畢業第一份工入前公司做嘢，本科讀企業傳訊，
喺網媒呢行嘅認知唔多，除咗自己19整啲冇乜人睇嘅YouTube 片之外，真係白紙一張咩都唔識。
恰吓恰吓咁返工，除咗準時同認真做嘢，都冇咩好優秀嘅傑件令自己好自豪。
而我相信做part time咩都要做，難得公司請我畀機會我，就咩都去做。
覺得自己啲橋唔好，入都係入啲穩陣嘅，唔會死但係又唔算好睇嘅，
有時做吓呢啲片，有時又畀大佬ban下，
慢慢喺公司變咗個妹仔嘅存在。（我嗰時咁認為啦）
職場新手冇乜經驗，又未有咩功積。
嗰時混沌又冇自信嘅時間，就得Kovis一個伸出友誼之手。
到我有日冇乜嘢做，繼續執道具房嘅時候，Kovis入嚟同我講，執完坐低入橋啦。
同我講我做緊嘅嘢可以做，但係唔好唔記得自己都叫做content creator。
之後坐佢隔離，同佢講吓啲橋吹吓水brainstorm下，在公在私都做咗同行嘅小伙伴。
然後有一日整咗條msn 街訪，boom一聲好多like好多人睇，
第一時間我去多謝佢。
因為佢幫咗我好多，教我點做街訪好啲，點樣同導演們攝影師們溝通，慢慢幫我逐少逐少建立喺公司屬於自己嘅嘢。
呢兩個禮拜見到發生咁多事，局外人好難去論斷誰是誰非。
我淨係想講，作為佢嘅朋友，佢嘅前同事，見到網絡上面對於佢嘅評價，睇到我都好唔開心，因為喺我眼內佢唔係大家口中咁描述嘅人。
我眼中嘅Kovis係有義氣，好為朋友。
做到佢嘅朋友我覺得好開心，而我都會努力，令佢為我自豪。
最後想講，網絡其實同時包含現實同虛幻，唔好盡信網絡世界，
而絕對嘅善惡，唔係人可以判定，亦都唔會喺網絡上面彰顯到出嚟。
適時遠離social media，多喝水、保持身心健康，
無論身處邊到，都選擇做一個善良嘅人。💜
