《筆友》
♂：長傾，不見，我地算係筆友嗎？
♀：你咩年代？仲知道有筆友呢樣野？
♂：今時今日筆友呢件事同仲用3310無分別
♀：珍貴既事物，永遠都唔會過時
♂：筆友之所以珍貴，係因為兩個互不相識既人，可以暢所欲言，又唔怕比對方知道身份
♀：如果傾到既就係，話不投機半句多
♂：我相信自己係一個幾好傾既人
♀：自稱好傾都唔敢既人，就一定唔好傾，自認係，都未必係
♂：咁麻煩你有日覺得唔想再傾既，單聲
♀：有日你見我唔覆你既，就醒目
♂：你曾經有過筆友？
♀：無，呢個年代筆友比炮友更難搵
♂：當然，十分鐘邊個堅持唔到，十封信邊個有恆心寫
♀：你覺得有恆心就做到筆友？
♂：連恆心都無既人，就一定唔係，有恆心，都未必係
♀：你學野都學得幾快
♂：證明我有認真睇你講既野
♀：閱讀能力都係一個好筆友必備既條件，咩都要講到白，仲有咩意思
♂：表達能力都係一個好筆友必備既條件，想講咩都講唔清，點溝通
♀：咁你覺得仲有咩係好筆友既條件
♂：唔……唔問唔應該問既問題
♀：都係既，不過我講明，就算你問我都唔會答
♂：其實你答，我都唔會知你講真定假，所以我唔問
♀：真假重要咩？
♂：對於認真既人，重要
♀：咁你千其唔好認真
♂：偏偏我係認真既人，你講，我信，我本將心向明月，奈何明月照溝渠，錯不在我
♀：我講左，我唔會答，所以我無必要呃你
♂：咁咪得，比起筆友，要搵個從來唔會呃自己既人，更難
♀：嘿，從來唔會講太話既男人，更難
♂：可能我唔係男人
♀：咁我都可能唔係女人
♂：筆友都要性別要求？
♀：我要求只有兩個，長傾，不見
♂：你無見我都係咩？
♀：暫時我見過最長記錄係一個月，唔知你會唔會刷新到
♂：我保證，最少一個月零一日
♀：聽住先，順便觀察埋你係咪唔會講大話既男人
♂：唔好對我有太多興趣
♀：對唔住，只係社會實驗，你暫時都未令我感到太大興趣
♂：好多野係雙向，話唔定將來我對你無興趣呢
♀：咁我都相信我係一個幾好傾既人，前題係，你同我傾咩，如果係每日講早晨，食飯未，做緊乜，咁我唔識同你傾咁高深既話題
♂：不如咁，每日我地輪流開一個話題，天文地理時事歷史電影星座乜都得，只講一樣唔可以離題，你點睇？
♀：Deal，暫時你既創意高於平均值
♂：咁我應該點稱呼你
♀：捱到一排我想講我就會講
♂：如果你肯講，我會想知中文全名
♀：咁你再等下先
♂：我覺得我會有日知道
♀：有自信係好事，我都希望你等到我想講既一日，訓先，筆友你諗定聽日講乜
♂：諗左，晚安，筆友
