聽講長文藍絲係唔(識)睇
若然你唔理解、唔同意、甚或至質疑抗爭者嘅行為，認為佢地只係破壞公物、阻礙民生、英雄主義的話，請花數分鐘了解一下。若然你連嘗試了解的氣量也沒有，請不要再自命清高，坐在冷氣房端起一副關心社會的嘴臉。
********
轉載：
琴晚見到一位我尊重嘅長輩喺facebook話示威者破壞緊社會，辛苦了清潔工。原先我打算block左佢就算，但最後都係決定不吐不快。
希望你可以睇到：
係，你講得冇錯。
示威者的而且確係破壞緊公共設施，欄杆，磚都拆晒挖起晒，但我想提醒你嘅係，社會破壞左可以建設返，唔同你講到民主自由咁遠，我就淨係同你講人權，人權冇左就唔會再咁易爭取得返。
好啦，你覺得示威者破壞公共設施令你好嬲，你話佢地因為一少部分人嘅利益去犧牲大部分人嘅利益。咁當初起高鐵要拆菜園村嗰陣點解你又唔話政府破壞人地世世代代都住嘅地方？然後你同我講為左大部分人嘅利益就係要犧牲一少部分人嘅利益，你停一停諗呢個問題，你覺得自己矛盾唔矛盾？
好啦，你講到示威者破壞左公共環境你再好嬲，咁點解中華白海豚死淨兩條嘅時候你又唔話嬲呢個政府？唔通中華白海豚就唔係生命？佢就唔係呢個地球嘅一份子？
好簡單，** 因為呢兩件事都唔會切身處地咁影響到你嘅個人利益。
好啦，唔講環境，就同你講公共設施，沙中線鋼筋標準一改再改，連安全標準都達唔到嘅時候，政府做緊嘅野又係唔係危害緊公眾安全？又係咪間接地破壞緊社會安寧？然後你又會心入面諗，哎也我都冇幾可搭到沙中線㗎啦，唔關我事啦。
好簡單，如果你對以上三件事你都覺得唔關你事，覺得政府冇錯，覺得呢個社會嘅事咁事不關己，你憑咩覺得今日啲示威者出嚟做嘅野就係破壞緊社會？憑咩覺得佢地今日做嘅事係影響緊你利益？
跟住落嚟同你講啲深層次但你未必明嘅野，就係逃犯條例。
我必須喺度同你地講清楚，關於逃犯條例，好多人依家已經直接打緊大佬，但根本成件事嘅矛頭要直指嘅係林鄭月娥嚴重地破壞香港嘅司法獨立！點樣破壞？香港司法最重要嘅野就係佢嘅「無罪假定」，佢係保障緊冇人會坐冤獄，係絕對保障緊香港嘅市民。好啦，依家逃犯條例一出，特首話你疑犯都可以拉你走，法庭法官冇唔俾你送走嘅權限㗎，佢只有審視文件嘅能力㗎咋！咁同你俾人拉左但要喺監獄度搵證據證明自己冇罪有咩分別？呢啲叫「有罪假定」呀！
然後呢個時候你又會話，哎也我唔犯法㗎，唔犯法就唔洗驚啦。
逃犯條例一過，就唔係你犯唔犯法嘅問題，係你講真話都會俾人話破壞社會安寧。我知你有小朋友，所以就用小朋友做例子。
你個小朋友飲左毒奶粉，然後你企出嚟話要幫個小朋友討回公道，但你俾人拉左話你破壞社會安寧，你自己諗。
你個小朋友喺學校俾小朋友蝦，唔好話蝦啦，直接打啦，然後你因為佢一句我爸是李剛你就唔敢追究，你自己諗。
咩叫人權？人權就係你可以因為呢個社會嘅不公而發聲，唔好講到咁大，人權就係你可以因為自身遇到嘅不公義發聲。
今時今日，你上到facebook，用到whatsapp，呢啲都係人權。
我重申，你講得冇錯，呢一代嘅示威者的確係破壞緊社會公共設施，但佢地爭取嘅野嘅意義遠超過你眼見冇左嘅欄杆同埋地下嘅磚頭，如果呢一場仗佢地放棄左，輸左，就會全香港人都冇左人權同公義。
睇到呢度，你覺得到底示威者係因為一部分人嘅利益而犧牲緊大部分人嘅利益，定係因為一大部分人嘅利益而犧牲緊自己嘅利益？
你自己諗。
真係好多人講緊示威者破壞乜乜乜，香港要用幾多時間先可以復原，快啲收手
但我覺得，香港好多嘢一早被人破壞咗而無出聲，嗰啲人淨係睇到自己而家生活幾好就當無事，真正自私嘅係佢地
我都知有人係餐搵餐食，有時真係阻到做生意，但大家生活咁艱難又因爲咩呢？樓價貴，租樓貴，舖租貴，物價貴，又無全民退保，睇醫生又得嗰少少醫療卷，公院資源又唔夠，呢啲民生嘢，政府有正視過咩？
根本成個政府都係官官相衛，自己走晒法律罅仲叫人講法治
麻煩大家瘋狂手轉比身邊嘅人，特別係長輩同中產嘅生意人！
