【爛中文】
我的爛中文是這樣練成的
每隔一兩個post，都會有朋友指正我嘅錯別字或者白字。以我厘啲中學就去英國讀屎片嘅人，究竟我啲中文响邊學番黎呢？係迫番黎嘅！
當年無email、whatsapp、facebook，長途電話貴到癲。當年家父送我去英國留學嘅時候，有一個嗰時我覺得好麻煩嘅要求。就係每個星期都要寫一封兩版紙嘅家書比父母（指明係書寫文，唔可以係廣東話），而每個月就寄本中文書比我。書並唔係睇完就算，係要寫閱讀報告。
每日都係上學放學番宿舍，邊有咁多嘢寫咩。每個禮拜寫嗰封所謂嘅家書，真係諗起都痛苦！寄過黎嗰啲書，唔係金庸或者衛斯理喎，係嗰啲文言文。最初都好啲係三國演義同西遊記之類，陳湘記啲字好細印刷又差嗰隻。之後就離晒普，寄本〈資治通鑑〉黎影響我學業！
佢越玩越大，我亦越黎越懶，結果我都叫做識睇下比較深嘅中文（為免我放棄，佢順應要求變咗金庸小說）。但係寫呢？依然係咁爛！但係到咗中年，我發現原來家父無形中令我擴闊咗我嘅閱讀世界。至少我唔會好似好多人咁，一見到無圖嘅書就驚（我屋企就有一個，多過三段字無圖嘅書就放低嘅人）。
#中文係好重要
#多謝阿爸玩我
#寫錯好過唔識
#資治通鑑係好嘢
#不過我三十幾歲先明
