一，尋日，時運低，做 Gym 嘅時候見到電視做緊城市論壇，有梁美X。坦白講，見佢嘅嘴臉同言論，個心講咗幾句粗口。阿彌陀佛，其實莫講話個心爆粗梁X芬唔會聽到，就算兜口兜面對佢講，都唔會有意思。
二，究竟佢具體講過乜？都係來來去去個呢句，唔重覆啦。不過，歸納返呢類「任何人」，我發現佢哋嘅思維同言論，必然有兩個重點：（一）香港係中國自古以來不可分裂嘅一部份；（二）你係中國人，就要撐中國。
三，對呢種「任何人」，中國人呢個身份，係冇選擇嘅，係宿命。因為有呢個宿命，你與其對抗，更正面嘅態度係去擁抱呢個身份，以中國人為榮。
四，好明顯，香港有唔少人並唔接受呢個身份認同。佢哋會覺得係教育嘅問題，所以後生仔對中國人身份認同好薄弱。其實亦有唔少人提出，唔單止年青人，唔少中年甚至長者，都對中國人身份產生異變。我明白，對於一啲好執著「你係中國人所以要撐中國」嘅「任何人」，係好難理解呢個現象，尤其佢哋真心相信厲害了我的國嘅神話，更加覺得香港人嘅本土意識，不可思議。
五，我亦都唔會嘗試去代表所有香港人去講自己嘅心路歷程；但我好想提醒大家，要做一個乜乜人，首先要做一個人。記得中學最後幾年，讀咩中國語文及文化，有講到「人禽之辨」。同一個時代嘅朋友，可以揮揮手；然後大家重溫下新儒家唐君毅嘅「與青年談中國文化」。
六，唐君毅話，西方呢，認為人有理智，人是最似神，或者人識得用工具、語言文字符號等。真係就咁一句就算。嗯，其實呢，西方哲學又未至於咁膚淺嘅。中國文化呢？唐君毅就用孟子嘅「仁義禮智」做框架，並且以「惻隱」、「羞惡」、「辭讓」、「是非」作為四個表徵。
七，惻隱，好粗略咁講，即係同理心啦。西方哲學有冇？梗有喇。阿當．史密（Adam Smith）嘅「道德情操論」（The Theory of Moral Sentiments），好大篇幅講同理心。當然，阿當．史密嘅想法，又唔係完全自創；除咗一脈相承自基督文化嘅道德觀，再加上當時得令嘅經驗主義學派（Empiricism）方法去解釋。史密同期仲有 David Hume，都有大同小異嘅觀點。
八，即係我想講，仁，並唔係咩中國特色嘅倫理道德哲學；人性，就梗係有放諸四海皆準嘅元素，夾硬要話乜乜物物係中國獨有，其實都幾易跌入某種民族主義嘅思想陷阱。「羞惡」、「辭讓」、「是非」等，亦應作如是觀。
九，有人話，中文方塊字好特殊喎，唔通對我哋文化哲學之類冇影響咩？我唔敢話冇，但係語言同文字嘅關係，邊個係主？邊個係輔呢？從語言學角度，文字係一種載體，功能主要係紀錄傳遞；但主要嘅訊息，其實係唔止文字。
十，更諷刺係，新文化運動，偏偏就係以消滅中文字作為與過去割裂嘅手段。唐君毅等新儒家人物，就希望重新建立中國人對中國文化嘅理解同仰慕；甚至講到「富有中國特色」嘅乜乜物物，都好值得去研究（唐君毅講嘅係佛學）。
十一，我戥佢哋唔抵嘅係，佢哋就好似幾千年前嘅知識份子一樣，有單純善良嘅動機，但作品偏偏畀統治者扭曲成思想控制嘅政治工具。其實唔只儒家，基本上乜野哲學同宗教都會被政治利用。所以結論係，只要見到政治結合任何意識形態，都代表一種思想被腐敗被蠶食。所以中世紀嘅宗教改革，其實亦都係政治嘅角力，更加係現代文明嘅起始。呢個題目好浩瀚，真係有緣再寫。
十二，今日中共借孔子嘅招牌行走江湖，我唔覺得出奇，畢竟太陽之下無新事，唔通中共會話自己係墨子嘅斷代傳承咩（係嘅話，我都真係要寫個服字）。
十三，所以，既然意識形態價值觀上面，所謂嘅中國文化又無乜咁特別，又有乜好自豪呢？過年會拜年好威咩？人家感恩節耶誕夠會食火雞送禮。其實，睇返都係農業社會秋收後無乜好做搵啲嘢搞下，總之大家覺得高興咪好囉，自咩豪呢？
十四，所謂生為中國人，呢個絕對係一個隨機嘅結果，又唔係出於選擇，有乜好自豪？出於選擇嘅身份，就係自豪。信教，都係選擇，所以教徒話忠於一個宗教，對自己身份自豪，我尊重。唔通你X美芬投胎前揀過，話唔做中國人就不如唔做人？
十五，其實好似X美芬呢種人話以中國人為榮，潛台詞就係：「如果某啲條件消失，所謂中國人呢個概念亦唔存在。」某啲條件消失，又可以翻譯成：「沒有共產黨，沒有新中國。」
十六，哦，明白了。咁點解唔直接啲同大家講，自己信嘅宗教叫中共？因為佢哋自己心底裡又知道一個不方便嘅真相：雖然中共作為一個俗世嘅宗教，亦都有權力結構嘅保護，但偏偏好似少咁啲嘢，硬係有啲嘢唔完整。
十七，我最欣賞嘅哲學家 Eric Hoffer 曾經講過：「一場狂熱運動裡面，可以冇上帝，但一定唔可以冇魔鬼。」中共嘅魔鬼，就係「亡我中華之心不死」嘅外國勢力。
十八，所以，表面上中共必須長期存在於一個被迫害妄想嘅狀態；就連我哋香港都要政治正確咁認清敵我矛盾。好似成日話要立廿三條保護國家安全；喂，你同邊個國家敵對呢又？
十九，「防人之心不可無。美國咪又係咁！」美國真係有同人結怨喎，中共有咩？邊個呀？假如中共話美國係敵人並宣諸於口，我恐怕會重演「光緒廿六年」嘅一幕；對歷史唔熟識嘅朋友，可以睇返「東南互保」，又或者本座兩篇舊 post
【歷史在笑】由咸豐年講起 - http://bit.ly/2mGrMXW
【只有一百年歷史的中華民族】- http://bit.ly/2mQYXrI
二十，至於自古以來香港乜乜物物，外國政府又點會幫香港人乜乜物物，都充分反映「任何人」嘅價值觀。其實，中共又點解要對香港人百般遷就？真係血濃於水？同大家分享個冷知識：Blood is thicker than water 呢句諺語，起源唔係孔孟，而相傳係出自十二世紀 Alsace 詩人 Heinrich der Glïchezäre 嘅 Reynard the Fox。
廿一，同場加映。話說，我哋自細都被好多假資訊洗腦。其中一個，就係話美國太空人去到月球之後，望返地球唯一見到嘅建築物，就係萬里長城。呢啲大話，咪專係針對自卑嘅人囉。正如講到阿里騰訊華為勁到冇人有，點解世界其他地方啲人又唔係全部都用阿里騰訊華為，唔通又係封殺咩？
廿二，常言道，可憐之人必有可惡之處。呢句說話，掉返轉講，都一樣通。假如你覺得「任何人」好可惡，你又可以諗下，其實佢哋係「可憐人」；明明係有得揀做一個人，佢硬係要做一個XX人。當然，「可憐人」亦有其仆街嘅原因，即係「條路自己揀，仆街唔好喊」嘅道理。
感恩節 諺語 在 turkey farm - Nini老師英語教室粉絲團 - Facebook - 登录或注册 的推薦與評價
[俚語諺語] 昨天是美國的Thanksgiving! 講到Thanksgiving，就會想到火雞turkey。 ... 因為平常大家不會特別去吃一整隻火雞，除了感恩節或Xmas這些家庭團圓的日子以外。 ... <看更多>