【《#今際之國的有楢》外傳－－《彌留之路的愛麗絲》：畫風更強但已唔係果回事】
寫過劇、寫過歌、寫過書、寫過game，好喇，我已寫無可寫，不如寫埋漫畫。
實在太鍾意《今際之國的有楢》，唔單止搵曬佢本傳外傳，加埋暫時仲未知佢想點嘅續集《Retry》，再睇埋另一外傳《彌留之路的愛麗絲》，香港如果要譯返，係咪應該叫做《今際之路的亞里朱》？我搵唔到香港譯名。呢個外傳唔同「本傳嘅外傳」，同有楢個遊戲同時間發生做個Universe，而係同本傳關係不大嘅外傳，只係有個角色同本傳某角有關係，拉扯咗個故事出嚟。雖然，果段關係都有少少重要。
一如「今際之國」，「今際之路」都係有班人無啦啦去咗個異世界，喺冇曬記憶下，要玩場生存遊戲，過程中又發現到人性陰暗面。有別於「今際之國」，「今際之路」並唔係玩果種遊戲，而係拎咗「今際之國」世界觀延伸，講東京23區以外發生嘅事，點解佢班人可以去到23區以外，出面嘅世界又係點？如果唔玩「今際之國」嘅遊戲，佢哋做咩？背後又有咩秘密？劇情同樣涉及人性極端陰暗面，可以話比「今際之國」更Dark更絕望，反而最後拉到嘅生存意義，同「今際之國」係另一個層次，個人覺得幾感動嘅。
網上評價話外傳太無聊，講真對比「今際之國」嘅本傳，有遊戲、有完整脈絡、人物關係更強，呢套純粹世界觀嘅延伸，搵個理由要班角色入個世界，再有少少牽強咁俾個「真相」佢，係有啲無謂。個人覺得佢變成咗另一種玩法，當另一個故事咁睇，都有佢嘅追看性。尤其是，點解套嘢由「國」變咗「路」？
全因主角們要由京都沿住新幹線一路殺到上東京，每個大站都有事發生，甚至連著名景點都插到落故事。如果你去得多日本，好似睇住旅遊雜誌咁，逐個大城市同景點都有相應劇情，幾投入嘅係。正正因為劇情都如「今際之國」咁，四周變咗末日，睇住熟識景點變成一片火海、一片荒漠，畫風比「今際之國」更細緻，充滿幕幕奇觀，大場面都比「今際之國」更震撼。因為劇情相對較簡單，唔駛去玩遊戲，都令動作場面大增，喺末日廢墟追逐戰同槍戰，當然都有局中有局設定，確又幾好睇。睇睇吓我幻想，如果套漫畫變成電影－－電影啦，以呢個故事，劇集難少少，應該係套超級大製作。
當然，抱住「今際之國」種心態睇，係有少少失望，又或者咁講啦，應該係style完全唔同，當做懸疑漫畫都唔錯嘅。喺冇得去旅行嘅時候，你睇佢帶你由京都玩到上東京，仲好仔細畫曬JR站出嚟，果啲景點同城市堅懷念呀。
《今際之國的有楢》劇集觀後感可看留言連結。
‼️第7屆晞。觀影記事讀者電影投選現已接受提名，請躍躍參加啦：http://bit.ly/38HwhoQ
📣即訂Patreon加強版，閱讀更多精選深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
