【我和肥媽的快樂回憶～2005日本九州七天之旅(二)】
上次分享咗第一 & 二日嘅行程，今次輪到第三 & 四日喇！再次多謝大家陪我一齊回味我同肥媽嘅快樂回憶！
為咗令到行程得以連貫，以及讓啱啱嚟到夜空嘅朋友都能加入，我會重覆張貼之前(第一&二日)嘅行程！如果大家之前已經睇過，可以飛過佢；如果未睇過或者唔介意睇多次，歡迎陪我一齊回味吖！期望大家睇完俾個讚好或表情我吖！多謝大家！
我，好鍾意日本！唔係鍾意嗰度嘅名店同繁華，而係鍾意嗰度嘅優美同寧靜！做咗近四十三年人，我曾去過三次日本；第一次係喺2000年12月，同五個中學女同學去、第二同第三次都係同肥媽去！我以為今生我可以帶肥媽去好多好多次日本，可惜最終只有兩次！我同肥媽相依逾四十二年，唯一嘅兩次！
第一次帶肥媽去日本係喺2003年9月，當時我帶佢去咗東京同北海道；但我好衰，全程虐待肥媽、唔俾佢有啖好食之餘(事緣我當時好緊張自己嘅體重，四個月跳舞絕食激減70幾磅後減到short咗！)，仲激到肥媽病咗！
第二次，亦係最後一次，係喺2005年3月，肥媽中風前五個月！嗰次我帶咗肥媽去九州，喺豪斯登堡影咗好多靚相！而俾我無意中搵返、希望同大家分享嘅片段，就係呢一次！
七日日本之旅，係我當時帶完肥媽去旅行返嚟寫嘅！我會分成四篇分享，如果大家睇完之後喜歡，歡迎俾個讚或者留個言俾我！再次多謝大家！
日期：28-3-05(一)~3-4-05(日)
時間：(去程)5:15p.m.登機 5:35p.m.起飛 (回程)1:45p.m.登機 2:05p.m.起飛
旅行團：JKE07 0328
旅行社：東瀛遊
領隊：Vincent
司機：田代先生(TA SHI RO SAN)
全團人數：43人
第一日
福岡~酒店
~由於飛機遲咗起飛，抵達福岡已經夜晚九點幾！即時取消拉麵行程，喺領隊安排下，全團坐車去便利店，挑選自己心愛晚餐，再坐個幾鐘車去酒店！
~酒店有溫泉，但我同肥媽無浸到！因為食完個心水選擇(冷麵+凍飲)後，已經晚上十一點!!
第二日
太宰~天滿宮~豪斯登堡~酒店
~行去天滿宮途中係一啲寧靜嘅小街道，我好鍾意！我買咗個梅子紅豆餅同肥媽一齊分享，但無乜梅子味！影咗幾張相，買咗啲飲品，再去豪斯登堡！
~豪斯登堡啲風景好靚！有好多鬱金香、風車、西洋別墅、海洋…..
~但餐廳選擇好少！啲嘢食好貴！而且冇乜特別嘅舖頭！
~我同肥媽去咗間中華料理食lunch，兩碗拉麵+4粒公仔點心feel蝦餃，盛惠2600 YEN!!之後去食Tea Set ~ 1件蛋糕+ 1杯 熱飲+粟米湯，盛惠 800 YEN!!!
~有2間零食店有得試食（嘿.....嘿.....）
~嗰日好大風，天氣頗凍，肥媽吹到騰騰震！傍晚陪佢返酒店後，夜晚8:30我再自己一個膽粗粗"轆"去碼頭睇煙花！沿途一個人都冇，好黑、好凍、有少少緊張(驚盪失路)、亦有啲寂寞，好彩最後成功到達，啲煙花亦好靚！
~返到酒店，帶肥媽浸溫泉；再用1995 YEN請肥媽做咗15分鐘腳底按摩；之後再返去幫佢搽摩擦止痛膏！
第三日
三井動感樂園~鹹蛋超人館~別府海地獄~晚餐(Shabu Shabu)
~上晝去三井動感樂園，同領隊Vincent & 幾位團友玩咗個suggest除鞋玩（因為玩時雙腳會懸空兼四圍飛，轉到七彩）嘅過山車~OK好玩啦!!
~玩多個機動遊戲，同肥媽坐咗分半鐘觀光吊車，行吓、影吓相、請佢食吓軟雪糕，已經食lunch，無時間去埋對面間鹹蛋超人館添！
~個心囉囉孿！好彩Vincent好人，預鬆啲時間，等我哋可以去埋！點知....
~裡面超級細！得十幾行位！睇超人喺台上打怪獸，左邊入，右邊出，行勻全「館」路程無需半分鐘～Finished!!
~別府海地獄啲溫泉水好煙、都幾靚；啲糖果 & 雞蛋布甸亦頗吸引!!
~我請肥媽食布甸，自己就買糖食，見司機咁辛苦，請佢飲咗樽蘋果汁!!
~嗰晚入住別府灣酒店，對正成個別府灣，個view超靚！我仲識咗個喺嗰度做part-time嘅越南女仔，佢特登去日本讀書，我仲同佢交換咗e-mail添!
~個晚溫泉好靚！室外嗰個溫泉，泉中仲有好多沙田柚同玫瑰花添!!
第四日
Hello Kitty Land~綾文化村(釀酒廠)~酒店
~Hello Kitty Land得個門口花園有啲花花同公仔，地方頗細，亦冇乜嘢睇；機動遊戲適合2-12歲，不過我都排隊玩咗3個!!
~同東京個Hello Kitty Land完全冇得比！好鄉下式！肥媽就好開心咁用咗500 YEN抽中個Hello Kitty環保袋!!
~下晝餐定食勁肥膩！坐車停休息站期間，我又狂掃咗一大包木瓜乾&無數糖果落肚,麥兜變身進行中…..
~領隊Vincent話佢今日生日，所以前一晚特登畫咗張咭，沿途買多個puff送俾佢！點知佢食完個puff 嚟手就將張精美咭紙DUMP咗!!要同佢講先執返出嚟！
~夜晚餐buffet好豐富，好多嘢食！我食咗好多冷麵、沙律、和果子同曲奇餅，仲有朱古力咖啡同雪糕添!!大大鑊!!!
~夜晚浸溫泉，分室內 & 室外，質素普通！
~是日行程特色：車程頗長，沿途不時停車休息，狂掃零食！夜晚buffet超heavy，又有和果子試食，塊面 & 個肚腩圓咗1吋!!
(待續.....)
