《產後48小時》
懷上寶寶既一刻，媽媽既身體就要面臨翻天覆地既變化，歷盡艱辛誕下寶寶後，媽媽既身體唔係叮一聲就回復陀B前狀態，寶寶呱呱落地之後，媽媽既身體又要繼續經歷種種挑戰。
產房中，生左BB出黎之後，仲要確保整個 #胎盤完全娩出，因為只要仲有胎盤組織留係子宮，都有機會造成 #產後大出血🩸。呢個部分好似都係醫護人員埋頭苦幹，冇乜野需要我配合，我只係繼續張開腿，攤係度望住另一批醫護人員處理個BB，用個份愉悅感同滿足感去支撐疲乏既身體。佢地處理完呀仔，抱左過黎問我：「太太，呢個係你既BB，睇唔睇到係男仔定女仔？」然後又指比我睇呀仔pat pat有個胎記，磅完之後話我知BB 3.975 kg。
之後，就係聯返 #會陰傷口，其實都感覺到一針一針拮入啲肉度，都痛痛地，不過比起生B既痛，聯針既痛基本上都頂得住。處理完一大輪，佢地送走左BB。又留低我自己一個係產房，間中黎量下血壓，我估係睇下我有冇大出血掛。
兩個鐘頭之後，就預備推我去產後房。一離開產房，又見到老公喇！老公苦候左成晚都見到佢疲態盡現，確認我一切安好之後，終於可以安心返屋企休息。佢話姑娘推BB出黎時，有比佢望下。
生完BB後6-8個鐘要臥床休息，姑娘比左杯暖奶同梳打餅比我輕輕補足體力。我用電話同屋企人報完平安之後，就打算訓覺。冇幾耐，姑娘就抱BB過黎 #埋身餵奶，每次啜一個鐘，佢幫我個人打側訓，攝個枕頭係背脊，就將BB擺埋黎。呀仔都好肯張開口用力啜，我同姑娘講話BB啜得幾好，姑娘叫我唔好讚壞佢🤣。幾個鐘之後，我仍然訓到迷迷糊糊，姑娘又抱呀仔埋黎再啜過。
8個鐘後，姑娘過黎，問左我有冇頭暈，就扶我落床，用輪椅推我去廁所，產後第一次小便成功，yeah!!! 佢細心教我用去完廁所用沖洗瓶清潔、用產婦衛生巾抹乾、再用輪椅推我返床度。 #小便、 #放屁、 #大便 呢啲咁基本既事對於產婦都係挑戰，感恩我全部係醫院完成到。另外，會陰傷口都仲痛，坐又痛、行又痛，最舒服既姿勢係攤係度，頭兩日都要食 #止痛藥。
確認我情況良好，佢地就推呀仔過黎預備比我換片餵奶，我都未黎得切望清楚佢，就話佢發燒，要送去 #兒科。因為 #疫情 關係，所以每位仍然住院既媽媽每日得一次探病時間，爸爸冇得探，媽媽如果早過BB出院都唔可以再返去探😔
送走左呀仔，好快就有人黎教我用手 #擠奶，一開始用針筒採集到1 ml、3 ml，有7 ml時已經覺得自己有啲叻。每三個鐘就有姑娘過黎提我擠奶，不分晝夜，第三日有10 ml，終於有一啖比呀仔可以吞落肚，太感動！巧兒出世都有住院，見到佢幾日人仔，就要打豆、打抗生素真係忍唔住流眼淚，今次細佬都要打 #抗生素，係有少少肉赤，不過冇太擔心，都冇流眼淚，相信醫護人員會好好照顧佢，我可以專心休息，再以更好既狀態照顧佢。係醫院期間，主要都係訓覺、食野、擠奶，後期精神好啲就可以同隔離床既媽媽傾下計。
出院又係另一個故事既開始，下期預告：《坐月日與夜》
————————————
👍🏻讚好Facebook專頁 www.facebook.com/daniellemamaedu 家庭教育、親子活動、有趣玩意、懷孕點滴
💡其他好文回顧💡
《疫情下聯合醫院生產記》
https://www.facebook.com/111805923718473/posts/259721718926892/?d=n
《巧生活—戒奶咀》bit.ly/byebyedummy
《巧巧成長—Trouble 2 變Lovely 2》bit.ly/trouble2lovely2
《巧巧成長—教出充滿安全感的孩子》bit.ly/nurturesecurity
