反對填海遊行人數，警方數字為5800人。遊行當然係表達民意，呢點我諗無人會反對吧？全香港人口為700萬人，遊行人數為5800人，即係反對人數佔0.083%。
我個人唔太理解反對派又或是政府會如何解讀這0.083%的上街人數，反對派可以話臨急臨忙都有幾千人算好好，但建制派一樣可以話全港有99.91%的人都冇上街，一杯水到底半空定半滿，大家心中有數。
反對填海的人數肯定不止五千多人，但為什麼會出現99.91%香港人沒有上街的情況？我個人看法很簡單：大抵是很多人多年來發現上街後，既沒有階段、也沒有勝利，更沒有結果。我們唱著「自由仍是會開花」，但現實是「你要靜候、再靜候，就算失收始終要守」；我們唱著海闊天空，但諷刺的是屏風樓建得你看不見天空，而大海嘛… 也似乎快要填平了。
若果政客們未來繼續用「唱Ｋ小愚先」式的音樂系精神攻擊，希望林鄭會受到影響。那麼我還是會維持原判，在香港政府留地不留人的政治方針下，衷心建議在香港的朋友們盡快離開香港。
由於上一篇叫大家移民的文章被部份正能量小寶寶誤入，並呼籲我應該提供一點有意義的建議，唔好講「呀媽係女人」嘅說話。雖然我唔明白，點解我有義務、責任甚至係資格去免費教導別人，但人妻先生今日心情靚靚，我不妨跟在外國求學的大學生朋友們分享一下心得。
首先，作為留學生，能夠靠讀書讀到移民，在近年各國收緊移民政策下，近乎是不存在的。所以，大部份人都是需要靠畢業後在當地找到工作，然後累積一定的年期，才能移民成功。當中的實際操作，你可以自己上網找，又或找其他移民page的專頁主人，他們是專業的，我就不班門弄斧了。
我講嘅係：點樣可以在外國畢業後搵到工？
其實方法有很多，我可以分享其中一、兩個心得。
第一點：不要只顧跟同鄉鬼混，專心練好當地語文。呢個社會，識人係好過識字，而人唔駛揀黎識，但必須要揀黎熟。多少留學生人在外國，群埋嘅都係自己香港留學生的圈子，食嘅三餐都係唐人街的米飯？幾年過去，由於缺乏與當地文化接觸，外語毫無起息，也無法融入當地的文化與生活，唯一有改變的，是中文的確退步了。這樣的話，又怎能真的找到當地工作——給了你幾年時間都融入不到一個地方，你憑什麼說服人家你可以融入公司？
第二點：多參與課外活動。原因好簡單，都係識人好過識字。在大學裡有好多課外活動，其實好值得你參加，以拓展你的人脈。除了必須要當的實習外，多參加學校的聯誼社交活動，總有機會遇到一些撈得掂、又想回來提攜後輩（兼揀卒）的師兄師姐，如果對方仲要都係講廣東話嘅，你被揀中的機會又再大大提升。我聽聞過有某金融業的朋友，畢業前老是幫已畢業的大師兄當跑妥腿，後來被「度身訂造」左一個位去請佢返去工作，非常架勢。你急著找工作，人家也是求才若渴，當然，前提是你真的要有才讓人家渴吧…
原來寫左千三字啦？我都係收筆算啦，寫太多無人睇。我睇下大家對呢個topic有冇興趣吧，有嘅話我再寫啦～
當然，你可以反問我，點解人妻先生英文唔好、成績又唔好，咁都可以在外國有人請？唔… 我只能講句：運氣也是實力的一種，難道我靠臉吃飯也有錯嗎？（迷之聲：你靠臉吃飯的話，會窮…）
#我三十一歲人啦
#幾十歲人仲講讀書成績
#不覺得羞恥嗎
#好吧我的例子有點特殊
#另一種visa另一種玩法
#除左搵份好工
#仲可以搵個好老公
#而我只會向外界稱聲我是偶像派
#所有上司都係被我迷倒而請我
#絕對和實力無關
#呢條友恨做花瓶恨到上腦
