［加錢呀仆街！］倫交所小股東要求港交所提價兩成增現金比例
其實原本想用「錢我大把，我要初戀」。但師傅（即係我自己）教落，可以用其他圖，就唔好用太熱門嘅圖。否則好快冇貨賣
故事好簡單，港交所收購倫交所單嘢，原本必成為羅密歐與茱麗葉攬炒（http://bit.ly/32EPPFI）
（其實都係諗多咗，係你一廂情願想做羅密歐，人地先唔Q同你遺臭萬年。自己追唔到人羞愧自盡，人地皇帝女唔憂嫁，等入豪門。先唔得閒理啲MK仔狗公跳樓）。
但柳暗花明又一城，而家又可能有轉機。
今朝Tasty Money節目同小炒王梁心欣心欣姐（其實我老過佢好多啦，即係咁講）講開呢壇嘢。佢提到話「土豪強搶民女」。我就反而心諗，唔好咁啦，咩年代了。仲邊有迫良為娼。正所謂有強姦冇焗X，我地文明人嚟嘛，用文明人嘅方式解決。
即係錢
錢解決唔到嘅問題，再多錢就可以解決。亦係我舊文嘅題 （http://bit.ly/30NxuFc）
而家話，倫交所啲股東，要求加現金比例，即係唔好咁多公仔紙，騷咪朵蚊年。唔好咁多廢話。同埋就係，提價兩成。亦係題呢句，「加錢啦仆街」
記住，股東先係「老細」，而唔係而家倫交所班CEO西裝友。好多人呢點都未搞清楚。
「加錢啦仆街」
咁就好做啦！
至怕你講「唔係錢嘅問題」（而講呢句嘅都好，九成九都係錢嘅問題，正如有人話「我唔係為錢」）
你完全想像到（係我想像啫），土豪李小加擔住支煙個淫樣：「原來係嫌唔夠錢咋，早響嘛」「收得平我嫌你污糟添《大丈夫》」（請睇「錢我大把，我要初戀呀！」
強搶民女又好，財大氣粗又好。種種跡象見到，港交所都係不惜代價想贏得美人歸。你見今日連金發局李律仁（唔係我朋友律勤（假名）朋友）都出嚟講話雙贏。內地媒體亦都一致祝福。
香港嘛，其實我估都幾多行內人贊成的，至少我贊成。至於行外人嘛，理Q得你啦，關你春事咩．諗下有機會試下在倫敦做嘢，就已經J死我（實不相瞞，我在倫交所實習過，真係學過如來神掌又話你知咩）（當然洗過廁所都係實習過）（但，你估好多人洗過？）
真的，港倫合併喎，真係J死人。最重要係，「又唔係我嘅錢」。股東嘅錢之嘛。而本人並未持有以上股票。
你諗下，在港交所角度，加錢有乜所謂？兩成？分分鐘兩倍都制啦！
錢唔夠？借咯。港交所零負債乜滯，有何問題？況且仲要獨市生意。你覺得有執笠嘅可能？
況且，呢單嘢點都有阿爺嘅支持。未必真係背後發功，但唔會反對先。要借錢，中資銀行會唔會唔借
就當冇呢啲政治因素，銀行在商言商，貸款需求咁弱，難得有人做咁大單M&A借咁大舊錢—而還唔到錢嘅風險近乎零，人人爭住做啦。
還唔到錢？咪加交易徵費咯．你有say 咩？有有得唔鍾意揀第間？That’s the beauty of monopoly。你只可以揀，trade或者唔trade- 唔好笑呀 ，你以為呢句好廢？係有情況你連唔trade都冇得揀—例如強積金。犯法架。你仲覺唔覺得「有得揀做或者唔做」好笑？其實係恩賜呀！
（廣告一則：本人剛加入獅子山學會做會員，歡迎捐助，捐飯盒都得，本會好窮）
講返，既然人地開到口，港交所加錢就肯定無懸念。但真係講過幾百次，亦唔只係港交所，CFA基本功都話你知，古今中外，過半嘅M&A都係買貴。原因好簡單，因為管埋層要好大喜功，反正最後股東埋單
上次新聞一出，港交所股價即插。今次再加價，照計仲有得跌啦掛。
當然啦，唔好唔我唔講定。靚女（其實靚仔都係），梗係口不對心。麻煩臭串多多事實。口話加錢啫，其實可能由始到撚都冇諗住同你一齊，只係玩鳩你都說不定
唔好以為加錢又實得呀。只係唔加一定唔得。加完錢再畀人侮辱都仲係有可能的。做狗公就係咁架啦。
畢竟冇人拎支槍指住你要你買的。
