星期六去左 Pen So 嘅「香港災難繪本解說會+絕命兩小時畫展」
有睇開佢嘅朋友應該知道佢啲畫真係好細緻，香港嘅街景真係畫得仔細到離哂譜。有次見到佢畫鰂魚涌巨廈，嚇到我個心離一離，令人有啲密集恐懼症發作，第一次見人會數哂總共有幾多層，幾多個窗，完整咁畫出來。我平時畫ifc 都只會畫大概10個窗去概括成件事。
星期六個解說會，pen so 主要係解說佢本《香港災難》，除左畫風非常細緻之外，佢對本書嘅編排同要求都令我大開眼界，本書竟然喺唔同嘅頁數，有唔同嘅配件，我唯一諗到類似咁有心思嘅商品，就係kinder出奇蛋。而去星期六嘅解說會，仲可以拎到一人一份度身訂造嘅《香港災難》配件包，令讀者睇《香港災難》嘅時候，更加完滿咁感受到成個故事。
當曰在場有朋友問pen so，一張完整嘅街景要畫幾耐，佢話8個鐘，真係好西利，8個鐘如果俾我，我其實可以畫到一隻蛋黃哥，頂盡畫多隻hello kitty。要畫到一本書咁厚嘅黑白畫，真係唐伯虎嘅level。
如果用句說話來形容pen so 對香港街景嘅描繪，真係「捉緊生命濃度 坦白流露 感情和態度 留下浮光掠影飛舞」。
對於佢咁細緻咁畫低香港嘅一切，係有啲感動，尤其早幾日佢畫低左雞同鴨講嘅老許記，又令我諗返起老香港嘅味道，真係隔住個mon都聞到燒鴨味。
本土回憶系列postcard已印製中！第一套(重製版)和全新第二套會同步上市，有興趣的朋友請密切留意！
