選舉結果塵埃落定，若這次選舉如楊岳橋所言是「一場不受干預的選舉」，我希望各派系也能平心靜氣、認真地看清楚現況。
首先，李卓人得票93047，馮檢基得票12509，兩者相加為105,556，仍然低於陳凱欣的106,457。既是兩者盡力拉票下，依舊不敵建制，那不能推委責任與任何一方𠝹票，因為就算有「如果」，就算兩者聯手，結果依舊是會輸，正如我不能怪責Lisa.S搶左我老公吳彥祖一樣— 本來我都係冇行，唔可以懶人地搶我條仔。
既然𠝹票的說法不攻自破，現在泛民需要留意的，是如何和馮檢基及其相關的勢力修補關係，否則就算馮陣營不再出選，該選票只會直接射落海或被對家吸納。麻煩兼拜託各大門戶綁好平時圈養的狼狗，不要讓他們發難先咬馮陣，否則上面有上面傾、下面有下面打，你地一定和好唔到。如果發現難以修補關係，我建議可以參考楊岳橋先生在修改議事規則的緊張關頭下，仍舊在小登科之際，邀請建制陣營開開心心玩返晚（當然，接下來是議事規則被更改了）派員結婚既能為黨內沖囍，亦能當和頭酒，邀請馮陣「杯酒釋票源」，可謂一石二鳥之計。
此外，唔好做清算list、唔好做清算list、唔好做清算list（因為很重要，所以要說三次），錯就認打就企定，做清算list只會令對方和你更加難再合作。這個網上有好多KOL，唔係個個好似我呢啲不吃軟也不吃硬的紐紋柴，佢地部分仲對非建制陣營有所憧憬（少年，你太年輕了），要是你不出江湖追殺令，反而懷柔處理一下，我相信未來就算你出戰又或是出事，大家都會踩少一腳。
簡單點來說，就是麻煩做返好少少公關。唔識玩facebook就交俾啲乳鴿玩，唔好成日留言追住啲人爆粗，大佬，好玩唔玩，走去練蛤蟆採補神功，咁多人睇住，有失身份啊你～
最後，放下你不必要也沒有人在意的過去，唔好開口埋口都「民主老兵」、「我當年...」，呢啲擺到明老屎忽的語氣，可免則免。各位呀叔呀嬸，無人對你地有興趣，亦冇人對你地咸豐年前的豐功偉績有興趣，我地投你係投「將來」，回想這次選舉，你大部份的火力除了務虛地攻擊政府和想當年外，我碌你個選舉專頁碌幾十個post，碌到星期五先見到你第一個講你政綱的post啊！如果要搵人鬧政府，唔駛投你啦，交俾我地呢啲唔專業嘅三姑六婆做就得啦！我強烈建議你地重新認真審視自己的社交媒體策略，參選最重要的是政綱，你問下投左你地嘅人，其實知唔知道你嘅政綱？我恐怕十個有八個都仲係投緊你個光環，但問題係「當你的光環暗過世間火柴何用困在五指山」？選民當然會走了。
最後的最後，我俾多個忠告你：唔好怪焦土。楊岳橋講得好岩— 「有頭髮邊個想做檢基」，如果見到希望，無人會想要焦土。你知道我呢兩日除左做公廁之外，仲做左幾多選民的告解室？成班友投完棄權，甚至係對家之後走黎pm我，問「係咪做左壞事？」大佬啊，我師奶仔黎架ja，神父play我真係唔識玩。我敢講，只要你地從今以後認真查找不足，改善政黨做返場好戲，我相信部份迷惘的羔羊還是會回來的。
焦土的壯大，不是在於焦土派有多努力宣傳，而是你們做得有多差多令人失望，請不要倒果為因，焦土派並沒有早於任何一個民主派成立，肉必須先腐，而後蟲生。
#只要敢遠飛亦能自創我的煙花紀
#神是我自己若然目光高過聚散分離
#奉承你因往日雙眼無珠不停放大你
#X票危害健康
#勿做道德綁匪
#多做事少說話
#舊時沖左落廁所架啦
#何況你的過去都不也就是一連串的失敗
#點解要拎出黎講
#告訴大家就算再失敗也能選議員嗎
#正能量哦
#算啦唔講啦
#積口德
圖片來源：香港蘋果日報
