《我們的失敗》陳心遙
《信報》2018年6月13日《視線所及》專欄
日前被公布死訊嘅日本民謠女歌手森田童子，好多歌曲嘅意思晦暗不明。因為佢背景神秘，讀邊間學校，咩科目，受咩思想，音樂風格影響，有咩人生經歷，一概唔知；只知道佢經歷過一個好朋友離世嘅打擊。出道成名曲《再見了我的朋友》（さよなら僕のともだち）就係獻給亡友嘅歌曲。另一首歌《眩目之夏》（眩しい夏），歌詞描述沿住玉川上水，即係文豪太宰治投河嘅地方，去探望好友，但見到佢食咗安眠藥之後伏喺枱頭，耀眼嘅陽光、背上嘅汗水、夏蟬嘅鳴叫同太宰治嘅書交織而成嘅情境，永誌難忘；似係幻想自己親眼目睹摯友輕生嘅畫面。
論七十年代，日本當紅嘅女歌手有松任谷由實、五輪真弓、山口百惠、中島美雪等等，森田算係十分另類同唔多人知道嘅歌手。好多香港人甚至日本人認識佢，都係由九十年代，野島伸司創作嘅電視劇同電影《高校教師》開始，因為野島取用咗佢1976嘅歌曲《我們的失敗》（僕たちの失敗）。呢首曲係描寫兩個曾經相濡以沫嘅人嘅回憶，而家得歌者一個人去追尋同懷念。歌詞成日被引伸為悼念夢想嘅消亡，追悔人生嘅失敗；以至呈現對整個成人世界嘅不安感同無力感。當時好多人，大概係沉迷於紙醉金迷，夜夜笙歌嘅精神狀態，經濟增長帶嚟嘅優厚物質，以及日本在世界中心嘅心理優越。仍然為學運同少年時代嘅挫拆而耿耿於懷嘅森田，絕對同主流價值格格不入。但呢種思想同作品，喺自由嘅社會一樣有生存空間，偶爾嘅現場演出，小型電台同雜誌嘅訪問，一樣吸引到同一班同樣對世界感到困惑嘅小眾欣賞。
然後，彷彿預告咗物極必反嘅定理，日本經濟由九十年代初下滑，泡沫爆破，迎來痛苦嘅20年。一切如曾在夢中（みんな夢でありました），如果命運有得重新選擇，又會唔會選擇另一種人生呢？
世界有兩種人，有一類人選擇緊緊跟住主流路線，不發問，不自尋煩惱；我哋社會需要大量呢類人先可以暢順運作，如果前面終點係一片樂土，咁大家就可以共享生活美好，實現夢想嘅結果。另一類人，天生包拗頸，唔會信任何人灌輸嘅答案，如果前路無礙，咁啲人係標準嘅阻住地球轉，但如果萬一，即使係好微小嘅機會，前面其實係懸崖，呢類人就係先見之明嘅偉人。不過可惜，呢類人大部分都會喺當下備受忽視甚至迫害，最後選擇轉軚，隨波逐流同內心永遠漂泊嘅下場。
#我們的失敗 #森田童子 #高校教師 #信報 #陳心遙
