我愛打喪屍（上）
大家好，我係一個家庭主婦。
我老公係一個顧家而沉默寡言嘅男人，我個仔係一個勤力自律嘅好學生，我哋嘅家庭經濟狀況非常穩健。
我唔需要返工，我嘅生活只有一個字可以形容：悶。
如果用三個字嚟形容，就係「好鬼悶」。
喺呢種情況下，我當然會背住老公同個仔，偷偷尋找刺激。
唔好誤會，我係一個對家庭非常忠誠嘅女人。
我嘅愛好係……打喪屍。
唉，咁作為賢妻良母，「嘭嘭嘭」咁爆喪屍嘅頭，爆到成個Mon都係血，我驚嚇親老公同個仔㗎嘛。
所以，每日我都係等老公返咗工，送埋個仔返學。
我先會戴上VR眼鏡，搵最刺激嘅打喪屍遊戲。
呢排我迷上咗一隻新遊戲，叫做「喪屍圍城」。
遊戲設定係末世之後，喪屍當道，秩序崩潰，剩低嘅人類為咗生存，建立咗一個個嘅安全區。
除咗喪屍之外，末世中仲有好多變異嘅動植物，糧食嘅生產都受到嚴重破壞。
我操控嘅角色叫洛拉，佢本來係一個女兵，末世開始後，憑住佢神準嘅槍法同軍事知識，成為咗其中一個安全區嘅大佬。
我要帶住手下出去打喪屍，唔止要親手將喪屍爆頭，仲要考慮手下嘅佈陣，點樣先可以用最少嘅犧牲換取最大嘅成果。
與此同時，我仲要經營自己嘅安全區，尋找資源、分配食物、解決手下嘅矛盾、避免俾其他安全區吞併。
同現實生活截然不同嘅係，喺遊戲裡面，我每分每秒都過得好刺激，殫精竭慮。
一個錯誤嘅決定，一次失敗嘅戰役，就可能會冇咗條命，甚至將成個安全區嘅人類，都帶入絕路。
我好沉迷「喪屍圍城」，將所有空閒時間都拎晒嚟玩。
喺我嘅不懈努力下，安全區嘅人口愈嚟愈多，洛拉都成為遠近弛名嘅強者。
我沉迷遊戲，沉迷到每日都恨不得老公早啲返工，阿仔早啲返學。
冇幾耐係公眾假期，老公特登買咗機票，一家三口一齊去旅行。
嗰幾日，我每日都好掛住「喪屍圍城」，數住手指諗，仲有幾多個鐘先返到屋企。
完全冇喪屍嘅風景，平靜嘅一切，令我悶到就嚟崩潰。
好不容易捱完成個旅程，老公同仔仔踏出門口嗰一刻，我即刻打開遊戲。
玩咗一輪，爆咗好多隻喪屍嘅頭，我忍唔住大聲講：「好爽啊！」
「你好爽？不如同我交換。」
聽到聲嘅同時，我見到屏幕上嘅洛拉，正面望住我。
洛拉再講多次：「你好鍾意打喪屍，我都鍾意平靜嘅生活，我哋交換人生啦。」
我以為呢個只係遊戲嘅隱藏任務，就輕描淡寫咁問：「點交換啊？」
點知洛拉講，佢係一個真實存在嘅人，可能存在喺另一個時空啦，總之末世後，佢日日要打喪屍，又肩負住咁多條人命，壓力好大。
所以，洛拉開始玩末世好流行嘅遊戲「平靜生活」。
和平繁華嘅都市，流行刺激嘅遊戲；生死一線嘅末世，反而嚮往沉悶嘅重覆。
我就係洛拉嘅遊戲角色，一個平凡到沉悶嘅家庭主婦，鄭師奶。
我下意識反駁：「你話我先係遊戲角色？痴線，我係真人，你先係遊戲角色喎。」
洛拉答：「邊個係遊戲角色都好啦，總之，我呢邊彈咗個選項出嚟，問我要唔要同你交換身份。從此你做洛拉，我做鄭師奶。」
「吓？」我呆咗。
洛拉繼續講：「我真係好鍾意你嘅生活，日日都好有規律，生活直情唔洗用腦……」
我打斷佢嘅說話：「悶到爆炸啊！今日就知聽日會點，直情知埋下年會點。」
「你既然覺得悶，咪同我換囉。」洛拉答得爽快。
下集：https://bit.ly/3g6nQHi
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #我愛打喪屍
圍城遊戲 在 遊戲三：圍城戰爭- Tarkus 拓可思 的推薦與評價
遊戲 三：圍城戰爭5/12 台灣體驗活動part3 運用BeeCar & TarkusVP 設計一系列的遊戲圍城戰爭是利用軟體的「距離感測器」操作透過親子互動的遊戲增進 ... ... <看更多>