評《星球大戰:天行者崛起》: 尋找最大公因數的藝術
**絕無劇透，但有極模糊地提及電影面貌，敬請留意**
JJ Abrams今次嘅任務實在太艱巨啦，《星球大戰:天行者崛起》要同時為1至9集同7至9集收尾、老中青星戰迷都要餵食、要將第8集「走歪咗」嘅劇情撥亂反正、原力Jedi Sith之間千年之戰又要好好處理、仲要交代主要角色命運、角色Screen Time又要分得勻、動作特技同笑位又要做得好做得夠，仲有呀，仲要幫迪士尼賣衫賣玩具呢，唔只呀!仲要做政治正確撚，唔可以踩中性別種族嘅地雷呀。
儘管係咁，導演今集倘算交足功課。星戰迷全世界冇一億都幾千萬人，一地都係，每個人心目中嘅理想結局都大不同。唔好話討好啦，要滿足佢地，只能交出最大公因數。而鬼哥認為JJ Abrams算係做到了。以上提及嘅每一個任務，作為荷里活首席商業電影大導之一，佢都專業地照顧得到。
主線歷險故事紮實簡單，比起上集三線進行，力量集中得多。但係遊戲RPG式嘅關卡略嫌兒戲；去A點同NPC講完嘢之後去B點開個箱再攞線索，呢類鋪排，感覺編劇偷懶。
幾位主角嘅友情係今集主軸，但係化學作用只係OK。無論演技對白劇情，都未能俾觀眾感受到份友情有幾金堅。分開嚟講，演員們都交出不俗嘅演出。尤其女主角Daisy Ridley (Rey)，黑白爭扎，光暗糾纏嘅表現到位有說服力；而且觀眾仲可以喺呢啲層次入面，搵得番Rey作為拾荒者嘅無邪同稚氣，角色極度討好，係成個劇本嘅最成功之處。
相信Rey外傳需求極大，唉睇嚟又會喺Disney+ 屈錢...囉。
其他角色相對比較平庸，唯身世背景，最終下場，都有一一交代。前面講到所謂7至9集收尾，就係呢個意思。
第8集導演Rian Johnson其實立咗個壞先例，就係原力任你擺，用途你講晒；用原力嚟飛都夠膽死。今集破例破得更盡，「應用範圍」更廣。好處係好玩得嚟對劇情打咗類固醇，刺激過足癮。但係對比較傳統嘅老餅星戰迷嚟講，就未必能夠照單全收。
今集致敬位特多，係789集之冠，而且鉅細無遺相當有心；大至畫面色溫構圖，小至一粒音符一句對白，餵食老餅星戰迷意圖明顯，呢方面鬼哥相信佢地會滿足收貨。
另外，史詩式大堆頭動作銀芽蕉蕉俾得算足，激光格劍亦夠刺激。要一提今集畫面同顏色特別豐富，鬼哥係有被震撼到。去到後段直頭豐富到有啲油膩吃不消。
最後必須highlight 配樂大師 John Williams嘅功力。妙絕嘅音樂畫面融合，高明地以音樂說故事，加上新舊樂章巧妙嘅交纏，係接近100分嘅完美演繹。觀眾一定要清乾淨對耳仔入場，每一幕都要聽清楚，感受清楚。奧斯卡必定最少獲得提名。
整體嚟講，《星球大戰:天行者崛起》面對艱巨任務，結果算中高分過關。戲軌簡單集中，寧將焦點鎖定致敬位同細膩感動位，尋找最大公因數，做法聰明。動作特技大場面質素有保證，配樂幾近完美。
鬼哥俾78分。
#星球大戰 #天行者崛起 #星戰 #迪士尼 #Rey #原力 #絕地武士 #無劇透 #JJAbrams
Star Wars
Disney
