關於 愛情長跑啲friend愛情長文 ，我們在網路上蒐集到這些相關的討論、資訊與評價

#超長文警號 【《金都》： 用一個象徵結婚的地方，講述婚姻與愛情的無奈嗟歎，絕對是最悲傷現實嘅諷刺 】

-以下內容含電影《金都》劇透，請自行斟酌閱讀。-🙆🏻‍♂️🙆🏻‍♀️

鄧麗欣唔再係啊寶，喺《金都》入面，佢係一個一直逃避自己人生，冇乜理想，冇乜目標，喺朋友婚紗鋪到打工嘅張莉芳。30幾歲嘅佢，有個做婚宴攝影老闆嘅男朋友Edward，身邊嘅朋友覺得Edward係佢嘅王子，兩個人拍拖又同居左一段咁長時間，大家都覺得下一步理所當然係結婚生仔，而Edward亦喺呢個時候求咗婚，就咁睇嚟，好似都好符合世俗期望，完成咗人生checklist上面，一個所謂非常重要嘅task。而事實上，莉芳其實對於呢個對象，呢段關係，呢段婚姻，怎至自己內心，都非常懷疑⋯⋯而張莉芳呢一個看似平凡的小品故事，就正正恰如其分地，道出一個個令人無奈的愛情現實：

1.「 所謂嘅世俗眼光，摧毀咗好多愛情。」
明知錯都要走落去，對自己同對方一樣殘忍
.
明明愛情應該係屬於兩個人，明明個人生係你自己嘅，
但係偏偏好似全個世界都要介入。
個世界話你知女人過咗30歲就開始跌Watt；
屋企話你知結婚唔只係兩個人嘅事；
朋友同學同事話你知佢哋好彩趕得切Meet到30歲前結婚嘅死線；

世俗話你知，人生就係要聽話，打份牛工，儲錢，買樓，結婚，生仔，好辛苦咁搵錢養大個仔，然後睇住佢佢又再跌入呢個輪迴地獄；

世俗話女人始終要有個依靠，
有個男人喺身邊始終比較有安全感；
世俗話男人始終要成家立室，個女人跟咗你咁耐，都要俾番個名份人；

世俗迫你要計劃，所以你冒險就係唔理智。
然後，半推半就，你明明有好多懷疑，明明對象未必真係咁啱自己，但係你選擇將就；
將就唔同遷就，你愛對方重視對方，
會同佢互相磨合就係遷就，
將就，其實衰啲講好似就係⋯⋯是但啦～對方對自己都幾好，又拍咗咁多年⋯⋯

世俗係一個好大嘅陰影，會擋住你視線，一直喺陰影下面行，點都唔到見到陽光，
與其要活係陰影之下，點解唔勇敢啲問下你自己，到底想行一段點嘅路，想要一段點樣嘅愛情？

怕人哋指指點點，問長問短？
你以為其他人真係好care你嘅人生咩，傻啦～
可能你會成為茶餘飯後嘅話題5分鐘到啦，
但係相比起你想要嘅愛情同人生，呢5分鐘，重要咩？

怕唔符合父母期望？
父母的確有好多種，有啲可能真係會令你好大壓力，但我相信真心愛你嘅父母，始終都只係想你幸福快樂，無理由想見到你要將將就就咁過一世。

唔好俾所謂嘅世俗眼光，殺死你嘅愛情。
為咗符合俗世，明知錯都要走落去，
對自己同對方都一樣咁殘忍；
你同另一半嘅幸福，只需要由你哋兩個做決定就夠好了。

2.「 結咗婚無自由，咁唔結婚你又覺得好自由咩？」真正嘅自由，係要對自己嘅決定負責
.
《金都》入面嘅張莉芳其實係一個唔係太了解自己嘅人物設定；
對於人生無咩大嘅理想同諗法，
但係又感覺好被受壓迫，
唯有一直逃避，由細個逃避屋企，到大個逃避婚姻，但係好似無論點樣逃走，都得唔到自由。

張莉芳其實可能係好多人嘅寫照。
我哋好多時覺得自己被困，
覺得好多嘢都係被迫，
覺得自己根本無得選擇，
但係事實可能係，
你唔理解你自己想要嘅自由喺咩一回事。

張莉芳唔想自己以後一世都要困住喺金都，
所以佢覺得結婚就係無自由嘅源頭，
事實係佢從來無為自己做過任何決定，
真正嘅自由，係要先清楚自己，
為自己做決定，然後對你做嘅決定負責。

婚姻同自由本身其實無直接關係，如果選擇結婚，建立家庭，想生小朋友，係你同另一半真心為自己做嘅決定，咁又點會係令你失去自由嘅原因呢？

其實，結唔結婚，
對張莉芳嚟講，佢一樣係唔自由。
因為困住佢嘅，唔係段關係，反而係佢自己。
你呢？你嘅自由又係咩？

3.「一齊咁耐點解你都唔明白我？」
我哋只顧期望另一半可以抽絲剝繭咁了解自己
忘記咗自己喺段關係入面都有需要坦誠嘅責任
.
張莉芳同Edward最後大鬧一場，爆出一大堆不滿，覺得未婚夫係控制狂加裙腳，
張莉芳覺得自己不斷妥協讓步，
Edward到嗰一刻先知原來對方對自己有咁多不滿，但係佢從來都無喺張莉芳口中聽過佢表達自己，最後兩個情緒失控收場；

我哋好多時都會希望另一半可以真正了解同明白自己，但係我哋都唔可以一味期望對方係一個detector，每一個你心裏面嘅諗法，
佢都可以喺你完全無表示過任何嘢之下，
就完全detect得曬。

一段關係係需要真誠嘅溝通，
如果日積月累唔向對方表達內心嘅真正諗法，
有不滿或者感覺委屈嘅事又唔嘗試攤出嚟講，
只係希望對方抽絲剝繭，
然後期望對方可以有一日一覺醒來，
就突然成為咗你肚入面條蟲，實在有啲困難。

無人天生有讀心超能力，「你趷起條尾就知你諗啲乜」，都要經歷過相處同觀察，
一次又一次解讀錯誤之後，
再一次又一次修正再磨合先做得到；
千祈唔好一句：我哋一齊咗咁耐你都唔知我諗乜，就騎劫咗對方為段關係付出嘅努力。

我哋會因為覺得點解對方唔了解、唔明白自己而失望，對方亦同樣會因為我哋乜都收收埋埋而覺得不被信任。

4. 「控制狂唔係因為太愛，只係因為怕無咗對方之後，自己嘅生活唔知會變成點」

戲入面Edward係一個佔有慾同埋控制慾非常強嘅人，佢做嘅每樣嘢講出嚟都好似係出於緊張同埋好愛女主角咁，而女主角張莉芳對呢段婚姻嘅其中一個懷疑，
正正就係源於佢嘅控制慾；

好多時我哋好愛一個人，
都會唔小心咁想對方跟隨自己嗰一套去做，
我哋會覺得咁樣係為對方好，
係關心對方重視對方，
而會咁緊張亦都只係因為好愛對方，咁樣有錯咩？

好愛一個人，想對方好，當然冇錯啦，
但係點樣先至係為一個人好，
絕對唔應該交俾由另一個人去決定；

愛一個人應該盡可能信任對方，
給予對方應有嘅自由；
兩個人無論幾親密，
都要記住我哋係一個獨立嘅個體，
我哋需要自己嘅空間，有自己嘅諗法，有自己嘅選擇。我哋可以選擇給予支持，可以選擇俾意見，可以選擇唔同意對方，但係絕對唔係強迫佢做任何決定。

真正愛一個人，你唔會希望佢成為你操縱之下嘅一個傀儡，因為當佢活係你嘅操縱之下，就已經唔係最初你愛嘅嗰個佢；

一心要控制對方，
只係想對方可以跟你嘅諗法去做，
一旦佢唔跟你諗好嘅方向去行，
你就會覺得好不安，
咁樣，根本唔係愛對方，
你只係需要對方一直留喺你身邊，
你只係習慣咗對方喺你生命嘅存在，
你怕如果你失去咗佢，你嘅生活，你嘅人生，
唔知會變成點，所以你先會想完全控制佢。
咁樣嘅你，愛嘅唔係對方，而係你自己。

《金都》用一個象徵結婚嘅地方，講述婚姻同愛情嘅無奈嗟歎，絕對係最悲傷現實嘅諷刺；
現實世界嘅愛情，唔可能一直都係童話故事mode，現實好擅長將浪漫嘅愛情濃縮，變成柴米油鹽，我哋身為故事入面唔完美嘅主角，就要學習喺唔完美嘅愛情入面，搵出屬於自己嘅幸福。
.
.
#結婚到底為自己定為咗其他嘢 #金都 #婚姻係唔係戀愛墳墓就要睇吓你因為咩而結婚 #世俗眼光真係咁重要咩 #愛情與現實 #愛情長跑啲friend愛情長文 #香港 #香港人 #愛 #愛情 #愛情語錄 #女朋友 #男朋友 #女生 #男生 #兩性 #兩性關係 #拍拖 #拍拖活動 #Dating #love #lovequotes #girlfriend #boyfriend #relationshipgoals
.
.
😀 記得Like 港式情侶 HKstyleCouple ，多多支持，多多指教！
.
.
| 追蹤我們・FOLLOW US |
1/ FACEBOOK - 港式情侶 HKstyleCouple
2/ INSTAGRAM - https://www.instagram.com/hkstylecouple/