我有個朋友係插畫師，大約3年前喺離島開咗間舖，將自己嘅作品印落一啲文具同埋家居用品上面推出，初時反應幾好，雖然唔會發達，但總算可以靠自己雙手同埋技能搵兩餐。
不過相隔幾個月之後，舖頭生意同埋online shop銷量明顯下滑，然後有客人話佢知出面有相同嘅公仔產品，初時仲以為係我朋友出咗名，受到大品牌邀請合作，原來唔係，只係對方抄襲佢嘅作品，畫風酷似都算，連佢擺落文具同埋家居用品上面所附帶嘅句子都一模一樣。
求助無門，想入紙去相關部門投訴又手續重重，我朋友已經由嬲變到灰，加上生意額嚴重下跌，結果間舖捱到第8個月就執咗，好在佢係離島人，業主係左鄰右里，所以無條件畀佢提早解約，唔使賠埋餘下4個月死約嘅租金。
我朋友已經打返工喇，慶幸佢未餓死，但遺憾再見唔到佢更多新作品，而家份工只係照老闆order畫嘢。
你哋都知我以前有份工係涉及garment，曾經遇過一位大陸客係明抄香港一個原創品牌，作為香港人梗係嬲啦，人哋只係幾個時裝設計系畢業生開設嘅小品牌，你咁大間廠竟然明抄所有圖案同埋design再賣去歐美，會唔會覺得羞恥呀？當時我仲細個，所以毫無修飾就咁問個客，點知佢以半鹹半淡廣東話笑騎騎答：「抄有咩所謂，有錢大家賺，我哋可以愈抄愈好，而且我都係欣賞佢設計，我有買幾件返嚟做樣板㗎。」
抄有咩所謂？講得出呢句，因為佢唔係原創者，人哋花咗無數心機同時間去做嘅嘢，佢一句唔該就攞晒去，佢唔知道抄襲會令人哋生意萎縮，會令人哋永遠都唔可以有出頭天，甚至會令到成個市場嘅風氣都敗壞，最後就齊齊攬炒。
噚晚深夜有讀者inbox我，再由我同事轉達，原來地產從業員投稿個post有人抄襲，最初我反應唔大，因為人人都可以share辦公室日報嘅文章，只係對方故意唔要個故事，唔要一幅有水印嘅原圖，直接攞兩句tagline就出一個post，結果本來攰到已經瞓著又要開返電腦質問對方，又要出post回應，仲見到好多讀者凌晨兩三點幫我去留言同檢舉，連原本投稿嗰位地產從業員都inbox問我係咪刊登咗去其他地方，點解唔係share又冇credit。
如果有個page係咁樣抄襲你嘅作品，唔share唔credit，原因得一個，就係佢要扮原創搏like搏engagements，而且唔益你，結果佢成功咗，個post埋單過千likes，follower亦都一夜間多咗百幾二百人，但係佢唔知道呢隻「Yoho Town睇樓客甩底」稿係讀者好辛苦寫過嚟，我又用咗一段時間去校對，tune字，仲有造圖，投稿我仲要畀稿費，你一個唔該就拎走晒全部credit，拉兩行tagline出嚟扮原創，咁我哋咁辛苦做咩？
以前冇水印畀人偷圖，ok，加返水印囉，然後原來有水印都冇用，故事同埋tagline都一樣畀人拎出嚟抄，雖然香港已經變到唔似香港啫，都唔好咁快跟足強國嗰套吖。
你抄咗一個插畫師嘅嘢，佢冇得再做，係扼殺咗佢未來無數嘅作品，扼殺佢嘅夢想，扼殺佢嘅人生。
你抄咗一個時裝品牌嘅design，呢幾個設計系畢業生冇得再做，係扼殺咗佢哋日後更多嘅傑作，扼殺咗佢哋嘅時間，扼殺咗佢哋出人頭地嘅機會。
劣幣驅逐良幣，唔好迫到所有努力創作嘅人離場，我哋要營養，唔需要copycat。
#logo都廢事擺
#冇logo偷圖
#有logo就偷故事偷tagline
#水印打到爆花都冇意思
冇logo偷圖 在 歡迎偷圖 的推薦與評價
【不問自取，歡迎偷圖！但求唔好Delete我Logo扮自己整， 同情我，就俾個Like · · · · 歡迎偷圖. Jul 30, 2019. 等陣一齊地鐵搵周生，問下佢點解要走，點 ... ... <看更多>