關於 女仔問你鍾意佢啲咩 ，我們在網路上蒐集到這些相關的討論、資訊與評價

【Frankie做咗啲乜？】
當我同人講Frankie嘅時候
會得到兩個反應
第一係Frankie好靚仔呀！
第二係Frankie即係邊個呀？
之後我除咗話好靚仔嗰個…就諗唔到講咩
靚仔/眼淚…冇喇！

關於皮皮嘅存在感
同調教你Mirror第6集 調教Frankie一樣
睇完唔知睇咗啲乜
調教Frankie？調教咗啲乜？
成集變咗引AK發脾氣唔成功、
麥子樂分享廿年浮沉、幕後最喜愛Tiger
咁Frankie呢？
都真係唔知Frankie做咗啲咩
既然Frankie存在感咁低
佢嘅item就更加唔應該將佢放係AK身邊

我鍾意Frankie
好明顯佢真係好靚仔
就算佢冇做啲乜 企係到
都會留意到佢 有種光芒 唔會唔記得咗佢
最留意到皮皮 都係喺AK youtube channel
(我諗我會重覆講好多次
佢個channel真係救咗好多人)
皮皮會有意想不到嘅搞笑感
又唔算綜藝感 但又會突然七師傅上身
爆出一句好搞笑
(題外話 喺《友情撳鐘仔》問題入面
皮皮最想擁有嘅(唔係ipad)究竟係咩？好想知)

除咗靚仔之外
我真係唔可以好肯定咁答你點解鍾意佢
佢有少少尷尬怕醜嗰個樣好睇？
望落舒服有觀眾緣？
喊得好睇？
感覺冇機心 好善良好乖嘅人？
跳舞好睇？
講到呢到…我再去翻睇下Frankie啲片
諗住睇下佢啲演技 跳舞 唱歌 綜藝感….
sorry…睇完之後 我發覺我淨係望住佢個樣
乜都冇留意到

皮皮有冇唔努力？
我答唔到…佢根本都冇機會
佢點努力 或者做人有幾hea都見唔到
tiger就仲有大把青春
但Frankie年紀唔細 機會唔多

第6集 成集最有意義就係最後Tiger講嘅嘢
『係會有人睇到你嘅
無論你有冇機會 even得一個機會
喺嗰個機會入面認真做 係有人睇到㗎！』
Tiger就喺係《男排女將》入面得到阿檸呢個角色
唔係主角 但佢演得好好 令好多人留意到佢 包含我都係
而Frankie就係差一個咁嘅機會
下半年播嘅劇集《IT狗》 Frankie有份做
希望佢把握呢個機會
畀人睇到陳瑞輝嘅實力
同埋會有多一個title知道
『哦～拍《IT狗》嗰個Frankie』

#Frankie #陳瑞輝 #皮皮
-------------------------------------------
#調教你Mirror
#Mirror #梁祖堯 #花姐 #ViuTV

剛剛生日一個月，亦即係啱啱30歲咗一個月。

好似冇乜特別，個人都冇乜成熟到，但係身體病痛就多咗，年頭腰痛，跟住耳仔痛，搞唔掂，越嚟越虧

以前生日冇乜特別感言想講，但係30歲都算係一個關口，我個心亦都好澎湃，好多嘢好想講，點知真係太忙又病，隔咗一個月嘅今天先講。

最重要唔係將心入面嘅說話講出嚟，而係當你好感性去講一啲嘢嘅時候，好自然就會有人過嚟like，跟住再順勢賣廣告，咁就可以達到最強嘅廣告收益，等多啲人買我嘅書，訂閱我。呢個先至係重點，冇錯，我係冇改變過我係銅臭商人呢一個本質

當我反思人生嘅時候，我唔係首先諗起自己做過乜，有啲咩人生成就，搵幾多錢，幫過咩人，識啲咩人，做過啲乜嘢想過新聞嘅事。呢啲都唔係咁重要，我係諗翻起我溝過嘅所有女。真係有《挪威的森林》嘅感覺 - 曾經係生命中出現嘅人，然後你慢慢對佢嘅印象變得模糊；但係又有一啲人，你永遠都記得。其中有位大學同學，人美心善讀書叻，幫我解決好多人生麻煩，阿爸阿媽都好鍾意佢。結論係，我真係一個仆街。

間中我都會觀察一下同我同年紀嘅人做緊啲乜嘢嘢，有啲我識嘅，有啲我完全唔認識。最近互相挑機隻揪嘅兩位富家子弟，同我年紀相若。我最近好鍾意嘅Serrini，新朋友游學修、去咗台灣嘅李拾壹、viuTV乘載住電台夢嘅旁白君Sam......好似大家都有啲嘢做緊，慢慢改變緊個社會，好多人都有自己嘅目標同夢想。

我人生都比較空洞，冇乜嘢夢想或者人生追求，但係有好多目標想做，鍾意成就感。比起一般金融人，我冇咁鍾意錢，所以我係一個怪胎。大概同我差唔多年紀嘅金融人會炫耀自己買咗樓、有靚車、有名牌，呢啲我全部都冇。別人有細屋轉大屋，最近我搬咗屋，生活條件比以前仲要差。有時我覺得，搵唔到錢唔緊要，錢越搵得多，反而束縛左靈魂嘅自由。生活簡單啲使少啲，安貧樂道，唔好太多牽掛，咁自然個人就會慢慢有少少骨氣，講嘢就開始有少少串。

呢幾年每次認識新朋友，啲人都問我做緊乜，我發現呢個問題好難回答。呢幾個禮拜我都越洋網上同一位知名社交媒體公司創辦人傾偈，佢都成日問我到底做緊啲乜嘢，點解咩都識啲，我都答佢唔到，尤其是我英文有限，用英文答就更加難答。

我係一個跨界別的怪胎，你話我喺媒體人，我係。我亦都係一個投資者，投資唔同資產，亦投資別人。我出過五本書，都OK暢銷。我係一個作家，仲可以扮嘢自己係文化人；亦都有金融嘅參與，做過基金做過上市公司。我會創業，發展自己嘅事業，賺下錢，養吓人。我係一個持續進修嘅學生，準備讀人生第三個碩士。

我冇一個既定嘅人生事業軌跡，亂到七彩，我諗未來都只會越嚟越亂，既然係咁，咁就跟着人生嘅劇本繼續行，當人哋繼續問我係邊個嘅時候，我唯有都係繼續胡說八道。

至於移民，我一定會，但唔係好似大家咁諗，呢一兩年就要走去英國、台灣乜乜乜。未有2019年之前，早喺2016年嘅時候，我已經決定40歲之前要去台灣

我比自己一個時間，大概四年後我就會離開。我依家唔想走，係因為仲有好多人喺香港努力緊，亦都有好多人喺香港受緊苦，呢班朋友嘅苦難通常係三年後會得到一個解決，如果三年後佢哋出返嚟，發現世界已經冇晒同路人，各組他方，個感覺一定好難受。

我唔想離開，只是掏空孕育我嘅土地，一走了之。以我有限嘅財力和能力，我諗我可以做到多啲嘢。

假如無災無難，四年後嘅我應該唔會太窮，離開香港之前，我會預定攞10,000,000出嚟系統化我而家做緊嘅事，我師傅Steven Tsoi和魏華星成日同我講Social Impact乜乜乜，講到我都有啲洗咗腦。睇吓我呢幾年投資表現如何，話唔定可以再多啲。反正我去台灣生活，都唔會洗到啲咩大錢。

形式係點唔重要，可能係一個信托，可能係一個初創加速器，可能係一間Venture。我會揀一啲我信任得過嘅人協助管理，包括為中大同學仔定期做嘅獎學金，當中大同學仔做啲文化嘢（係呀，最近新亞劇社有兩位同學仔問我攞錢想做話劇，我應承咗幫佢哋），以及幫一啲想創業嘅中大同學仔。

呢一個月比較觸動我係出席咗大學同學，港台DJ King Yim嘅一個喪禮，佢係一個好鍾意笑嘅好人，人緣極好，所有新生代嘅歌手音樂人都有送上最後一點心意，好好道別。我唔係好回憶得到同佢大學上堂嘅片段，因為我根本唔上堂，但係後尾喺大學出事嘅時候，我見到佢，當時各有各忙，簡單傾幾句就算。後來佢亦都搵我上佢嘅音樂節目，大家好輕鬆嘅音樂做晃子，講咗自己想講嘅嘢出嚟。

喺佢嘅告別式上面，聽到唔同人分享佢生活嘅點滴，有時都會感嘆好人真係走得早。既然上帝仲未要我落地獄，咁我就唯有盡量珍惜可以生存嘅日子，做吓啲自己想做嘅嘢。

還慶幸，做人雖然有時有啲囂張，但尚算剛柔並重，能夠謙虛嘅時候我會謙虛，如果性格太平凡，咁就冇辦法識到朋友。希望係香港呢四年，盡量好好生存，唔好死。

多謝盧覓雪、Hailey，還有神秘人朋友記得我生日，同我食咗今年唯一一個生日蛋糕。

差唔多啦，啲字數夠啦，係時候買廣告

想知多點金融投資，美股港股的學問，可以訂閱我《金融經濟精神食糧》

公開1000萬美股實戰倉操作，每日專業財金分析文章，每日金融財經Podcast，每週解答觀眾問題，100萬港股模擬倉投資部署，幫你補補腦

https://prime.fortuneinsight.com/web/muddydirtywater

每日金融Podcast、深度金融文章、外聘國際關係專家文章內容、特選國際刊物分析、每月閲讀企劃、平民化A I大數據分析和自己人群組互動，盡在Patreon:
https://www.patreon.com/muddywaterfinance

我最新營運的網上書商店試業中 - 渾水書齋
http://gmart.girlsmood.com/web/store/muddydirtywater/

對抗霸權，比自己一個更自由嘅選擇，立即加入Mewe一齊傾偈。

Muddy Water渾水財經Channel
https://mewe.com/p/%25E6%25B8%25BE%25E6%25B0%25B4%25E8%25B2%25A1%25E7%25B6%2593channel

渾水財經Channel x Fortune Insight 獨家眾籌出版《港斃。港完：國際金融中心崩壞史》率先網上預訂：https://muddywater.fortuneinsight.com/web/

你的支持，將會在香港金融史上烙下痕跡。

【對抗霸權】Mewe創作人互助計劃
https://mewe.com/p/%E6%B8%BE%E6%B0%B4%E8%B2%A1%E7%B6%93channel/show/5ffd7fee136ff678cbfd8190

請大家多啲分享，將我呢一個計劃推廣出去

女人一生，只為搵一個住私樓嘅男人（上）
　　
「你住邊㗎？」

我第一次喺交友Apps俾女仔問，我以為只係一個再普通不過嘅問題。

於是我好誠實咁答：「黃大仙。」

「係咪現崇山？我覺得嗰度好正㗎，又近地鐵站。」女仔講咗一個新樓盤嘅名。

我答：「唔係，我住黃大仙上邨，仲近地鐵站啊。」
　　

屏幕上突然彈出系統訊息：「此用戶已離開，無法傳送訊息。」

個女仔一言不發，就離開咗個Chat，我都唔知發生咩事。

但連續幾次，我講完自己住公屋之後，對方都會變得好冷淡，甚至馬上消失。
　　

我意識到問題所在，下一次再有女仔問我住邊，我就直情話自己住現崇山，唔止係私樓，重要係貴價豪華私樓。

自此之後，我認識女仔嘅過程都好順利。

冇幾耐，我就約咗一個叫詩詩嘅女仔出嚟，佢幾靚女，我對佢好有好感，佢對我都好熱情。
　　

我開始追詩詩，佢就提出，想去我屋企睇吓。

我梗係猶豫啦，因為我根本唔係住現崇山，係住黃大仙上邨。

我係做地產經紀嘅，咁啱呢個時候，我接到一個賣盤，有個客想將現崇山嘅單位賣出去。

我拎住鎖匙，靈機一觸。
　　

我先上個單位度睇吓，上一手租客留低嘅傢俬都幾齊全，我只係用咗幾百蚊，買啲床單被鋪水杯牙刷，就將間屋佈置到好似有人住邊咁。

再曬幾張我自己嘅生活照，擺埋喺櫃頂，fit晒。

然後，我好安心咁邀請詩詩上嚟。
　　

「嘩，呢度好大啊。」詩詩一入嚟，對眼就發晒光咁。

我好謙虛咁答：「唔算好大啫。」

「個景都好靚，嘩，嗰度係咪獅子山嚟？好神奇啊。」詩詩指住窗外個景驚叫。

獅子山好神奇咩？你平時行好多地方，都會見到獅子山㗎啦，你鍾意上山都得添。

但對住心儀嘅靚女，梗係唔可以咁講。
　　

「我希望，生命中最靚嘅景色，可以同你一齊分享。」我含情脈脈咁望住詩詩。

吻下來，豁出去。

嗰日之後，詩詩就成為咗我女朋友。

溝女可以好難，亦可以好簡單，只要你屋企望到獅子山。
　　

我同詩詩講，話我屋企人好少全部唔喺度，所以唔係成日帶到佢上屋企。

詩詩都好體諒我嘅難處，冇再要求上我屋企。

我估，佢都係想證實我係咪住現崇山啫。
　　

我哋嘅感情發展得非常穩定，詩詩經常表現出想同我長久發展，成家立室嘅願望。

唯一一個問題係，同詩詩拍拖，真係有少少貴。

佢好鍾意食嘢，專門食啲貴嘢，話咁先至「有Taste」。

而我作為一個男人，作為一個「住現崇山」嘅男人，冇可能要求AA制㗎嘛。
　　

咁搞法，我個個月入不敷支，必須要搵啲外快。

但錢呢啲嘢，唔係你想搵得多，就會搵到多啲。

我更加勤力，帶咗更多客去睇樓，但真係租樓買樓嘅客，都冇增加到。
　　

我同中學時嘅兄弟食飯，我就呻詩詩洗好多錢，搞到我入不敷支。

兄弟嘆氣：「你至少有女朋友。我去識女仔，個個聽到我住公屋，都走夾唔唞。」

「吓，你讀Law畢業㗎喎，未來嘅大律師，啲女都唔識貨？」我驚訝。

兄弟答：「你都識講係『未來』啦，依加咪又搵緊兩萬蚊，喺律師樓做緊奴隸……啲女話，我有排先買到樓，同我一齊冇將來啊！」

我手上，仲有好多條私樓甚至豪宅嘅鎖匙。
　　

我借咗一條畀佢。

冇幾耐，呢位兄弟就溝到女。

我赫然發現，我擁有嘅，唔係一層樓嘅鎖匙，而係通往女人心嘅鎖匙！
　　
下集：http://bit.ly/3tMGmcW
　　
Patreon訂閱即時睇下集，快人一步：https://www.patreon.com/tomato28
　　
#短故 #短篇 #小說 #陳美濤 #廣東話 #粵語 #tomatochan #女人一生只為搵一個住私樓嘅男人