//支持本Page請Click入內文比Clap，謝謝！//
回想一下，香港娛樂八掛新聞能夠造成如此哄動情況，上一次已要到幾時？唔通真係要追溯到陳冠希閃卡？
當你見倒《明報》、《東方日報》之流，全部都只能夠氣急敗壞咁跟住《蘋果》尾，仲要無片只能用硬照追報導單偷情新聞嘅時候，你就終於感受得到，成日話「已死」嘅香港娛樂圈，終於迴光反照啦。
但作為一個遲咗Login、（暫時）入唔倒去睇片嘅人，當然要寫篇文洩憤。《蘋果日報》之前搞《動腦Q》除咗招攬新會員，某程度就係為咗測試流量，睇下有萬幾人同時登入系統會唔會有「網絡塞車」情況；但結果卻係完全無用。當《蘋果》公佈呢單八掛新聞之後無耐，就有好多（新註冊用戶）發現登入不能嘅情況；然後再隔無耐，直頭連條片嘅連結都消失埋，成單新聞換上普通硬照，要睇亦只能去另一條連結睇3分鐘剪接版本。
我真係覺得好離譜囉！叫人點樣比信心做你嘅付費會員呀！（假膠）更新：內文有Youtube Link lol
相信好多人都會就呢單新聞進行各式各樣例如「藝人私隱應否被尊重」嘅評論，我自己唔係傳媒翹楚亦無跟開娛樂圈新聞，亦唔好意思扮專家。但我真係要糾正一下有啲人對香港人只關心娛樂八掛，對社會發生啲咩卻冷淡非常嘅講法：
首先，除咗追劇師奶，香港人已唔再關心娛樂八掛好耐架啦！仲記得時不時啲八婆週刊報下呢個果個藝人響大陸開房叫雞、果個藝人出軌勾佬，但反應都係無乜，甚至係非常冷淡──鬼咩，當你連個藝人名都噏唔出（裕美？星黎架？黃子恆？迪子？乜水黎架？），又無片又無相最多得啲Whatsapp情欲對話，我真係有Q興趣睇你；
今次唔單止男主角真正叫得上明星而女主角樣靚(？)身裁正(！)，仲要有聲有畫猶如親歷其境，於是大家嘅八掛之心咪重新被挑起囉──香港人係好八掛，但只係八掛值得八掛嘅新聞咋！
然後再將呢個現象推至而家香港嘅民主同社運，你真係唔怪得香港人對政治冷漠，連票都唔投：乜你個民主大台同班政客比倒個意欲人地去關心你地咩？我都唔好講與其睇梁振英頭版我不如睇許志安錫錫，睇陳淑莊發癲不如睇黃心穎發姣──剩係你地呢班政客響議會嘅拙劣表現、搞埋啲完全無新意、無希望，純粹係例行公事嘅廢柴遊行，本身就好似而家娛樂圈嘅一堆爛Show爛戲爛劇咁，只有食飽飯無屎痾嘅人先有關心走去理你。
之前幾撚多人話《蘋果》新聞垃圾，免費都唔申請A/C Click入去睇？到今時今日咪又係乖乖開Account；搞政治、爭民主其實一樣，你班政黨如果比倒個希望香港市民，令佢地覺得件事堅有得搞，當日佔中有幾十萬人出黎，咪臭係咁之嘛！
但唔好問我「#你咁叻不如你講下點做」，正如《蘋果》如果呢啲至安心獨家震撼新聞只能做到偶一為之，咁日後到會員轉收費人地一樣係會走人；你班政工作者逗住咁多公帑出糧做議員，享受各式各樣嘅公權力，當然係由你地去諗點樣去取悅民眾──當然，而家飯民仲直頭衰到唔投佢票仲要比佢地追屌，而唔諗下個問題從來都係響自己身上，就好似一本八掛週刊期期抄文了無新意，仲要屌尻讀者做乜唔比錢支持，咁又等聽執笠啦。
