Search
【#保險達人育成記 打倒癌細胞】
癌症係香港疾病嘅頭號殺手，病情持續、復發同轉移嘅情況好常見。呢邊打完，嗰邊可能又要再打過，簡直係一場長期抗戰。
市面上有啲危疾保險會對指定嘅嚴重疾病提供多重賠償，但唔代表隨時復發都可以賠多次，要留意唔同計劃對唔同病症嘅賠償次數、復發等候期嘅計算方法等等。以癌症等候期為例，第一次確診後，假如不幸復發，有啲保單會以第一次確診日起計算，滿指定年期先可以申請第二次賠償；而有啲保單就係用上一次完成治療嘅日期起計。
其實買得多重賠償嘅危疾保，都係想touchwood復發時有個保障，可以安心養病。唔想不幸有事時仲要有咩爭拗，都係喺投保前了解清楚保障範圍同保單條款啦！
#多重保障 #都係想安心打仗 #危疾保險 #蓋世保鑑Insurpedia
【#保險達人育成記 保險投資兩溝】
「我有錢，梗係買份保險啦！」
「我有錢，梗係攞嚟投資啦！」
喂呀~ 爭咩呀？考慮一份兩樣溝埋咗嘅「#投連壽險」咪得囉！
咪住，買保險唔同整牛丸，唔好以為人壽保險兼備投資，就代表一定win-win。考慮呢種保險係咪適合自己，你先要明白投連壽險有別於一般人壽保險，佢只係提供有限嘅人壽保障，身故賠償嘅金額通常只係略高於戶口價值，而戶口價值就會受投資組合裡面嘅基金表現影響。如果基金表現欠佳，唔單止有投資損失，仲會減低身故保障！
投保之前，記得做足功課，詳細了解產品結構、運作方式、投資選項同收費等，仲要查埋產品本身係咪獲得證監會認可。確定自己嘅投保目的，衡量過承受風險嘅能力，就可以考慮係咪買得過啦！
#加倍小心先可以避免失敗中嘅失敗 #只要用心人人都係保險達人 #蓋世保鑑Insurpedia
【#保險達人育成記 保到保唔到 唔係靠彩數】
意外入院？保到？
先天性疾病？保唔到?
屋企條水喉要維修？唔知保唔保到？
想知自己份保險包唔包某項特定內容，唔使估估下㗎！其實大部分保單都會列明「不保事項」，即係由指定情況下引致嘅損失將不受保障。一般嚟講，唔同類型嘅保單會有唔同類型嘅不保事項，例如醫保一般都唔保受保前已存在嘅疾病；家居保通常唔保自然損耗導致嘅損失；車保就唔保無牌司機、醉駕、藥駕等。
投保前細心留意條款同細則，索償時又識得refer返相關條款，咁claim到claim唔到，都唔係靠彩數，而係靠你嘅精明頭腦！
#貼心嘅提醒你又收到冇 #因為收到收唔到都唔係靠彩數 #蓋世保鑑Insurpedia
