[方以文問兩句][Kevin Chu Kam Yin(朱鑑然)]
有人問我做乜《無間道》剪到一忽忽我都唔棄劇，咁係因為我想睇朱鑑然（朱仔）同埋蘇麗珊，仲有一班老戲骨。之前喺網上播嘅時候，朱仔已經跑出，唔少人話佢有潛力。我就留意咗佢好耐喇，由《破風》到ViuTV《SE7EN》做主持，仲有《骨妹》，再到依家《無間道》。呢位曾經破香港背泳紀錄嘅游泳代表由游壇轉戰娛樂圈，發揮機會愈來愈多。唔好再話香港冇年輕一代演員喇，係冇簽無綫啫（其實無錢都有好多，係冇乜機會啫）。
好多謝朱仔佢肯理我。佢答問題時好誠懇，同佢平時funny happy guy嘅形象好唔同，好impressive。希望佢愈做愈好~
____________________________________
問：[嚴重劇透警告] 喺《無間道》當中你做劉松仁個私生子，同佢對手戲多唔多呀？喺前輩身上又學到咩呢？
答：其實戲份唔算太多，加埋應該有兩至三場左右。有一次我煩住松哥搵佢傾偈，松哥話就算係佢咁有經驗嘅演員，準備到好用心好用心好用心，都未必能夠將個角色做好。佢嘅經驗分享，令到我明白到就算係好有經驗嘅前輩演員，都要好用心去做。我呢啲咁新嘅演員，我真係唔知要落多幾多成嘅苦功，先可以將嗰樣嘢做好佢。
____________________________________
問：知道可以演到《無間道》呢套經典電影嘅延續電視作品時，你有咩感覺呀？嗰時你又對自己嘅演出有咩期望？拍完之後完成到嘛？
答：心情當然係非常之興奮緊張，因為《無間道》確實係近年香港電影入面嘅經典。《無間道》係我第一套嘅電視劇，亦都得到一個好豐富嘅角色，對我嚟講係個好大嘅挑戰。嗰時我希望真係做到有古惑仔味道出嚟。拍完睇返國語版，自己覺得勉強都可以嘅（笑），當然喺未來表演方面仍然係要落好多好多苦功。同埋因為我個角色同好多唔同嘅角色有同場戲，所以我亦都希望自己可以喺人物關係方面，同每個角色都有清楚嘅分別喺度。我同我大佬係咩關係，我同警察係咩關係，希望可以做到個分別出嚟。
____________________________________
問：[劇透警告] 演洛威有咩最難嘅地方？你自己覺得邊場你發揮得最好？你自己又最鍾意邊場呢？
答：我同洛威嘅成長背景、家庭背景都好唔同。基本上我本身唔係好係「古惑仔」，所以要理解到個角色嘅心態係需要借助好多嘢，我會去做功課訪問一啲做警察嘅朋友或者uncle，從佢哋口中嘗試去了解吓佢哋接觸到嘅古惑仔行為上會係點，或者係睇多啲古惑仔嘅戲。我覺得同我戲中嘅兄弟子彈嘅對手戲發揮得幾好，因為佢好入戲，所以同佢嘅兄弟情會演繹得好啲。例如有一場係喺按摩院我同佢講自己嘅背景。另一場我要畀社團人士家法伺候，罰我浸我（笑）。嗰場戲我本身對於游水閉氣方面掌握得好少少，所以我演落去我幾enjoy畀人浸（笑）。[按：朱仔本身係港隊游泳代表，主打背泳。浸佢水應該令佢好有親切感~~~ 哈哈]
____________________________________
問：演電影、演網劇、做電視主持你都有試過。你自己最鍾意係咩？覺得最擅長係咩？
答：目前嚟講我覺得我冇一樣做得好，但係如果你問我暫時嚟講電影、電視劇，即係演戲嚟講我可能會鍾意啲，個挑戰大啲。如果你叫我做返主持人嘅工作，可能比之前會輕鬆少少。但係我又真係唔夠膽講我邊一樣最擅長，各方面需要多啲經驗，我先可以決定到話咩係我最擅長邊樣，但係興趣方面我就一定係演戲囉。 [按：之前睇佢喺ViuTV《SE7EN》第一季做主持係幾好笑喎，不過唔係太多嘢講。]
____________________________________
問：《無間道》之後，又拍咗《蝕日風暴》，都係警匪卧底片，你覺得拍警匪卧底片對於演員有咩要求？你之後又想挑戰啲咩類型嘅作品呢？
答：《無間道》我做古惑仔，《蝕日風暴》我就做警察，所以兩個反差都好大。我覺得要掌捏個位，係你做古惑仔個時要有佢哋嘅感覺，做警察時你要有警務人員軍官階級咁。我覺得雖然古惑仔表面上係一個衰人，警察表面上係一個好人，但係從自己方面嚟講一定會覺得自己做嘅嘢唔係咁衰，或者一定係好嘅。我覺得點樣要做到夠實淨，要自己說服到自己，兩者都係黑白分明。好可惜我仲未接觸到卧底成份嘅角色，我未可以講到畀大家聽做卧底嘅感覺係點。拍咗兩套警匪卧底片之後，我好想拍一啲校園嘅嘢，如果做中學生做唔到，我都希望摱車邊演到大學生嘅角色，因為我覺得可以趁自己仲青春嘅時候，盡量拍一啲青春啲嘅嘢，個感覺可能會同自己嘅經驗類近少少。[ 按：睇朱仔嘅SNS都知佢係陽光大男孩，拍啲校園嘢應該冇問題，希望快啲有人搵佢拍啦]
____________________________________
問：除咗《 無間道》、《蝕日風暴》，仲有咩作品可以見到你呀？
答：嚟緊喺香港會有上嘅電影有《獅子山上》、《蝕日風暴》。如果係上網嘅話，有一套叫做《遺忘者》嘅網絡大電影，仲有一套叫做《天才學渣》。希望年中希望會出到一套電視劇叫做《許你浮生若夢》。希望可以做多啲作品，拍多啲嘢畀大家睇。[ 按：嘩，原來都有唔少作品喎。支持朱仔，支持多啲新一代演員]
____________________________________
#朱鑑然 #方以文問兩句 #無間道 #無綫 #TVB #寰亞 #獅子山上 #蝕日風暴 #天才學渣 #許你浮生若夢 #遺忘者
天才學渣 在 滿級天才控分當學渣，卻暗中佈局用美人計拯救全班，大神要開掛 的推薦與評價
动漫解说#欢迎来到实力至上主义的教室#动漫#七月新番. ... <看更多>