【媒體專欄】PACO名人會——伊館首開售票騷 R&K：用自家製樂器玩音樂
入行5年的二人女子唱作組合Robynn ＆ Kendy（R&K），將於12月29日假灣仔伊館舉行首次售票音樂會《Robynn ＆ Kendy Reflection Live》。Robynn（葉晴晴）和Kendy（孫曉慧）坦言好緊張，勤做運動保狀態。是次音樂會除了有她們擅長的翻唱曲，當然亦有她們多年來的出色作品，以結他、keyboard伴奏外，亦加入大量玩味元素，Robynn笑說：「我哋將會好忙，搬好多自家製嘅小樂器上台玩，仲會有家嘅感覺O添。」兩把清新靚聲王盡情獻唱，我好期待這個Show。
現年31歲的Robynn和Kendy，早年分別由美國和英國畢業回流香港追尋音樂夢，並在一次音樂聚會中認識，結果一拍即合於2011年製作改編歌、自彈自唱放上網，第一首翻唱歌《你是我的女人》反應好好。其中《思念是一種病x Where is the Love》更有逾二百萬點擊率，後獲環球唱片公司賞識並簽約成為歌手。14年，R&K參加內地的《中國好聲音》，清新唱功網民爆like，人氣飆升。
翻唱走紅
今個月尾，R&K終於開到首個賣飛音樂會，場地更是能盡情表演唱功的新伊館。談到音樂會主題是「Reflection」，Kendy解釋說：「我哋2012年正式出道，到月尾正好係入行第五年嘅終結。Reflection想講返以前5年嘅旅程，好多歌都會勾起我哋和粉絲嘅回憶。」Robynn補充說：「其實個騷年頭已經講話會開，之後陸續推出單曲，直到年中仲未開愈來愈驚，因為好多人以為我哋已經開咗呢個賣飛騷。之前舉行過唔少宣傳形式嘅音樂會，今次開騷一定要與別不同。」
「拎晒『架生』上台」
R&K非常重視這次音樂會，籌備時在舞台設計、揀歌和造型上都大傷腦筋。Kendy說：「我哋第一次開會就問大家，『想觀眾睇完個騷有咩感覺？』答案係warm同touching，所以舞台設計唔使花巧，同我哋曲風一樣，簡約清新，加上同觀眾距離比較近，可以互動多啲，有種家嘅感覺。」Robynn亦表示今次會玩小樂器，她說：「早前我哋上《中國好聲音》，因為要帶好多小樂器去伴奏，好似杯咁可以敲打，次次上去執行李篋都好似『走難』咁。今次喺台上都會好忙，搬好多自家製嘅小樂器上台玩。慶幸音樂總監Edward Chan同我哋合作咗好耐，好了解我哋鍾意拎晒『架生』上台，想將呢點放大嚟玩。」
音樂會當然唔少得改編及翻唱作品，亦有兩女近年的創作。Robynn笑說，「我哋仲天馬行空想邀請一啲我哋翻唱過嘅原唱歌手嚟，好似一個大party咁jam歌。」講到造型，兩女都賣關子，Kendy笑謂：「其實我有諗反串着西裝，因為好多人覺得我哋係非一般女孩子似boy band，可能有part玩反串，女扮男裝幾得意。」最後，Kendy同大家分享一吓她的獨門護聲秘方，她說：「我喜歡少少威士忌加熱水，再加片陳皮，幾潤喉O架！」而我就喜歡威士忌加熱水，不時推薦畀歌手，有放鬆喉嚨的作用，而初起感冒時飲亦好見效，大家不妨試吓！
報導來源：頭條日報PACO名人會（2017/12/11)
http://hd.stheadline.com/news/columns/109/20171211/628695/
