早日醒覺吧
轉載一位做金融的朋友喺Facebook嘅留言，佢好憤怒，觀點只供參考
1. 反送中
由反送中開始講起, 點解咁多人反送中? 《逃犯條例》修訂通過後嘅其中一個後果，係特區政府可以按中國政府要求，將中國政府視為疑犯嘅人士送交中國大陸。銅鑼灣書店嘅老闆比人挾持用洗頭艇掟返大陸之後，用一堆大陸嘅罪行困住佢地。《逃犯條例》修訂通過後，洗頭艇都唔洗，直接話要人要可以拉人。只要係香港嘅任何人都可以拉。大陸可以叫香港政府交出任何人，包括駐港嘅外國記者。你相信大陸真係有法冶嗎？你相信大陸嘅法律嗎？是但整啲文件出黎話你逃稅你覺得好難嗎？唔好以為你係普通市民就可以置身事外。大陸所有野都可以偽造可以收買。
.
.
2. 撤回呢?
由一開始反送中遊行一直都係要求政府撤回《逃犯條例》修訂, 到遊行咗幾次什至有義士死諫, 換黎嘅只係林鄭一句 "The Bill is Dead"。直到呢一刻, 都唔肯撤回。咁究竟"The Bill is Dead" 同撒回有咩分別呢?
打個比諭; 你寄咗cheque去一間公司到, 你發現你開錯票, 你要求間公司Void咗張票。間公司覆你: "得嫁啦 張票我地唔會Good嫁, the cheque is dead"，但就死都唔肯Void咗張票佢。
居心叵測。如果真係唔會Good張票, 點解唔void咗去呢? 點解唔肯撒回?
.
.
3. 遊行變罷工
點解香港嘅市民會搞到今時今日咁, 個個星期出黎集會,遊行,什至去到今日全港罷工？頭幾次香港市民出黎和平遊行, 換返黎嘅係政府嘅漠視!!!
打個比諭; 如果你係一個家長, 你日日叫個仔唔好玩電腦, 佢次次都係 "哦" 然後唔理, 你會點? 我諗大部份都會一巴車落個仔到, 叫佢唔好再凈係得個"哦"。
同樣地, 平心靜氣表達訴求比政府聽但係佢地無理會過, 香港市民除咗採取更激烈行為迫政府回應之外, 仲可以點先可以令個政府回應?
.
.
4. 警察使用過度武力
點解香港而家仇警氣氛咁嚴重? 如果遊行嘅市民係暴徒會亂打人, 點解消防員, 救護員, 記者, 社工都冇事? 係得警察會同市民有衝突? 消防員, 救護員, 記者, 社工企得唔比警察後。我明白警察職責所在, 要維持冶安。
按警員行為而言, 我明你要維持冶安, 但唔洗5/6個警察撳低一個冇持武器嘅市民係地到打, 唔洗6/7個男警圍一個16歲小妹妹, 唔洗制服咗個市民之後仲用腳踢佢地塊面, 唔洗一行埋啲十幾歲嘅小朋友度就凶佢地屌佢地老母。
按行動而言, 我唔明點解未舉旗就可以肆意放催淚彈, 我唔明點解布袋彈橡膠子彈會打到頭, 我唔明點解會冇警員委任證。
而家行動緊嘅警察對得住佢地套制服嗎？
我希望警隊入面仍然有克制自重嘅警察係對得住套制服,對得住香港市民。
.
.
5. 警官黑勾結
就721元朗事件, 其實真係唔洗我去講啲乜。有圖都未必有真相，有片就真係有真相。你話元朗果晚游乃強係咪一早知情？你話係咪何君堯有份策劃？佢地策劃嘅唔係針對遊行人仕，而家無差別毆打市民。而呢件事上，只係拉咗二十多個人，亦冇警察需要為佢地冇到達現場負上任何責任。
.
.
6. 五大訴求
由始至終, 五大訴求都冇反共冇港獨。唔該你地睇清楚先。
1. 撤回《逃犯條例》修訂；
2. 撤回 6.12 暴動定性；
3. 撤銷所有抗爭者控罪，不可秋後算帳；
4. 成立獨立調查委員會，調查警察濫暴濫權、追究警察開槍責任及元朗警黑勾結；
5. 全面落實雙普選。
就(1),我上面已經講清楚。
就(2), 麻煩自己上網睇下咩叫暴動,睇下其他國家暴動係點, 睇完你先同我講究竟香港邊忽係暴動。
就(3), 警察嘅拘捕係出自政治原因, 並非法冶原因, 究竟有幾多個被捕人士係有採取過激行動呢?
就(4), 可以睇返上面。
就(5), 香港市民已經對香港政府完全失望, 在位嘅每一個官員都唔係真心為香港好, 我地想要搵啲真心愛港同理性嘅人重整政府。
.
.
7. 致所有藍絲,撐警,撐政府嘅人
如果你覺得香港罷工搞不合作運動影響你返工的話, 唔該你唔好求打8號風球, 打風果陣又唔見你咁鍾意返工？
如果你覺得而家嘅抗爭搞衰香港經濟的話, 香港市民要不吃不喝至少二十年先可以買樓, 呢個情況已經維持咗好多年。香港民不聊生咗好多年,你昏迷咗幾耐呀？
如果你覺得反送中係無稽, 咁香港嘅律師法官都係冇腦嘅？之前已經有法律界遊行反送中。《逃犯條例》修訂嘅弊處, 你會比法律界更熟悉？
如果你覺得香港警察冇採取過度武力行得正企得正, 咁麻煩支持成立獨立調查委員會。而家連香港公務員都支持都出黎集會，難道連咁多公務員都比人洗晒腦？
.
.
8. 致其他可以發表意見但根本冇資格嘅人
移民咗去外國冇打算返香港嘅, 唔該唔好係咁係到話香港比啲年青人搞衰晒。如果香港係咁好的話，你一早就唔會走 : ) 真係人不笑狗都吠。
坐係屋企冇見過遊行人士嘅, 唔該唔好係到隔住個電話/電視話佢地係暴徒。你有冇行過出去睇過佢地有幾和平？
對香港有埋怨嘅人, 怨資源比人搶, 怨人工永遠追不上通漲, 怨公屋唔到你住私樓又唔夠錢買, 而家出邊班年輕人就係為咗想改變呢個充滿怨氣嘅香港上街呀！！
.
.
9. 唔好再同我講而家上街嘅人有外國勢力有錢收
我比$1000你一日, 你同我上街食催淚彈比警察打! 仲要有機會坐監. 你去呀！ 你唔去？
個腦生出黎係用嫁, 唔係坐嫁！
