由始至終，我只有一個女朋友（上）
我女朋友，死咗。
我知道，人有悲歡離合，有生老病死。
我知道，人生總有意外，唔係所有人都可以活到八、九十歲，壽終正寢。
但我點都估唔到，我女朋友心心，今年先廿四歲，突然間就患咗怪病，好快就死咗。
一切一切，太快太快。
我仲未嚟得切消化佢身患怪病嘅消息，我仲未嚟得切問佢有咩遺願，陪佢玩晒所有想玩嘅嘢……
佢已經瞓喺我面前，以最冰冷嘅方式。
心心係我嘅初戀，佢係一個好特別嘅女仔。
佢平時獨立堅強，對住我又好溫柔，同埋佢成日都有啲奇怪嘅諗法，行街見到貓貓狗狗、花草樹木，都會講啲搞笑嘢出嚟。
我真係覺得，對住佢，一世都唔會悶。
可惜佢死咗，廿四歲就死咗。
我諗，呢一世，我都唔會再遇到好似心心一樣嘅女仔，我都唔會再咁愛一個人。
傷心過後，總要重新出發。
過咗一段時間，我工作上識到一個大我八年嘅女人，我叫佢雯姐，佢好落力咁向我示好。
有一次，我哋出街食飯，有個女仔抱住一束玫瑰花。
雯姐忽然話：「都唔明女仔點解鍾意收花，花係植物嘅生殖器，即係植物嘅JJ啦。剪晒人哋啲JJ落去，攬住周圍走，唔尷尬㗎咩？」
我忍唔住笑咗出聲，然後我諗起，心心都講過類似嘅說話。
嗰一刻開始，雯姐喺我眼中愈嚟愈吸引。
我同佢講過心心嘅事，佢都唔介意我有過一段咁刻骨銘心嘅愛情，仲話好欣賞我嘅深情。
於是我哋就一齊咗，相處落，我發現佢嘅外表雖然同心心截然不同，但性格真係好似，我愈嚟愈俾佢吸引住。
三年後，我打算向雯姐求婚。
然後，佢死咗，一場車禍奪去咗佢嘅生命。
我震驚，我悲痛，但所有情緒都改變唔到現實。
我開始懷疑，係咪我條命太硬，會克住所有同我相愛嘅女人。
我決定唔再拍拖，一來唔想克住人，二來都唔想再經歷失去摯愛嘅悲痛。
但愛情，唔係理智可以控制到。
清兒出現喺我面前嗰陣，我忍唔住愛上咗佢，佢都用最熱烈嘅感情回應我。
佢嘅性格同心心、雯姐好似，甚至比佢哋更溫柔，更配合到我嘅需要。
於是我鼓起勇氣，開始同清兒發展。
經歷咗以前嘅悲劇，我好關注清兒嘅身體健康，提佢出街要小心、過馬路要睇車……
結果，清兒因為工作壓力，跳樓自殺。
收到消息嗰一刻，我好震驚，但又有啲唔震驚……好似一早估到咁。
我開始覺得件事有古怪，好古怪。
連續三個女朋友都死咗，仲可以話我命硬克妻。
但有乜理由，三個女仔嘅性格、愛好，都幾乎一模一樣，再加埋一樣咁短命？
所以，當第四個女仔Betty向我示好，而佢嘅性格又同心心、雯姐、清兒好似。
我就意識到，機會嚟啦！
呢個機會，唔係拍拖嘅機會，係得知真相嘅機會。
我約Betty上我屋企飲酒，飲咗幾杯，我同佢講，我明白佢嘅心意，但因為我之前嘅經歷，我必須拒絕佢。
Betty含情脈脈咁同我講：「唔緊要，我會等你，會陪你走出陰霾。」
我估到佢會咁講，因為雯姐同清兒都講過類似嘅說話。
下集：https://bit.ly/3dolwLV
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #由始至終我只有一個女朋友
健康三街跳樓 在 台灣凶宅搜查檔案- 台南市安平區健康三街160號星光水悅大樓 的推薦與評價
洗腎不願父母照顧苦留美女物理治療師跳樓亡- 社會- 自由時報電子報. 30歲留美的女物理治療師，兩年前返台在醫院工作，最近疑因太過勞累、罹患腎衰竭疾病、必須終身洗 ... ... <看更多>