喪屍地球（下）
上集：http://bit.do/fhkTS
一羣機械人將我哋引入城，沿住隧道一直行，途中，我無見到一個活人。
而且，機械人叫我同十個軍人分開，話「地球區」嘅長官想同我單獨對話。
我覺得唔妥，但又唔知點講好，結果我就跟住機械人，入咗一間房，房裡面無人，只有一個巨大嘅地球儀。
「你好。」地球儀閃閃發亮。
我呆一呆：「你係機械人？地球儀形狀嘅機械人？」
「我係地球，你一直居住嘅地球......」
我勉強一笑：「機械人大哥，你唔好講笑啦，『地球區』嘅長官喺邊？」
「『地球區』根本無人。」房間內嘅閉路電視全部都開晒，屏幕由唔同角度影住「地球區」，一個人都無。
我倒抽一口涼氣，地球儀繼續講：「人類有咗文明，就不斷破壞我，喺我身上鑽石油、斬樹、堆積受污染嘅垃圾......」
我答：「如果你真係地球，地球咁大，每個人對你嚟講，都只係螻蟻啫。」
「蟻......假如千萬隻蟻喺你身上，不斷咬你，你估有幾痛苦？」地球儀幽幽一嘆。
「你講得啱，我返到安全區，會向大家推廣愛護地球嘅重要性。」我一路講，一路向後退，但門已經鎖死咗。
地球儀講：「我太辛苦啦，人類真係唔適合有文明，我努力咗咁耐，終於回收咗大部份人嘅智能。」
「回收？喪屍病毒係你搞出嚟？」我呆咗。
「喪屍唔係病毒，係人類原始嘅狀態，依照本能嚟生存。」
屏幕嘅畫面一變，只見一大堆披住獸皮嘅人，跪喺地下念念有辭。
地球儀話，20萬年前，原始人仲未有語言，佢哋好渴望自己可以更聰明，經常向上天乞求智慧。
地球深愛自己嘅子民，就同原始人講，可以賦予佢哋20萬年嘅智慧，原始人好開心咁應承咗。
於是，地球發放咗「智慧病毒」，壓抑佢哋體內嘅愚蠢基因，
從此人類唔再「只為生存而生存」，有更多嘅目標同追求，就發展出文明。
呢種病毒對唔同人，有唔同程度嘅反應，所以有啲人比較聰明，有啲人比較蠢。
但隨住人類文明發展，反而有咗破壞地球嘅能力。
到20萬年嘅承諾到期，地球終於忍唔住，決定回收人類嘅智慧，就發放咗「智慧病毒」嘅解藥，透過人類嘅牙齒傳播。
中咗解藥嘅人，失去智慧，變番原始人一樣，只依照本能嚟生存，即係我哋眼中嘅「喪屍毒」。
地球儀理直氣壯：「當日你哋應承咗，只有20萬年嘅智慧，依加夠期啦，我收番都無錯。」
地球嘅計劃好順利，人類嘗試建立安全區，都陸續被喪屍攻陷，
剩番我嘅安全區，苦苦支撐，係地球唯一剩餘嘅文明。
所以，地球特登利用人類嘅科技，製造一個假嘅安全區，發訊息引我哋自投羅網。
我問：「咁你想點？想殺埋我哋？」
「點會呢？人類等於我嘅仔女，仔女用刀捅我，我都只係想拎走你哋把刀。」
地球儀嘆氣：「我想你將『喪屍毒』帶番安全區，等大家都無晒智慧，開開心心咁生活。」
「我絕對唔會咁做。」我諗都無諗就拒絕咗。
「太遲啦，你個安全區嘅人，已經嚟晒呢度。」屏幕上嘅畫面變咗，好多架貨車駛入地球區。
我面色一變：「點解會咁，我明明話我嚟探路，確定安全先帶佢哋嚟。」
「因為佢哋唔信任你，怕你嚟咗『地球區』好食好住，唔返去接佢哋。」
地球儀冷笑：「你哋所謂『文明』，就係有無盡嘅猜疑同自私。」
我已經估到劇情嘅發展，等佢哋入晒「地球區」，就會變埋喪屍，人類最後嘅文明消失。
我合埋眼，喺自己條腰上撳咗一下，引爆炸彈。
我覺得「地球區」好可疑，所以我離開安全區前，將僅餘嘅炸彈綁喺自己身上。
同歸於盡。
眼前嘅地球儀大概只係地球嘅分身，我炸爛呢間房，可能，都傷害唔到真正嘅地球。
地球孕育人類，當地球要報復人類，人類有幾多能力去反抗？
係㗎，我嘅犧牲，可能係徒勞無功。
正如地球承諾賦予20萬年嘅智慧，到期就回收，好合理；
地球被人類文明傷害，想消滅文明，都好合理。
但無論如何，我都堅持我嘅信念，保衛人類文明。
所謂信念，就係你知道你嘅付出，可能極其渺小，可能徒勞無功，甚至可能唔係完全正義。
但你依然願意付出一切，去接近你嘅信念，哪怕只係一小步。
－完－
將專頁設定為「搶先看」/ "See first"，最新故仔馬上睇！
新書《寓言地府動物園》已經出版了，現正發售中，
詳情可點擊這裡：http://bit.do/e37JG
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #喪屍地球
一智能破萬年愚 在 一灯能破千年暗， 一智能灭万年愚。 20210128 佛言佛语 的推薦與評價
Jan 30, 2021 - This Pin was discovered by SiaGetChing Guan Yin Citta. Discover (and save!) your own Pins on Pinterest. ... <看更多>