我在大台短暫的日子
六，PA難忘事
近排大熱肯定係ViuTV嘅Error自肥企画，呢個熱潮唔只捧紅咗193、Dee哥、保錡同肥仔，就連幕後如Mike導、編劇暉、Agent L（本身係導演）成個無制限ot編集団都紅埋。見到大家終於關注到電視台幕後工作人員，尤其係製作組嘅創意同辛勞，係幾滾動。
入正題，上幾篇文講咗PA嘅職責，今回分享幾件PA難忘事。因為我經歷短，可能一啲其他同行感到習以為常嘅事，我反而會有幾深嘅印象。
第一個我諗起嘅係拍攝時某一場戲。嗰場戲係一段老人家嘅Flashback，畫面呈現佢以前後生時坐咗多年監，一直坐到老年。呢場戲係廠拍，我地搭咗個囚室景，兩位女演員分別係羅蘭姐同埋姚子羚，我地製作組要諗嘅係：究竟點拍先至可以最直接而有趣味咁交代到子羚一坐就坐到老，變成說故事嘅羅蘭姐呢？我地組嘅導演無諗住求其兩個鏡頭dissolve交代就算。佢一開始就做咗個判斷，決定用一鏡直落拍攝呢個角色嘅老去，亦即係要一個鏡頭出現兩位演員飾演同一角色。決定之後，導演就花時間，花心思諗點樣喺無budget下，利用鏡頭，加埋角色借位、道具幫手等等拍到一個一鏡換人嘅畫面。無記錯嘅話，最後係子羚喺囚室望住窗外，鏡頭跟子羚視綫移動，然後趁畫面見唔到時演員迅速走位，換入羅蘭姐。因為呢個角色臉上有條大疤痕，鏡頭返黎時影住羅蘭姐臉上嘅化妝疤痕，向觀眾明確提示兩位演員為同一角色。雖然呢場戲係設計並非真係好複雜好特別，不過我一向都覺得拍戲唔係要炫技，而係點善用鏡頭有效地說故事。我覺得導演呢個設計係提升咗成場戲，雖然只係短短十秒嘅過場，但係佢有諗法，無交行貨，我欣賞。
同樣，有啲演員都好畀心機。羅蘭姐演技好大家都知，但有幸喺現場睇過佢拍戲，會更加感受到佢有幾厲害。佢拍戲好快就醞釀到情緒，拍攝時嘅能量收放自如。大台電視劇嘅劇本水平一向都水水地，但佢即使喺呢種水平嘅劇本都可以交出上佳演出。仲記得有場羅蘭姐嘅喊戲，我地全廠人（工作人員加埋都有十幾人）都睇到入晒戲靜晒，Cut咗之後停咗幾秒先有人開聲，大家都讚不絕口。
第二件我好難忘嘅事係關於一件道具炮仗。場戲係講幾十年前，有個少年得罪壞人，結果佢喺間大屋前畀人綁住成抽炮仗恐嚇佢。我地事前就落咗單畀道具組，要求整道具炮仗。可能係因為我地寫單時又無好認真諗過炮仗應該係點嘅樣，道具組製作中途我地有睇過一次都唔覺有咩問題。直到拍攝日我地收埋貨，跟車去到外景現場，導演一睇見件道具，我地先見到出事。導演嗰刻係我見過佢最爆嘅一次，佢嘅怒火係大到震撼到我以為大埔外景場地有火山爆發。原來導演本來諗住當個壞人綁住個少年時，會塞其中一枝落佢個口到嚇佢，所以想要嘅係大大碌嘅炮仗，廁紙筒尺寸。但係，道具組係用咗新年掛喺揮春隔離嘅炮仗裝飾黎加工。而家抽野全部都係蠟筆Size，小朋友玩泥沙咁。導演嬲到反問我地要點L樣拍，然後返咗上車話收工唔拍。結果擾攘咗一陣，大家工作人員先夾手夾腳氹返導演，用嗰抽野拍完場戲。
最後，數到難忘事，不得不提全個拍攝最辛苦嘅一場戲，亦都係較大陣仗嘅一場。嗰場戲背景係四五十年代一個深夜嘅夜總會門口，壞人爽完出黎時同警察發生一場槍戰, 呢個單元嘅男女主角，仲有好多配角等都喺現場。嗰場我地喺場地拍（即係大台入面嘅外景），拍咗一個通宵。場戲係幾十年前，準備上已經要花多好多時間，包括要搵老爺車，道具又要嗰個年代嘅道具；而且因為係槍戰，有角色中槍，所以動作導演、爆破組嘅同事都在場。我地好似係22:00定23:00先開始拍，首先要拍晒啲非動作場口先。因為天氣炎熱同埋有幾陣驟雨，進度一直都落後咗。然後到最大陣仗嗰場槍戰，我地大約係25:00先準備同現場再排que位，車喺咩位、角色喺咩位、邊個開槍先，邊度中彈等等十九幾萬樣野, 到27:00先開機拍，但我地又要趕喺天光之前搞掂晒，而且無論係車定人，都唔可以NG，因為車會中彈爆玻璃（我地用啲糖漿之類嘅物體做效果會）、人中彈衫會染紅等。喺咁大壓力下，大家都史無前例咁緊張。每一秒嘅時間過得好似好快咁，但同時間每一秒嘅辛勞又令我覺得度日如年。有野做嗰時反而還好，充實啲；最辛苦係有時候可能其他工作人員要時間準備，我地只可以喺旁邊等。天氣又熱大家又攰，偏偏就乜都做唔到，睇住時間過，嗰種焦慮同疲乏係好蝦人。結果，我地竟然成功趕係天光前完成拍攝，成場戲都無乜出錯。我對成套劇嘅拍攝都無乜滿足感，唯獨呢場戲有，因為真係見到全組人好用心咁完成一件事，雖然可到黎大家可能都仲係覺得好水皮，但係，喺好多環境因素局限下，嗰場戲我認為已經好成功。
以上都係一啲我而家仲記得當時感受同情緒嘅時刻。除此之外，話晒入大台先有機會見到好多演員，都有好多難忘嘅印象可以同大家分享。下回就講我遇過同合作過嘅演員。
利申：以上都係好個人、好片面、好短暫，而且歷史久遠嘅經歷，並不代表所有PA嘅立場。
（圖片為n年前同影后嘅合照，配上而家好流行嘅打格仔。）
