《疫境媽媽》
「有時真係崩潰，試過佢扭計喊，我跟佢一齊喊。」
疫情下唔少打工仔都要WFH（在家工作），有人覺得減少通勤時間，可以休息多啲，亦有人覺得唔著數，好似永無放工咁。仲有一班在職媽媽，佢地嘅心酸同無奈，一般人未必理解到。
設計師阿儀有一個2歲半嘅大女，疫情期間細仔出世，屋企多咗新成員，本來就會更忙，加上要適應在家工作，佢話起初都搞唔掂。
「一開始我天真咁覺得幾好喎，可以睇住啊B，之後先知係惡夢嘅開始。我做設計其實真係好需要集中精神，好需要靈感。唔係routine work，忍下就可以繼續做嘢。」
到底係幸還是不幸，阿儀話佢都唔識計。
「當然有多啲親子時間係好事，特別佢哋咁細個，可以自己照顧佢哋、餵奶，呢啲都係好寶貴嘅時間，好多媽媽為咗照顧小朋友，特登轉freelance或者全職照顧都有，我有得留係屋企照顧佢哋，其實都唔敢投訴。但有時真係一個困獸鬥咁，佢哋連幼稚園都唔洗返，大家日對夜對，我鬧完佢哋，或者佢哋發完脾氣，都無咩緩衝嘅空間。」
經常要同兩個「小怪獸」鬥智鬥力，佢決定要有改變。幾百呎嘅單位，分成一個個唔同嘅區域。
「香港地方咁細，我覺得幫大家搵個空間變得好重要，我將屋企劃分唔同區域，我而家會叫佢哋，呢到係發脾氣區，呢到係遊戲區，呢到係食飯區。之前會覺得，小朋友食飯係難搞啲，容許佢哋玩下玩具、坐係地下，甚至轉幾個地方追住佢哋食，而家無啦，要發脾氣就去發脾氣區，發完、冷靜完先好出來。要等佢哋知道，咩情況下要做咩嘢，都順便訓練埋佢哋嘅discipline。」
小朋友要守規矩，作為媽媽，佢對自己都有要求。
「當然，我都有規定自己，分一D時間陪佢哋，小朋友咁細個，好需要attention。如果佢哋一扭計要attention你就去fulfil 佢嘅needs，咁我唔洗做嘢都得啦。所以會每日花D時間同佢哋講下故事、陪佢哋玩玩具等。啊B細個未必識，會多啲關注家姐嘅需要，滿足好佢，佢自己乖之餘，會幫我Tum下細佬。」
阿儀話，以前會同爸爸一個做好人，一個做鬧人個個，而家基本上好人醜人都要一個人飾演曬。小朋友訓覺嘅時間，先有自己嘅free time。雖然辛酸史講唔完，但佢都感恩有呢段時間。
「啊女細個時跟婆婆或者工人姐姐多，都會覺得miss咗佢嘅成長，有啲可惜。而家細佬真係睇住佢一日一日咁變，同啊女都close咗，呢D都係無價嘅。」
加油啊，阿儀！
🔍Follow我哋IG：Fillturecareercoaching
#全職獵人久保
#fulltimeheadhunter
