《衰仔，依家嫌我煮嘢難食啦！》
唔知大家仲記得意媽屋企嗰兩隻白厭星嗎？身型龐大嘅Mini同比較瘦削嘅患有過渡活躍症Quince。
上年跟意佬喺阿根廷開工，理應一年先可回鄉探親一次。年尾轉工後，最開心嗰個當然係意媽同我媽！因為阿仔可每兩個月放一次假，就算要搓暈佢，一次返我鄉下一次返佢鄉下，都一年點都見到三次。呢個其實亦係我同意佬轉陣嘅主因......
未加入阿媽行列嘅我，身邊卻好多朋友大肚嘅大肚，第二胎嘅望第三胎，母系朋友們都有同一感想：兒子真係大得好快！
我同意佬未有準備迎接未來阿仔阿女，已感受到時光流逝的那種快。之所以呢個係我哋轉陣返埃及嘅原因：上年年尾後短短三個月冇見，Mini同Quince唔知係咪開始年紀大，三個月足以令佢哋忘記我😢一入到奶奶屋企兩隻就得正正喺梳化怒啤我，驚屎我呢個路人甲霸咗佢哋煲劇嗰張梳化。意佬就快4歲嘅外甥女，嘴gel gel咗，跑步快咗。剛踏入7字頭的奶奶，反而行得慢咗，白頭髮多咗，會忘記的事情多咗；唔記得鎖門，唔記得餵咗貓，唔記得電話擺咗去邊，每當我哋話返自己屋企煮飯仔，佢惡咗，話我哋好嫌棄佢老人家煮嘅嘢難食😅（其實奶奶有好多撚手好菜，只係兩公婆有時會想有自己嘅空間啫）
以前日日有老母煮飯洗衫執床單，久唔久有意見不合都會頂嘴兩句，好驚自己有朝一日做咗老母個位，俾仔女嫌煩都唔知點算。事過境遷，出走咗幾年，嫁咗就嚟一年，唔知係咪犯賤，少見多貴，依家反而自己或意佬阿媽嘮叨時，我都會笑笑口心感甜。聽落都幾變態，不過我零願見到今日仲識得吟吟尋尋嘅媽們，總好過他日佢哋已唔記得你係邊位，只怕你係霸咗佢睇電視張梳化嘅路人甲。
#已掛住奶奶的撚手意大利菜
#請不要忘記我呢位意大利的路人甲
#年紀大唔可怕
#記憶消失先得人驚
#期待下一round返我鄉下
我哋返咗去非洲喇～
