當我第一次見到貴船流水涼麵嘅相，我第一個反應都同大家一樣：咁咪要食人口水尾！所以就算係搭緊車去之時，我都仲心驚膽跳，一路諗住要霸第一個位，等我益下人，食我口水尾，而唔係我食人口水尾！
不過去到你就明啦。原來佢基本上只係有五條水道，分別俾五組人食嘅，如果你六個人一組，咁就共用一條水度，兩個人都係用一條，所以佢每次只可以接待唔多過五組人或者唔多個15個人。咁即係話如果每一組都係得一個人，咁嗰一次佢只可以接待五個客，咁就解決咗食人口水尾嘅問題啦。
另外亦都有人擔心食唔切，其實出麵嘅速度唔算好快，除非你又掛住影相又掛住夾麵，如果唔係一般情形之下都應該夾得到，當然細佬仔就麻煩啲！
亦都有人問，乜唔使排隊咩！呢個真係攻略嘅問題嘞，我哋食完出嚟大概十二點半左右，就真係聽到啲人話要排到四點鐘至有得食！咁我係唔係一早去排隊呢？又唔係喎，我大概10點鐘出門口， 11點鬆啲就到，我個籌係13號， （真係好，啱啱我13號生日). 咁去到就見到有一批人食緊、一批人等緊，而我就係第三批，所以都係等咗30分鐘左右就有得食。
食嘅嘢真係好簡單，就係齋冷麵同埋三粒抹茶圓子，水都冇杯。不過前前後後都有十幾箸麵，一定唔會餓親，好多人仲食唔哂添。咁你一路食一路食直至最後會有細細一撮紅色嘅紫蘇麵出現，就係話俾你聽食完啦。咁就全部起身走人，進食時間大概30分鐘。
咁點去嘅呢。由京都站搭巴士去到出町柳駅前，過馬路去到叡山電車站上車，搭到去貴船口駅落車，跟住接駁小巴上山，去到小巴站再前行大概800米就到 （不過好多人一落車就跑）。 店名請留意照片(我唔識打日文)。放低¥1300，佢就會俾把扇你，上面寫住號數，跟住就行落下面川床等食。
你可以話山長水遠去食箸麵！人唔一定係為咗飢餓而進食，亦都唔係為咗口福而進食，有啲時候係食個環境同埋情趣。
報告完畢😝喜歡的請分享！
#何嘉麗callmegaga #何嘉麗 #為食路上 #出街玩 #日本 #京都 #貴船流水冷麵 #如何由京都站前往貴船流水涼麵 #川床 #食人口水尾 #交通 #地址 #價格 #謝主隆恩 #麻煩大家幫手分享因為冇俾錢Facebook佢唔會幫我廣傳
