21.9.2016 @ 蘋果日報
龔嘉欣反串兄弟 百人祝福
陳智燊宋熙年 英國爆喊完婚
恭喜恭喜！現年38歲的陳智燊（Jason）和31歲的宋熙年（Sarah）前日在英國拉埋天窗，邀百親友出席，高海寧、李亞男及陳爽等擔任姊妹，龔嘉欣反串與楊明一齊做兄弟！一對新人宣讀誓詞一刻，宋熙年最先忍不住爆喊，感動全場親友。二人昨開心宣佈：「我們結婚了！多謝大家祝福！」
無綫小生陳智燊與華姐出身的宋熙年於07年開始傳緋聞，前年才承認戀情，二人早前在香港入紙排期結婚，計劃年底分別於英國、澳洲及香港三地舉行婚宴。不過昨日突然爆出，兩人已於英國時間19日下午1時半（即香港時間前晚8時半），在倫敦近郊的Buxted Park Hotel完婚，宋熙年前日在Instagram貼相並寫上「BRIDE」新娘的字，洩露婚訊。
據悉一對新人包下整間酒店邀請近百親友參加婚宴，高海寧、李亞男及陳爽擔任姊妹，還有宋熙年的胞妹陪嫁；而龔嘉欣則反串扮男仔與楊明一齊做兄弟，陳爽的囝囝梁梓熙做花童，黃浩和徐淑敏亦專誠飛到當地。
順道Honeymoon
宋熙年前日身穿deep V白色婚紗，與陳智燊的白馬王子look均甚具英倫風格，但他們仍有依足中國傳統，着上中式裙褂，更安排胞妹撐紅傘，兩人臉上流露出幸福的笑容。據了解，婚宴場地擺滿好多Love字牌及結婚相，當新娘宣讀誓言，講到「愛你一生一世」已經喊到說不出話，陳智燊亦見狀一齊喊，又伸手幫太太抹眼淚，一班賓客高海寧、龔嘉欣、陳爽，甚至黃浩和楊明等都齊齊落淚，場面既溫馨又甜蜜。
陳智燊與宋熙年昨開心報喜：「我們結婚了！好開心我哋旅途上有大家嘅陪伴同愛護。多謝大家祝福，我哋Honeymoon完返嚟，同大家慢慢分享！」一對新人昨接受《東張西望》電話訪問，陳智燊說：「今次揀英國郊區，有個大草園好靚，成個婚禮好perfect。」問新娘是否要老公過五關斬六將？宋熙年說：「梗係要！玩遊戲前已吩咐姊妹要高難度，要講愛妻宣言，佢講咗兩次。」陳智燊解釋：「佢要求高到不得了，我好有愛心咁讀出嚟，佢又嫌我慢，我快啲又講唔到，最後講兩、三次先收貨。」
開門利是闊綽
由於一對新人要求眾親友保密，有份出席的龔嘉欣和楊明起初都三緘其口，日前在機場被撞破入閘，龔嘉欣還含糊其詞說要去馬拉登台，還拋下一句：「唔好話我哋度蜜月，唔好亂寫呀！」被誤會向楊明女友莊思明『挑機』，龔嘉欣昨透過短訊回覆：「當日見成班記者喺機場以為穿煲，咪諗住用一個搞笑方式扯開話題。」她大讚一對新人是perfect couple，問為何會反串做兄弟？她說：「Jason係我拍《誰家灶頭無煙火》做兄妹，Sarah就由一入行識到𠵱家，好開心佢哋邀請我呢個阿妹見證佢哋嘅幸福時刻。」
穿上銀光閃閃裙做姊妹的高海寧就大讚Jason的開門利是出手闊綽，她說：「我哋話加碼，佢都好大方畀咗，所以佢應該好心急娶Sarah過門。」陳爽則說：「婚禮過程好感動，尤其係Sarah march in嘅時候，所有姊妹都有喊。」
