【我們看海去】
喺機場等咗近一個鐘，食飽飽上客（入機場個乘客係參加一個只有五人嘅旅行團，領隊導遊仲要去到當地先會合，大家估吓咩地方），非常期待會去邊。跟住前車，明明有客喺4號位，去到4號佢抽頭走，我停定就明白箇中原因：原來係4個無行李嘅大媽。就咁睇，除咗無行李，打扮都非常街坊，而站頭職員聽住為首嘅大媽對佢吱吱喳喳，雙眉皺到就痴埋，睇怕都唔係好嘢。
四座位紅的嘅後座明明好寬敞，但上滿乘客後想郁都難。上咗車之後前座大媽又吱吱喳喳，我馬上打斷佢，落低玻璃問職員佢哋去邊，職員答案令我呆在當場：「佢哋未決定去邊呀。」「你哋想去邊？」我定一定神就問一眾大媽，回應我嘅係好響亮嘅普通話：「我們想到看到海的地方，司機你說到哪去？」看到海的地方？我第一個浮現起嘅地方係石澳，然後就想去清水灣，喺胡思亂想間，手腳已自動落旗開車。
「你們到底想到什麼地方？」任我揀去邊？Omakase咩。
「要看到海！」
「要到海濱去。」
「你不是說要看到維多利亞港嗎？」
「司機，哪兒可以看到維多利亞港？」
邊度睇到維港？好多地方都睇到喎。其時六點鐘，過海真係好完美嘅目的地，唔通我揸去天星碼頭塞車咩，所以我扮諗一諗再答：「看維多利亞港，我覺得中環海濱較好。那兒的旅客設施完備，但人流不算太多。」
「真的假的？那兒夜景如何？」
「夜景？那兒有摩天輪呀，如果你們想看夜景，那不妨到山頂去，山頂⋯⋯」我不停表達山頂嘅夜景有幾靚，完全無視夜景有幾靚等於光害有幾嚴重嘅事實，講到佢哋都點頭認同，正，一於西隧過海直衝山頂。
忽然有人拍一拍坐前座個大媽：「但你不是一直很想看維多利亞港嗎？」「對啊，這是⋯⋯怎樣說呢？」「心願是吧。」
唔___係掛，心願？睇維多利亞河係咩玩法？再者，山頂都睇到維港㗎，唔好改目的地啦。「司機，我們還是到海邊去吧。」可惜，世事往往事與願違，出於心願，都係去中環碼頭。
「幹嘛想看維多利亞港？」坦白講，一條爛鬼維多利亞河，遊客可能覺得好正，我就真係唔知有咩咁好睇。
「我們想感受一下香港的繁華。」
「隔着海看對岸辦公樓的燈光，最美。」
「聽說到了晚上，燈光點點的，世界各地都沒有這種景色。」
「可惜現在較多廣告。」
出咗南灣隧道，佢哋攞晒電話出嚟影貨櫃碼頭，係咁話「很美很美」。我就愈揸愈灰，可以過海嘅興奮完全消耗怠盡。隔海遠望，只會見到大樓一格格嘅燈光，錯落有致嘅輝煌背後，不過係一間間現代化血汗工廠。六七點都叫正常，十一二點依然璀璨奪目嘅東方之珠，代表嘅係進步定落後呢？我們看海去，看璀璨的燈光，看摧殘的人生。
到埗之後，天色已暗。放低乘客之後開返車燈，着住代表空載嘅頂燈招引乘客，兼成為香港亮麗夜景嘅一部分。希望呢盞燈可以儘快熄，希望維港兩岸嘅燈光可以無咁光。
#lazytaxi
#的士
#taxi
#我的你的紅的
東方之珠 旅行團 在 TCI 勝景遊- 【黃昏 維港遊-全新東方之珠號 】迷醉維港聖誕之 ... 的推薦與評價
【大棠楓香林、流浮山鮑魚生蠔 海鮮午宴、東方之珠號(迷醉黃昏．維港遊)1天遊】 旅行團號︰HSA01(ZL) - 精心安排健行路線，從大棠出發，健行往大棠楓香林，楓 ... <看更多>