我在大台短暫的日子
五，PA嘅「所有」職責 （下）
終於到重點，講拍攝階段工作。
拍攝主要分外景同廠景，外景有陽光時拍(除非要拍夜晚街外景啦)，夜晚就返廠拍室內。正常嘅話，我們可以當一日外景拍攝時間係08:00-17:00，演員大約前一個鐘，即係07:00返到公司。不過，有啲演員會自己化妝唔返公司(要知道我地公司真係好鬼遠)，咁我地就朝早去佢屋企樓下/ 將軍澳地鐵站接埋佢；有時如果要化特效妝，就要更加早Call Time。而PA就大概要06:00返到公司開始準備黎緊一日嘅工作。
08:00 - 17:00可能係拍到大概一到三個Location，視乎嗰場戲要幾耐，地點之間嘅距離等等，通常我地度schedule 時已經計好晒。如果順利嘅話無Over到(我拍咗個零月，好似只係試過一次Over)，咁下晝六點就可以返到公司食飯、換衫化妝，19:00開廠。夜晚有時會係第二組導演頂替，有時就自己嗰組踩埋。如果踩埋，就可能一直去到24:00，甚至26:00(零晨兩點)或更夜。所以，有時PA嘅工時可以好長，我自己一日入面試過最長就係05:00-27:00，即係返足22個鐘，街景接廠景，真係幾攰吓。
以22個鐘為例子，我同我Senior零晨6點喺公司等（的士係唔會claim 足，最多只係60蚊，真係車錢都蝕埋畀佢），返到去第一件事就係check 野。上回都講過，我地拍攝前落好晒一堆單，又服裝又道具，所以嗰朝喺導演同演員們都未返黎之前，我地首先係要去服裝部同道具部確認晒當日出外景所需要嘅物件係正確，無出錯。如果係拍廠景都好啲，有乜事都可以即刻攞返，但外景出咗街先發現漏野就好大濟。檢查完服裝同道具（有陣時會有意外，例如係道具數量少咗，件衫借走咗等等，咁就仲要喺呢段時間執生），送晒上Book好嘅車，演員同導演就應該差唔多到。呢個時候我地會去化妝間睇吓演員人齊未，如果未到就要打埋佢地催吓。試過打畀個女演員，佢把聲仲係未瞓醒（嗰把聲，一般人聽唔到㗎LOL），好彩大台演員都住得近，就算遲都唔會太過份。大家都準備好，我地08:00正式出發。
去南生圍大概要成個鐘，09:00抵達，之後大家各自做準備。隨行化妝服裝幫演員補妝換衫（如需要）；導演同攝影師傾吓要點拍（有時有動作戲，動作導演同替身可能要更多時間準備）；PA就喺現場執頭執尾，確保大家拍攝順利。到Roll 機時，我地同導演一齊睇住個細mon。我地要即場寫低每一場戲係幾分幾秒開始同完結，大致拍乜，用途係方便日後做後期時剪接用。我覺得呢個Task 係超難，可以話係PA咁多個Task 最麻煩，喺最短時間要盡量清楚咁去記錄每一場戲，同時又要睇有冇野出錯（即係拍劇嘅破綻位呢），現場兵慌馬亂，其實無乜可能一心多用。導演事前亦會做咗功課，知道嗰場戲會拍幾多個Shot，有咩shot 要補，同埋空鏡等等。咁我地都要幫導演核對所有shot都拍晒，唔好等離開咗先醒起有咩甩漏。
PA喺拍攝現場會做嘅其他事，仲包括每場戲幫演員影連戲相（好彩嗰時已經有智能電話），等佢地知道呢場戲佢地有冇戴耳環、邊隻手戴錶、個髪型有冇咩特別等等（我合作嘅演員都好好，會自己記住，減輕咗我地嘅工作/壓力）；街景人群管理：有時我地真係大街大巷拍戲，難免會有人圍觀。雖然已經會有外景組工作人員幫手，但有時我地PA都要出動同啲街坊講，叫佢地圍觀還圍觀，大家將就吓。
我地喺南生圍拍咗兩個鐘至12:00，完成呢個景，我地就去食個晏（時間係PA排Schedule嗰陣預到，餐廳就外景組同事搵定）。食完我地就去下一個地點，15:00抵達，演員們就喺車上換衫（如需要），其他人又好似朝早咁各就各位，就繼續拍攝。拍到黃昏，就返公司接廠景。
因為要繼續踩，食完晚飯，導演同PA跟手就去入廠睇吓個景有冇問題；演員們可以去化妝間補妝換衫或者休息下，又或者都入廠排戲。PA呢個時候又要再睇吓人齊未，因為可能有啲演員朝早唔使拍外景，所以佢係夜晚先黎（正確啲黎講，每場戲所需嘅演員都唔同，所以同一日，每位演員嘅Call Time 同完成時間都會唔同）。
對我黎講，入到廠，好處有幾樣。1. 有冷氣； 2. 可以三機拍攝（會快啲）；3. 道具/服裝部都喺隔離，執生易好多；4. 個景係自己地方，少啲出意外機率；5. 拍攝時，PA同導演都係坐喺上邊間Panel房，導演基本上負責晒所有掣，PA嘅職責相對少啲。而壞處係：1.入得廠都夜，會眼瞓，大家工作效率難免都會降低少少； 2. 就算喺廠，但道具服裝都放晒工（化妝反而未），有起事上黎都未必有人幫到手。但總括，拍廠點都舒服過出去日曬雨淋嘅。
拍到26:00，終於完成一日嘅拍攝工作。演員們可以回家休息，其他工作人員執埋手尾，10-20分鐘內都走得人。PA就通常要多20分鐘善後，有時要還道具還衫（可能第二朝下一組人要用），有時要上返7樓office 做野。如果勤力啲嘅PA會選擇喺呢個時間上返去出黎緊幾日嘅單，又或者啱啱拍完發覺有野漏，要補要改Schedule等等，都要返上去搞，一搞就28:00先收到工。如果咁唔好彩第二朝又係06:00 Call Time，就喺公司瞓埋啦（我試過29:00收，梳化瞓一個鐘，06:00落去準備新一日工作）。如果無咁趕，咁我地可以搭公司車出觀塘或旺角，再自己轉車返屋企。而家諗返都覺得嗰時好鬼充實。學Error話齋，大台同viutv 一樣，其實都係CLS公司黎！
你地仲有冇野想知，不妨喺下面留言問下我。下回分享下幾件難忘事。
利申：以上都係好個人、好片面、好短暫，而且歷史久遠嘅經歷，並不代表所有PA嘅立場。
（圖片為n年前拍攝前夜總會廠景。）
