#多圖慎入
#飲飲食食最開心
西班牙北方有一種招牌菜，叫Pincho，是大部份酒吧裡必備的東西，也是常見的小食。製作方法每家都不同，大致都是把自家最拿手的小點心擺上麵包（常見為法包，但也有很多用心的小店，每種也配不同的包）當然也有不放在麵包上的，例如串燒、一口蕃茄湯之類的。
在酒吧裡的Pincho基本上就是一字排開、非常架勢。但任點唔係任食，每個城市玩法都唔同：Bilbao係你指一件佢就幫你夾一件，通常都件件同價；Saint Sebastian就係件件都可以唔同價錢，大家自己睇價錢牌睇餸食飯（雖然人家是西班牙文的啦）但價錢都是在2-4歐元18-36港元）之間浮動，點錯都唔會破產。俾個例子你：圖一嘅爆滿蟹膏班戟同圖二的即煎口爆鵝肝，每件都係唔駛35蚊港紙。
而呢啲Pincho有兩種玩法，一種係好似我地呢啲遊客咁，一間鋪頭嗌四五件，一炮過食飽就走；另一種正宗玩法就過癮得多，每次去一間酒吧，叫一件再加一杯啤酒，食完再去下間酒吧再隊一件加一杯。食下又傾下，轉場又再揀過，去五、六間先食得飽，咁就渡過左愉快的三小時。
留意返，有冇發現第一二張圖都影到好迫？你試下掃到去最尾一張相，真相係迫到咁樣。你想像唔到我有幾辛苦先可以影到咁多食物相，更不用說外國人係唔會明，點解香港人成日食野都要影相先。每次拿出手機，我還是有點心虛，總是冒著被人側目的風險，快快手手影兩張就算。入鄉隨俗，儘量唔好太打擾別人就是了。
除了提醒大家拍照時不要打擾到別人（也要有心理準備可能迫到影唔到靚相），大家要注意用餐時間，吃完傾多一陣計就好埋單走人，讓位俾下一個。我依家講你係唔會明，但當你去到現場，後面有五至六圈（係圈，唔係位）嘅人站在你背後，你會明白「唯願我懂下台的美麗、鞠躬了就退位、起碼得到敬禮」呢幾句歌詞係咩意思。
但係，你又唔好當佢地係香港某名店光速餐。店員係忙到無乜笑容，但唔代表奉旨無禮貌同埋當啲客係狗咁喝，最後一張圖忙到九彩呢間吧，五圈人圍住吧檯喪屍圍城咁款，侍應依舊從容不迫。佢遞野食係用雙手遞，我連忙放下手機雙手去接再點頭道謝。而第二次再去個侍應竟然會主動叫我英文名Kevin，我自問都冇咁嘅能耐去記一個過客的名字（而我好肯定無對佢放生電），抵佢地客似雲來。
若你準備好連同三五知己，擁抱這樣喧鬧繽紛的酒吧文化，就來吃Pinchos吧！相信我，那種美味，不是只是「好食」兩個字可以形容的。
#值得一提西班牙八點先開飯
#有啲餐廳八點先開
#大家係八點食到凌晨
#你早左去食嘅唔會新鮮
#如果你唔食白飯會死嘅話
#你當無睇過呢篇文啦
#咁樣玩一次人均消費300港元左右
#高鐵工人都100蚊個飯盒
#好貴咩
