅仔，利益輸送，妥協的藝術。去過外國知道啦，外國嘅銀行，例如中國日本美國都好，唔會乜都做晒，唔會又做銀行又做保險又賣基金又做證券。但點解你行入恒生中銀，買保險又得買基金又得炒股票又得？

19. 一切當然有原因。你而家可以每兩三年轉按一次，銀行爭崩頭。但其實香港，以前係有利率協議，即係合謀定價，銀行暴利，間間都係咁嘅息口，哈哈哈，英殖真好。就到回歸後先取消。但，銀行點會咁順攤，某程度上，交換條件就係畀佢地賣保險賣基金做股票—然後，亦有了雷曼迷你債券，銀行要賺錢前線要跑數嘛

20. 講返，其實銀行呢，冇你想像中咁熱心於炒賣。呢個亦係好多人嘅盲點。你一窮二白當然要炒。但到你有咗錢，做乜仲要炒？我梗係rent seeking 算啦。我做銀行，使撚「睇好」定「睇淡」南非蘭特咩，你換一千萬，我咪幫你換一千萬返嚟，然後食你差價。使乜搵自己條命搏？

21. 之前推介過，When Genius Failed，天才殞落　呢本書。講LTCM　Long term capital management，教父博士級諾貝爾獎學者坐鎮．但，人地一樣唔會炒單邊。一樣只係做arbitrage—不過放大幾萬倍。根本唔使特登對挪威股市有個view，窮人先要多多意見，今日又估皇馬輸唔輸波，聽日估會唔會支爆，後日估美國邊個選到。

22. 最後，我認為，呢個改革，唔止利好銀行股，直頭利好全股市。買美債先得1厘息唔夠，銀行息差受壓，咁做prop trade，會買乜？梗係照買股票。以前就話6厘息先高息股。而家有4厘息銀行都仆到去買啦。400點息差喎。

（然後收市就見聯儲局話限銀行回購同派息，果然一啖砂糖一啖屎）

（＊）留意，銀行所謂「自己嘅錢」，即係股東嘅錢，多數唔多。銀行係高度槓杆行業，解過幾次不再解，自己搵舊文。銀行嘅錢，好多唔係「自己」。

————————————
多謝你睇到呢度，而家到你救我全家了。新搞作。同Homeblogger新合作，以往得文字，而家玩短片。第一炮當然係你最關心嘅，下半年個市點睇。港股，美股，樓市。暫時斷次買。80蚊，講足半個鐘。你請我食一次飯一定唔止，我好大食的，食你七八舊水都得。

入面有埋圖，有埋恒指標普目標價，教埋資產配置，有埋6隻心水股。有港股有美股有大有細。

請去呢度睇：https://bit.ly/37S4iC5
課程編號：CC002
客服whatsapp: 63832145