［HKTV市值超過TVB嘅啟示］一個字：塞翁失馬，感謝不娶之恩
1. 嗯，呢篇應該會幾多人噓或者鬧。因為你會覺得課不對辦。雖然我講明非關金融。但，理得你丫。大不了刪post．莫非我在自己地頭出個純係自己過癮嘅post都唔得？你係月費訂戶就另計。杜汶澤同容祖兒定林欣彤話齋（拍戲啫）：你去唱K就你畀錢去唱歌，上紅館就人地畀錢聽你唱，兩者實在太大分別了
2. 一向少寫政治，今篇都唔例外，當然終極塔利班堅持乜撚都係政治嘅請便。
3. 跟紅頂白更加唔係我作風。買股票就得（都未必得），但寫文一般都唔會。最好就Show Me a Hero and I'll Write You a Tragedy。人人捧嘅我講下衰嘢，人人踩唔掂嘅我又讚下。Contrarian 嘛。
4. 又或者係，唔知邊個教我，人地結婚其實可以唔去，喜氣洋洋錦上添花多你一個唔多，但人地喪禮，特別係啲意外死咗至親嘅，必定要去，雪中送炭。Contrarian 嘛
5. 不過Contrarian 嘅問題，你諗一諗都知，好易會淪為 為Contrarian 而Contrarian，包拗頸。我當然都有呢個問題，但亦時刻警剔
6. 所以呢篇唔係一篇抽王維基水，或拉佢落神壇嘅文。要嘅其實好多，由佢選亞姐品評人地對波（是真的），到佢支持填海（又係真的）支持縮郊野公園（又係真的）做政協（真喎）助選團畀最低工資，大把可以講。
7. 之所講王維基，因為佢真係，算係我偶像（諗唔到個更好嘅字）。睇圖，你買過呢本書先好話係fans
8. 佢先代表到我心目中嘅香港精神。唔好誤會，唔係咩反共（政協喎大佬）良心君子。而係，佢就係右翼商人（自由黨喎），挑戰行內龍頭 — 而我梗係唔係講TVB啦，歷史由你開始咩
9. 唔知嘅，可以睇返佢點發跡。由開補習社，到在台灣運平價教科書（水貨？），到CTI，香港寬頻，完全就係香港嘅Richard Branson。亦都實不相瞞，我唯一一次嘅「政治集會」，就係當年佢申請電視牌。但從來冇變嘅，就係佢係右翼商人。見佢批股cap水咁快手就知啦
10. 我同偶像有一面之緣，佢做緊電訊時，請人。咁我講過我2001年返香港雙失時期，咩工都見。偶像公司請人喎，梗係飛去。人工，你估下幾錢？8000大元。你冇睇錯。右翼商人嘛。當年好似仲未有最低工資，嘻。但我照樣去見，咁除咗係因為仰慕佢之外，主要都係冇得撈，8000 好過冇（雖然，我當年幫人補習好似都有咁嘅收入）。同埋阿爺教我做人唔好怕蝕底。
11. 結果，就當然冇請我啦。但由於請嘅係類似MT咁嘅東西，所以王維基係親自己見。咁王維基一年唔知見幾多個人，但對我嚟講，好威架！真係握完手，「一股暖流傳遍全身」嗰種（＊）。
12. 又話說，當日我等呀王維基，等咗九個字左右。貴人事忙嘛。結果我拎部Palm（時為2001）出嚟打麻雀，好似打到訓著，佢入嚟我先忽然醒。然後佢指住我部嘢，問我覺得呢舊嘢有冇前途。當時我都支吾以對
13. 結果就係冇請我，否則就冇後來嘅故事。如果佢請咗我，我幾肯定我唔會後來去咗教書。然後會唔會去做金融？可能都唔會。是禍是福，點知呢？人生唔係一條直線。
14. 我想講嘅係，完全唔關事，但枱嘅對面（其實係冇枱嘅，文學加工啫），王維基一樣係咁。不過王維基深烤改變咗我命運，而梁振英就改變咗王維基嘅命運。
15. 你在橋上看風景，看風景的人在樓上看你。 明月裝飾了你的窗子，你裝飾了別人的夢。
16. 莊子時間啦。好定差？Both sides Now，睇你點睇。當年我仲係蕃薯一舊，當然唔會狂妄到覺得偶像走寶，但冇被偶像選中，當然會唔開心，唔通好撚開心？同樣地，當年爭唔到個電視牌，人人替王維基不值。
17. 但，我就唔好講啦，講王維基。好簡單，你估佢而家如果拎到個電視牌，會係點呢？會唔會係泥漿摔角緊？我諗會。
18. 相反，正係因為佢搞唔到電視，先去轉搞而家嘅HKTV Mall，先有今日市值大過TVB嘅佳話
19. 當然，就我理解，王維基雖然唔係去到富豪級，但亦一早過咗為口奔馳Benz for the mouth嘅境界。都話香港 Richard Branson，最緊要過癮，最好就貢獻到下社會。市值大唔大過TVB，對佢未必重要。
20. 而到底佢夢想係搞電視，定係搞網購，定兩者皆否，定兩者皆事？你可以問佢。但我傾向覺得佢其實冇乜所謂。佢就只係見到過癮，有嘢可以革新，就走入去。都話， Richard Branson咯。咁 Richard Branson係咪特別鍾意唱片？定特別鍾意火車？飛機？可樂？可能全部係，亦可能全部都唔係。呢種精神，就同林振強見到香港廣告業不濟，覺得「挑，咁老土，等我啦！」差不多（http://bit.ly/38jd3Vh）
21. 所以都係好老土嘅一句，只要不死就是活著。人生唔係一條直線，今日委屈，可能係第時成功嘅轉機呢，即使當初嗰條友係擺明害你，都可能係幫咗你架。世事就係咁荒謬。唔信？存心幫你變咗害你嘅，你見好多啦。咁所以掉轉又why not
22. 呢篇文充滿正能量，真係完全唔似埃汾所寫。但，老早講過我係個悲觀嘅樂觀者，好友底。唔多唔少（當然唔係完全）都受王維基影響。
23. 呀，張相，真係我嘅書。而唔係書櫃，書櫃有幾個，已滿到爆。我發毒誓唔係特登砌呢堆書出嚟，咁當然我都有望過有冇啲唔出得街嘅書（例如李麗珍水城寫真集，貴重財物要好秘密，況且一頁頁痴實晒，好易整爛）。咁當然，卓韻芝都係出得街嘅。關愚謙陳冠中蔡子強之類更好。但賣飛弗，係蔡子強下面，上書局上面嗰本。
（＊）類似嘅經歷，去到後來我同Race Wong 做同事先再出現。係呀，嗰個Race Wong，2R唔係洛賓列貝利。個人Facebook講過幾次呢個故事，但為免畀人覺得我博宣傳就唔在呢度講。不過，其實你真係歌迷嘅，就知道Race Wong在耆英證券打過工啦。你唔知，你唔係真fans咯（混吉邏輯又嚟了）。
彩蛋：你有冇發現蔡子強下面壓住嘅，就係Race Wong呢。我發毒誓原本就係咁擺的。又，唔係寫真集嚟的，係散文嚟的。拿，Fans呀，似你地咁膚淺架咩。
