關於 嶠媽行山記 ，我們在網路上蒐集到這些相關的討論、資訊與評價

又出行山post啦！不過呢個唔係近期行，係10月嗰陣行嘅！嗰次係第一次約埋好朋友，齊齊放低仔女去行山🙊而嶠媽今次係介紹嘅係「香港最南端 - 蒲台島」，不過要去蒲台島，都只能假日去，因為去蒲台島嘅街渡只有假日嘅船次先比較多，所以我哋揀咗星期日去，我記得我哋係喺赤柱卜公碼頭，搭10點船，但估唔到嘅係，超多人，我哋搭嗰架船都算大，但係係坐爆哂人🤭

船程大概30分鐘，接近落船就已經睇到蒲台島成個島，真係好靚！我哋去嗰日仲要超好天氣😍之前上網睇佢係有六個站要去，而我哋就去咗五個站，最後一站就去咗食餐蛋麵😝我哋嘅六個站：蒲台碼頭👉🏼牛湖頂觀日亭👉🏼僧人石、靈龜石👉🏼南角咀126燈塔、淘金崖👉🏼佛手岩👉🏼阿婆紫菜餐蛋麵。

⭐️全程都唔算難行，係有啲位置有少少吃力，不過我哋都算新手，都行到所以ok嘅！不過暴曬指數好高，大家一定一定要準備防曬用品，中途記住要補防曬呀❤️而南角咀126燈塔係打卡熱點，不過都幾難排到影相，我哋係去到等咗15分鐘，啲人食完嘢走人，我哋先霸到位影幾張相！個人建議，唔好坐咁耐，因為個個都好想係呢個位影相打卡。

而最後嗰個阿婆紫菜餐蛋麵 (耀記士多)，真係超好食😋不過全長得4公里，行完再食碗麵，好邪惡🙊不過就一定要試，食完再買多包「海苔」返屋企，好似$10包，返屋企煮公仔麵加埋落去一流，而且無沙喺入面㗎😋

🚌點去蒲台島🚌
我哋係喺赤柱卜公碼頭搭街渡入去，留意返假日嘅船期比較多，船程只需30分鐘。
✨至於帶唔帶小朋友行，要考慮小朋友嘅情況，人人不同，建議攜帶6歲以上小朋友。
‼️碼頭附近有小食店，可以補給‼️

難度：3.5 ⭐️ (5⭐️為最高)
長度：約4公里
時間：2.5小時 (因應個人速度唔同都會唔同)

Follow my IG👉🏼https://www.instagram.com/kiumapatpat/

#行山記錄 #蒲台島 #中線行山路線 #嶠媽行山記

呢兩日又凍咗！凍到我喺屋企都想卷係被窩😂冇嘢做就出下行山介紹啦！我哋係11月1號去行，點解咁深刻，因為係嶠爸生日前一日，上年生日我哋快閃台北，今年留港都一樣有慶祝活動🪅！一於約埋兩位好友，齊齊拋低細路，踏上鳳凰山之路⛰

我記得嗰日我哋約9點係東涌等💤以為自己好早？錯哂！因為去到東涌已經超級多人👀等車嗰條隊嚇死人🙈雖然人多，不過車嘅班次都相對密咗，而我哋就喺「伯公坳」落車，都好多人落車，朋友話原來上大東山都係同一站落車，對面就係上大東山。去到起點位就有幾個流動廁所，大家可以去一去先上山。

我哋行山停下休息下，見到靚景又影影影📸️中間我都有停下食蛋，飲水，食能量糖！我朋友仲話點解我可以係咁食嘢！佢話行到冇胃口食😝上山都好攰，有樓梯，有斜路，有平路，腳攰就休息。沿路又唔算好多人，反而見到好多人跑山😍幾經辛苦，我哋成功登頂！我想話登頂後先最多人，因為有人排隊喺打卡位影相，都有人坐低休息食下嘢，所以聚集咗一堆人。

我哋梗係唔會錯過打卡位嗰塊寫住「鳳凰山934m」嘅牌啦！我仲預備咗個「雪芳蛋糕」插住38嘅生日蠟燭，送比嶠爸嘅生日禮物，陪佢登上香港第二高嘅山，希望佢永遠都記得呢一日，因為我唔知下次仲會唔會再有登上鳳凰山嘅勇氣😩

我哋食下蛋糕，飲下水，回氣後，就開始落山啦！我哋係伯公坳上山，落山我哋就揀咗昂坪，因為落山會快啲！而惡夢就由呢到開始⋯原來昂坪落快嘅原因係佢勁多樓梯，而且啲樓梯好直，左右仲要係冇扶手，我一路落個心一路震，好怕一叉錯腳，就會飛落山，好彩冇！因為每行一步都勁小心！

提提大家，行鳳凰山一定要帶行山杖，因為落山佢幫到你😔而且因為落得太多梯級，我對腳個波羅蓋位好痛，我要左右腳換下上落次序，先可以舒緩痛楚🥺我哋一路落都見到好多人上山，不過聽到嘅係個個都叫辛苦，咁又係，上樓梯，不停上都真係好攰！最後我哋都成功落山，我真心要為自己鼓掌👏🏼「媽！我得咗啦！」我成功登上鳳凰山，又成功落到山✌🏼。落山第一時間跑去食咗碗餐蛋麵😆

💡除咗頭先講嘅行山杖，大家仲要帶夠水同食物。我同嶠爸一人帶咗1.5L水，食物就帶兩個雪芳蛋糕，兩隻雞蛋，一條朱古力餅，能量糖。
❌中途係無補給站❌

🚌點去鳳凰山🚌
東涌地鐵站近B出口乘3M、11或23號巴士在「伯公坳」站下車，回程係昂坪搭巴士/纜車返東涌。

難度：4.5 ⭐️
長度：5K
時間：5小時 (因應個人速度唔同都會唔同)

#行山記錄 #鳳凰山 #香港第二高的山峰 #媽我成功登頂啦 #中級行山路線 #嶠媽行山記