兩年無開show（如果計紅館已經五年⋯⋯），今次最大嘅感觸係，其實我真係好需要好需要唱歌。為你地好，為我自己都好。
尋晚返到嚟屋企收到金菇們一條link，聽到大家睇完Show嘅分享，大家臉上嗰種感動，同以前做完一個show嘅純興奮好唔同，係更深層次，更入心嘅一種感觸。估計亦係因為夾雜咗呢幾年發生嘅事，有社會嘅，有我本人嘅，亦有大家嘅。再加上今次選唱咗Ten Days In A Madhouse全碟，當年嘅年少無知經歷過年月同人生嘅洗禮，到今日重唱呢十首有血有肉嘅創作，有一種無法言喻嘅震撼。
蕭教授發來短訊，表示“I must admit how dark the mood of your singing has become. The sadness comes so deeply from the heart." 我嘅回覆係：”This observation is quite interesting.“
事實上，重新演繹當年嘅忽發奇想，固然係沉重甚多。因為一切已經變得如此真實，以前觀察、抽離嘅角色去到今日身歷其境。
但同時，我會認為，各種痛楚係追求創作表達嘅人必備嘅素材。無痛無風浪嘅人生，只會生產平平無奇嘅作品。當年未有被賦予完整靈魂嘅歌曲，竟然喺十三年後重新再活過來一次，被注入新生命，呢個就係作為藝術工作者嘅privilege，以及真正嘅天職。
慶幸我有我嘅人生經歷，能夠走到嚟呢一步（仍然死唔去），我感覺到我嘅藝術生命即將打開新一頁。今次呢個演唱會對我嚟講係一個提醒，提醒我我真正嘅位置應該喺邊度。
說真的，今日嘅環境對我嚟比起兩三年前更艱難百倍。睇到其他歌手可以開到實體show，紅館又好、其他地方都好，內心係有各種滋味。當你清楚知道其實自己最大能力就喺呢度，但命運偏偏要你無法用同一個途徑去繼續如常做到，有時電量不足亦會感到各種不安同無奈。但最終亦只能夠講，路係自己揀嘅，總會撐過去。
今次online live，呢個membership site，正正就係我嘗試去用唔同方法，令自己呢個歌手生命能夠延續。當然online live威力遠不及實體演唱會，但又，當你感受到身邊團隊用盡所有能力令你有同樣專業同配套，當你發現大家仲落力過你，你會明白，嗰份magic，無論去到邊度都仍然能存在，甚至又再轉化做另一種更頑強的感動。
一切就在於人。學隊長話齋，「我們有多真心，我們的舞台就有多大！無論在何時何地！」
答應大家，今年，我歸位喇。無論歌曲創作又好、演出都好，我會努力用生命繼續去為你地唱出各種人生起跌。
感謝所有支持我到今日嘅大家，感謝所有令今次能成事嘅好人好事。
我地會努力搵方法令大家重聚於現場。
Hocc
#hocconlinelive
#美空雲雀
#有人還可以信奉
#alltimefavourite
