［到呢樣嘢發生在你身上，你職場就略有小成啦］
上次寫篇便服見工，迴響幾好（見工記—誰大誰惡誰正確 http://bit.ly/2FQsU32）。今篇冇咁好笑，但一樣真人真事，有心人唔難搵到當事人，但反正我估冇人咁重視我，佢本人亦唔會care，況且我係讚佢。2004年後，我做過邊間公司邊份工全部係公開資料。
故事亦同便服見工有關。件事係上一個狗年，2006年。
________________________________________
簡介下，2001年秋，911冇耐，我英國孖士打（唔係律師樓）回來，雙失大半年，麥當勞做過（很多女的說），傳銷見過，唔記得見工試過，去錯公司試過，唔知見乜位又有。詳情在我101次求職一文有講 （＜101次求職＞ 幻想中的Sure Lam成為事實 http://bit.ly/2FQLTuf）
2002年見咗超過100次工，卒之修成正果，教兩間中學教兩年書，2004年轉咗去銀行，去蕉行香港做，跟標哥學嘢（有機會講下佢，畢竟佢肯請個柒下柒下嘅教書佬，令我開展屹今十五年嘅金融生涯），做我嘅 Dealer聲 （由你點讀呢個字就知你水平）。
刁咗兩年，舊東家耆英證券（坡資，後來變成拉資，馬拉）請人，面試係個好唔英國嘅英國佬，占士咖啡（此人鍾意開會拎眼鏡柄搞咖啡，然後放柄入口試味，再加糖再搞。又試過業績會用手拎魚蛋，發現好難食就放埋一邊，或踢落枱底，十分Mr Bean）
咖啡講幾句就閃咗（後來先知佢星期五四點走人，但佢好早返工），踢咗個波畀佢副手老馮。老馮講乜我都唔多記得，大意係「我話唔到事嘅，醒定啲啦𡃁仔」
就咁我就在耆英過咗八年，暫時做得最耐一份工，亦搵得最多錢（total），喜怒哀樂都有，亦學到最多嘢，影響我最深。耆英舊生會而家都耐唔耐食飯。
咖啡2007年走咗（轉工，唔係死咗），加上唔係成日同我講嘢，佢到佢走嗰日先知我在英國戰域讀火箭工程。雖然佢係屙化我入股票行業嘅伯樂，但謹此而矣，我好感激佢，推咗第一下，但談不上好大影響或學到好多。
反而咖啡對我最大恩就係佢走頭。佢走時仲有好多同事（唔係跟埋佢走），唔好唔記得係炒爆廠，港股直通車嘅2007年，工搶人，公司甚至主動出中期花紅安撫大家。咖啡走後老馮坐正，我亦水鬼升城隍做阿二，嗰八年我對佢嘅時間多過成世對住我老豆老母加埋。佢於我亦師亦友，如阿哥如老豆（佢約大我十年），對外我叫佢師傅。佢影響我好深，我地八年只係炒過一次大鑊（好難得架啦，日日對十幾個鐘），但都好快冇嘢，而家仲keep住一兩個月食一次飯。不過佢仲在江湖，費事寫太多。
2014年我地齊齊被炒後（我早啲），佢仲有唔止一次搵我過檔，可惜可能有緣無份（translation:有人麻撚煩跳草裙舞嫌三嫌四），冇成過事。
呢度係我想講嘅係，新工請你，猶如飛髮唔指定師傅，又如風俗店不加指名費叫雞，都係滿足需要，求其一件。固然你跑出，但有冇下次仲言之過早，唔好咁自滿，高盛請你固然你叻，但等於富豪嫖你一樣：你係姿色改變命運，but don’t forget there are many guys like you all over the world 。
至於headhunt搵你，更加如龜婆賣你落火坑，佢只為自己「促成一宗交易」。如道友咁，劉華話頭，啲死老酮，扮晒死狗，吊起癮上嚟咩嘢做唔出咩嘢講唔出？並非攻擊佢地，只係本質如此，你比我做都係咁
唯獨係舊老闆過檔搵埋你，咁你可以自滿一下，「證明你都唔係十分非常之好差」。真的，人梗有惰性，做生不如做熟，同埋煙人請人都十分煩的，特別而家啲小朋友唔蒲頭又唔出聲，有啲返一星期又走。咁老闆可能只係「貪就手」
咁但，做到「貪就手」已經好叻。因為其實將你好似個避孕套咁掉落垃圾桶（或更仆街地過飛掉出窗）仲簡單。老闆心中大把恨不得佢快啲走嘅𡃁，我以前都有，就係上次提嘅林生。唔郁手可能因為婦人之仁，懶，有個廢柴聽下電話好過畀人減吃更，怕做醜人，上頭唔畀，條友係黃馬褂/老闆情婦之類。但到轉得工，就感謝主，自然流失老死不相往來。
而你老闆嘅級數，轉到工；多數都可以拉啲馬仔秘書過檔，所謂「馬房」「兄弟班」（當年老馮講嘅）就係咁。如果佢冇咁嘅能力，即係佢未夠成功，亦既係你未夠成功-梗係啦，佢咁唔成你都跟佢咁耐，仲唔係你問題？。如果佢有咁能力但選擇唔帶你，就你檢討下（當然有時亦因爲其他原因，例如人工，或新公司想制衡佢）
真的，即使我同我星展上司不和（眾所皆知，我唔使否認）；佢應該由第一刻都冇點信過我，但佢都容許我帶𡃁過檔。應該係費事又要登ad煩，又費事我多多理由話十卜唔夠。但我冇咁做，舊𡃁都知，亦係讀者。主要係我覺得人工唔加得多（講佢，我就滿意的），工作量多好多，同埋唔啱佢性格。佢都同意，而家亦好慶幸我冇帶佢去，否則今日就齊齊食蕉
但至少我係可以咁做，有諗過咁做。所以呢，你舊老細轉工搵埋你，或者坐定咗，有下屬走咗搵你，都表示你有一定能力
工搵你，總好過你要上JobsDB 。雖然蕉行耆英我都係睇報紙圈廣告的，仲要用紅筆。特別係蕉行老撚土地返長短週（dealing room星期六有乜做呢？標哥由第一日屌到退休，而佢見我正正常常後就多數星期六只返嚟打一打卡，後來卡都唔打），好多時得我一個，就係買早餐然後拎幾份米報返公司。
Sorry 離咗題，下篇真係講另一次 便服見工記
________________________________________
原諒我起個咁content farm嘅題；但我理直氣壯咁講錯不在我，我可以一篇寫晒，但而家啲讀者（即係你）冇耐性，兩三千字都too long didn’t read。上次我篇文都有人話見咁長冇心機睇。sorry for making you 自卑
後記：感謝恒管（而家變成恒大）嘅mentee，早排食飯我講足大半晚，有講呢個故事。我啲老年人係要定期想下當年，以後仲會寫更多，反正年代久遠，好多當事人上晒岸，脫離晒為口奔馳Benz for the mouth 嘅階段，好似政府檔案咁可以解密
有人見我寫呢啲，諗起林振強。林振強臨時前寫咗「我的野蠻廣告生涯」等等一系列文，講屋企人，講工作，由第一份工講起。敏感嘅人就會估到佢應該大限將至，當年我仲係慒然不覺，明顯唔識人情世故。（ 死在原稿紙上-悼林振強林燕妮 http://bit.ly/2FR4dDI）
放心，我未死。
想知我做嘢之前嘅大學生涯，睇埋呢篇文應該會明 （贏在起跑線？人生唔係一條直線 http://bit.ly/2FRQfBk ）
有關我嘅見工經歷，傳說中的＜101次求職＞可以睇呢篇 （＜101次求職＞ 幻想中的Sure Lam成為事實 http://bit.ly/2FQLTuf）
