【龔成問答信箱】（Q14921-Q14940）
Q14921：
岩岩學股票，想問下就宜家肺炎影響 就過往經驗 股票都會有影響 小跌/大跌
而我最近拎左我啲儲蓄5萬蚊分別買左呢4隻股票 入既價位都好似有啲高 1810、2400、1558、9922
好彩暫時拉平都叫有幾百蚊 我預東陽都可以升反和數 咁我應該賣走曬啲股票先 等股市再跌低啲 我先再簡入手
定長期擺係到都得 因為都有睇你講話 眼光可以放遠啲 但我本唔大 我應該用之前股票跌 用差價賺錢定長擺
好想知
意思係等股市跌啲 再趁低吸納 搵多啲本之後先長擺？又想知宜家有肺炎既影響下 會唔會影響到股票
龔成老師：
我唔建議「賣左先，等跌再入」。
總之，我地應該以企業的本質，長期角度分析，當然買入時都要注意平貴。
小米（1810）有質素的，可持有，至於東陽光藥（1558）都是有質素的，但不建議持有太多，因為之前升左好多。
至於九毛九（9922），業務本質雖然唔差，但上市後升得太多，一直都貴，要小心。
至於心動公司（2400），風險較高，不確定性大，自己衡量風險。
好多人認為，賣出，等跌再入最好，我過往做銀行同證券行，10個客有9個都係咁樣想，但佢都10次有9次失敗，點解？
因為佢地用正常人的角度分析，以為自己可以捉到個市，但市場的發展，好多時同我地預期的不一樣，無人知的。
如果大市反升，到時點？要追貨？
因為當你賣出的一刻，市場已知道了肺炎的風險，股價已反映了這刻的情況，這刻賣出有可能賣平左。
------------------------------------------------
Q14922：
龔成老師你好！愈看得多信息愈發現自己投資知識不足...請教一下，看到你有推介778置富，想問一下如商場的市值低了，會影響股價的嗎？
1428耀才剛宣布派特別息80仙，派這麼高息是有什麼不尋常嗎？
謝謝！
龔成老師：
商場市值低，會對股價有影響的，投資者會同時考慮商場的租金收入情況，以及商場本身的價值，以分析這房託價值多少錢的。
置富（0778）本身有質素，現價合理，有長線投資的價值。
至於耀才證券金融（1428），佢話因為上市10年，因此派高息。暫時睇，又不算有咩不尋常，但這股一向都上落較大，因此就算投資都不能大注。另外翻提派息後股價會自然地除淨，因此投資者不一定有著數的。
------------------------------------------------
Q14923：
有關強積金的長遠分配,現時我30歲,每月供$3000左右,我也知現時是財富增長的階段,又唔想蝕太多和太保守。
想問我的強積金的供款分配較好?以及成哥你果時如何分配才保住強積金而又可增值貼市?
我現時的強積金分配如下:
1. 恆指基金:50%
2. 自選美國股票基金: 25%
3. 亞太股票基金: 15%
4. 增長基金: 10%
這樣強積金的財富分佈可以嗎?
謝謝成哥指教!!亦希望成哥恕我有較多問題提問!
龔成老師：
我自最初踏入社會工作開始，就100%恆指。
強積金是一個長期分配，其實你根本唔需要擔心中短期的賺蝕問題，長遠來說，投資好多優質股票都是向上的。
你現時的分配比例無問題，我相信繼續進行都得，到40歲先開始調整無問題的。
------------------------------------------------
Q14924：
龔sir你好；）想問一下，本身有月供股票5000蚊的，而家想加多一隻收息股，想問港鐵，香港電訊，數碼通邊一隻會比較好？
另外對中國鐵塔同京信都有興趣，但見京信而家仲係蝕緊錢，應唔應該投資落佢度？
thanks you 龔sir!
龔成老師：
如果想有增長力，加上股息，就可以港鐵（0066）。如果想收息較穩定，股價上落較少，就香港電訊（6823）。
兩隻都是好優質的股票，都適合月供儲貨，長線持有。
至於另外的電訊股，中國鐵塔（0788）會比較好，現價在合理區中上部，分注投資無問題，佢會因為5G而長遠受惠的。
------------------------------------------------
Q14925：
成哥，請教下2020 3690 9988點睇？
龔成老師：
安踏體育（2020）業務有質素，增長力強，但股價有點貴，所以如有貨，可持有，無貨就算回先考慮。
至於美團點評（3690），業務有潛力，但未有理想的盈利，估值極難，只可以話有危有機，這類股如投資，小注好了。
阿里（9988）有質素的，潛力股。有長線投資價值，不過現價少少貴，因此，有貨可持有，如想入，不要太大注。
------------------------------------------------
Q14926：
Hello 龔老師，今年30，月入30K 以前一直都 去旅行 儲唔到錢，現金10萬，有買儲蓄保險年費37000, 供作三年。
零任何投資，沒買 股票！
機緣巧合 見到呢個facebook page， 請問怎樣 利用少少現金作投資， 有什麼投資一計劃 適合？Thanks
龔成老師：
儲蓄保險只是一些防守性產品，我地理財，要做到攻守兼備，而你30歲，進攻的比例就要更多！因為你仍處於財富增值的黃金年期，要好好把握。
當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
你現時可以每月做月供股票，例如供$5000盈富（2800），慢慢將你的現金轉到股票裡，長線持有。盈富是一個50隻質素不差的股票組合，就算你不懂選股，這都是很適合你的。
你保持長期月供就得。
如果你不想月供，就以分注的模式投資盈富，但不要用盡現金。
------------------------------------------------
Q14927：
龔成老師，我現在26歲。月供盈富1500，上手有3手阿里巴巴，3手領展，想累積財富，現在的組合需要調整嗎？中銀香港近期跌，值得入嗎？
龔成老師：
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只需要小部分。
上述的分配可以，都是有質素的股票，長線持有無問題。不過，阿里（9988）是潛力股，現時已足夠，之後不用加。
至於中銀香港（2388），現價合理，可分注投資。
但要留意，現時大市處合理區，可分注入。不過，未到平宜區，因此要留有一定的現金，等平宜區時買貨。
------------------------------------------------
Q14928：
龔成，我最近買了一手548深高速（2000股），價位係11.1
知道佢主營運公路外，亦有搞環保/垃圾處理項目，最近亦收購左藍德環保
主係係想問問，深高速營運的公路係會可以一直營運嗎？還是有期限，你知道嗎？
如果有期限，到期之後佢無左營運公路收入，那公司就無價值嗎？
衷心謝謝你！
龔成老師：
深圳高速公路股份（0548）有質素的，這股可以長期持有，不過，這股應集中在收息，增長力方面是一個輔助。你長線持有無問題的。
內地公路股，一般都有到期的問題，因此，不少公路企業，都要不斷開發新公路，又或開展營運其他項目，這點市場一早理解，以及反映左。
------------------------------------------------
Q14929：
龔成你好 ，我想請教一下1313 華潤水泥，房屋以及基建不斷興建，人口不斷增加，水泥股是否應該受惠？
加上中美貿易戰下，中國政府會加大力度推動基建發展？展望2020、2021 會有得升嗎？現價10.1
加上有 大灣區發展的利好因素
有望提升華南地區水泥需求嗎
因為我手揸的都是大型藍籌，想找一些受惠國策以及有增長的股票喔
謝謝
龔成老師：
華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。
佢之前公布的中期業績，業務有回落情況。不過，你上述所講的，部分的確會利好這股，因此長遠仍是正面。但就要留意，股價上落會較大，自己要注碼上控制。
------------------------------------------------
Q14930：
老師，我不明白資本開支既定義是什麼？
龔成老師：
用最簡單的講法，就是這項支出，目的是「投入成為企業一些長期資產項」，這些資產項，預期會為企業產生長期的經濟效益。
這些支出不會在這年於損益表入賬，而是會視為一種投入，之後會每年以折舊模式去支出，你可以在現金流量表找到資本開支的。
------------------------------------------------
Q14931：
Hi 成哥 我想問指數有冇考慮除淨？ 即如果我想計恆指總回報，只用指數個值就ok?
比較不同指數的歷史升幅不需要加入歷來派息？
龔成老師：
我就以恆指去講，當中有50間公司，例如現時是30000點，當佢有些公司今天派息除淨，指數會下跌的，例如回落至29800，這是一個正常反映企業價值派出的情況。
如果單計指數，表面上，你會賺少左，因為派息的部分不會，所以，要自己找翻派息的因素，加翻上去。另外，你都可以睇盈富（2800）的股價圖，這圖會反映除淨後，股息對成本影響的因素。
------------------------------------------------
Q14932：
Hi sir, 我係你股票班學生，有野想請教下
1) 北控水務有好高負債用P/E好難估值,所以我用左EV/Ebitda 5年平均數去推算，佢應該值5.6,但同宜加估值好似差有點大
2) 我平均價4.4,宜加3.X,你覺得再溝貨好唔好?
Thanks a lot!
預測EBITDA我用左2018年果個,希望保守D
龔成老師：
1）這股用EV/Ebitda都可以的，但在比較上會比較難，你要明白這點。
另外，每種估值方法，都有利有弊，因此我會配合多種方法去用。所以點解我在進階班要教18種估值方法，就是希望學員能配合去運用。
你留意翻佢的負債比率，5年正有所增加，這一定會對佢的風險度造成影響，你唔能夠在估值中，無視這因素。當佢負債增加時，估值都要有所調低。
因此，你估高左佢。
2）這股都有質素的，但負債多左，唔建議持有太多貨，如果你之前是小注，今次小注加可以。但之前如果已有一定的貨，就唔好再加。
------------------------------------------------
Q14933：
老師，我手上仲持有16000股馬鞍山鋼鐵，3.7購入，繼續持有等價位升喱個做法岩唔岩？
龔成老師：
最重要是睇翻企業的質素、前景。
馬鞍山鋼鐵（0323）質素不算差，但又不能說好好，增長力只算一般。整體上，你可以守，但唔好對這股有太大期望。
如果這股佔你組合的比例太多，建議升1成，先減持部分，餘下再守。
------------------------------------------------
Q14934：
老師 我24歲，你覺得我把月入50%儲起合理嗎
因為我其實可以再儲多小小
但因為想有合理的娛樂洗費
所以只能儲50%
龔成老師：
呢個要睇你有幾大決心想累積財富。
24歲，係一個財富增長的黃金時期，你儲50%，已經不錯，我相信是可以的。
但如果你致富的決心好大，好有大目標，願意「放棄這刻的享樂，換取至長期的自由」，你就可以學我當年，盡最大力量在年輕時儲錢，等自己更多本金去投資，滾大財富。
------------------------------------------------
Q14935：
成哥你好，我入左保險呢行，唔知你點睇保險呢？我同"朋友"講起我剛入行，佢地即刻就好避忌我，覺得我好做唔做去做騙子。
問心我覺得保險係好野嚟 (視乎顧客需要同邊隻保險產品)，如果唔係我都唔會入行，我絕對唔會搵人笨，唔會賺污糟錢。
我知道成哥你一向都唔會在乎啲無謂既批評，不過其實我聽完心裡面真係有條刺，都唔會太夠膽同其他朋友講起，怕佢地都誤會我、拒絕我，我知道要成功一定要克服，唔知成哥你有咩建議呢？
btw 呢啲朋友冇理財概念，真係令人擔心佢地既將來，不過我諗我勸佢地儲錢同投資既話，大概更加覺得我係騙子...
龔成老師：
因為坊間對「保險」的確有些特別的睇法，有些人會怕經紀，覺得佢地好煩，但保險這產品，其實是理財中，不可缺少的一環，因為理財要做到攻守兼備先得。
你要定位做「理財」，唔好同人集中講「保險」。
你最初做，朋友先有這樣的反應，你要定位為「幫人進行理財」，而不是「銷售」，朋友怕你，是因為怕你煩，怕你銷售。但如果你唔銷售，反而是幫人理財，慢慢，你的定位就會改變，這要時間的。
------------------------------------------------
Q14936：
龔sir 你好，我今年29歲，月入因爲係佣金制度，由萬幾至3萬不等，但因為有負債加保險等，每月至少有15000開支，想解決現時冇錢淨既狀況，可以點做？
龔成老師：
要解決開題，就要從「增加收入」著手。
最理想當然是同時減少你的支出，但如果好多支出好難減，就要增加收入。你一定要善用工作餘下來的空閒時間，利用時間去做兼職，小生意。
如果你一直都無錢剩，只會令你永遠都累積唔到資產，你只會不斷賺幾多洗幾多，因此，建議你辛苦幾年，做突破。
其實我幾建議你試做一些小生意，每天唔需要好吃力，同小小時間去建立，到有成績先加大投入。
------------------------------------------------
Q14937：
龔sir, 想問你點睇1833 平安好醫生？謝謝
龔成老師
平安好醫生（1833）有潛力，但估值難。
佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。
我睇翻佢現時的平均月活躍客戶，以及在線諮詢量計，已經係中國最大規模的互聯網醫療健康平台。
加上隨著近年中央政策更開放私人醫療市場，私營醫院急速擴張，由於這有利平衡醫療市場，有效分流大型公立三級醫院的病人，因此這仍是政策方向，相信對佢長遠有利。
所以，這股有投資價值，問題是估值，這方面比較難，因此，建議不要大注投資，長線持有。
------------------------------------------------
Q14938：
龔老師，我想請教你:如果我有30萬現金可以做點什麼投資好，我是一位中年女性。
如果買收息股可以嗎？
我希望穩定投資，不敢承擔太大風險
龔成老師：
你可以投資收息股，再加上部分平穩增長股。
現時的$30萬，暫時只能動用$15萬，同時留下一半資金。長線投資。
同時，你可以考慮做月供股票，供「平穩增值股」+「收息股」，但就隨著年齡增加，慢慢增加收息股的比例。（這部分可以多少少平穩增長股）。
平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。
同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。
你$15萬，可以用$10萬買收息股，$5萬盈富等平穩增長股。
------------------------------------------------
Q14939：
老師你好
請問813同2128 現價合理嗎？
龔成老師：
世茂房地產（0813）本身都算有質素，不過負債較多，風險高。
現價合理，可投資，不過不能大注。
至於中國聯塑（2128），現價在合理區中上部，分注投資可以。
------------------------------------------------
Q14940：
成哥，想請教下
你對於疫情影響經濟點睇？
龔成老師：
當然有影響，相信經濟持續的不利影響，可以有一年。
不過，我地作為投資者，會明白有危有機，因為只要股價大跌，但企業只是受中短期影響，長遠質素無變，反而是一個難得的入市機會。
----------------------------------------------
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
