【#新貨到 平民區平價高質凍肉尋寶記】
趁長假期之前，又係時候入定凍肉貨，打爆個冰格，得閒要煮番幾味先😁
之前同大家介紹過呢間私心推介既凍肉舖，係我成日都過嚟幫襯嘅，種類非常之多，除了價錢比一般大型超市平最少1/3以上，有d品種亦係市面上少見既。啱啱入貨時，見佢返咗好多新貨，我又買咗勁多好嘢，係時候出個post同大家推介下先。
今次返左好多日本台灣新貨，全部都令我心心眼😍😍同大家分享一下必入心水推介💖💖
1. 泰國CP單骨炸雞翼 1KG$78
最近人氣熱搶激罕貨👍🏻👍🏻呢隻雞翼其實係麥當當嗰隻炸雞翼，味道係完全一樣，好食到爆炸🤤🤤只需放入焗爐焗6-8分鐘，完全唔洗開油炸，真係手殘都一定整到。不過聽老細講，呢隻雞翼太搶手，貨源好唔穩定，仲有少量存貨，要碰碰運氣或預早留貨。
2. 散裝金龍燒賣$21/磅
呢隻熱賣燒賣都唔使多介紹啦，唔使買一大包咁麻煩，可以按磅秤，食幾多買幾多，非常之方便。
3. 宜蘭蔥肉餡餅/台灣蔥油餅
呢兩隻牌子都食開，非常之好食👍🏻既然呢度有得賣，可以一次過入貨啦
4. 日本清酒勁抵買，$40幾蚊就有枝靚靚既300ml裝，細細枝用來同好友碰杯，或整日本凊酒煮蜆及其他日本菜，夠曬抵用。仲有日本產午餐肉及咸牛肉，未試過都覺得好新奇
5. 大量全新的日本醬料，例如熱賣的日本蒜油牛油汁$55 一大枝，仲有日本牛丼汁、餃子汁、牛角特製醬汁、壽喜燒汁等，$20幾起蚊就有交易，可以為我嘅自家日本料理入定好多貨✌🏻
6. 單個日本油甘魚鮫 $48
做定食一流，燒油甘魚鮫勁好食，唔洗買一pack 4個咁多，又驚霸住冰格個位食唔晒
7. 鍾意食辣嘅，有好多酸辣粉啦、老干媽辣醬啦、不同牌子的麻辣火鍋底料、重慶小麵、麻辣小龍蝦調味料等，自家煮唔同口味嘅四川重慶辣菜/麻辣火鍋都無問題啦
8. 當然一如既往，都有好多勁優質嘅平價凍肉，例如加拿大白豚斧頭扒、安格斯肉眼扒、法式羊架、日本黑豚豬腩片、丹麥無激素日式叉燒、紐西蘭羊肉片、美國牛板腱火鍋片、安格斯斧頭扒、美國牛肩肉粒等，一站式掃晒所有勁正凍肉，非常方便
另外呢度嘅醬料種類真係非常多，連一啲老字號嘅本地醬料品牌如冠益都有，或者內地醬料，冷門D羊肉醬、炆羊腩醬、冰花酸梅醬，特別推介好味牌蝦米辣椒醬，簡單d爆香個醬撈魚蛋食，或炒餸真係超級惹味，當XO醬咁用，但味道層次豐富得多。
真係有太多太多太多好嘅食材同埋醬料啦，每次都買到幾大袋咁走😁😁
得閒去尋下寶
用最平的價錢食得最好
先至係一個最醒最精明煮婦😎😎
————
順興凍肉
深水埗大南街313號
(在北河街街市附近)
