【越港澳】
有時侯都想要過海，路過見中港城過海站無的士，咁就等下啦。
（事後有前輩指咁樣等好傻，因為碼頭而一部的士都無，背後所代表嘅係一班船嘅客已經全數離去，而唔係排頭位就快有客）
幾經辛苦，終於有個單身男子過黎搭車。由於我約咗人喺西環食飯，所以比平時更關注目的地，答案令人又驚又喜：上環港澳碼頭。
由碼頭去碼頭？如果由大陸搭船落黎再轉船去澳門，點解唔喺返中港城轉？或者喺大陸直接搭車去珠海呢？不過我對澳門船期之類唔太熟悉，總之佢有佢原因，反正去上環呢程真係正中下懷，欣然落旗開車。
「過澳門賭幾手呀？」我知咁樣問好膚淺，好多人過澳門都唔係去賭錢嘅，不過除咗咁樣問我都諗唔到點搭訕好。
「唔係呀，我喺嗰邊住㗎。」喺嗰邊住，即係澳門人啦，即刻喺後鏡望多兩眼，嘗試搵出澳門人嘅外貌特徵，等下次識得分，可惜失敗。
細問之下，先知原來佢嘅工作雖然要港澳兩邊走，但係都唔係成日過香港，所以交通洗費都唔算太勁。仲問我行西隧係咪快啲，敲實咗我對佢唔係香港人嘅推測，結果就出事喇。
「咁你哋澳門人點睇香港人呢？」
「其實我喺香港大㗎，不過喺澳門做嘢，喺嗰邊生活啫。」
居然如此？我好港女咁連續講兩次「真係㗎真係㗎」，好難先忍到句「點解嘅」，啱啱入西隧俾錢，可以定一定神，跟住先問：「咁仲好啦，更加要問你點睇兩邊嘅分別啦。」
佢諗咗一陣先答：「我睇最大分別係香港人做嘢好快囉，每一樣嘢都趕頭趕命。」
「無辦法啦，喺香港做嘢如果唔趕頭趕命，就代表你懶，當人人都咁趕，我哋都無得唔趕。你睇吓，我哋行中線80km/h唔超速，都要俾人推住行，你話可以點？」通常載客嘅時候我唔會行太快，但都貼住限速行丫，點解後面部車仲要跟咁貼呢？
「呀，仲有，香港人好嘈㗎，呢樣好多澳門人都憎。」
「呢個我都好憎啦，唔好講話澳門丫，去到日本心齋橋，聽到廣東話嘅比率仲高過西洋菜街，仲要大大聲驚死人聽唔到，不過有大陸人頂住個最差遊客排名榜啫。」呢個真係唔只我，我睇好多人都有呢個睇法，而家去旅行最大嘅考慮，都係點避開大陸人同香港人多。
傾傾吓，以我對澳門嘅膚淺認識，只問到呢條白痴問題：「澳門嗰邊成日派錢喎，感覺係咪好爽？」大概都好多人咁問佢，答案不假思索就答到：「爽？睇你接唔接受到佢嗰啲管治啦，被人踩到上心口先得嗰少少錢，仲慘過做雞啦。」「弊在澳門嗰邊好多人排住隊做雞呢，雖然香港都係。」如果鬥做順民，我估澳門人會領先香港人少少掛。可能乘客身在香港，講嘢難免假少少：「香港人好啲，有骨氣啲。」香港人有骨氣？熱氣就有，一副熊貓食樹葉嘅樣已經浮現，好在乘客應該睇唔到：「香港人有骨氣？講比較可能多少少啦，香港人好多都唔肯做順民，不過反抗意識放晒上網就算，無論社會發生咩問題，都係放上網講吓就算，睇吓新聞留言、評論就當發洩咗，唔會做啲咩實際嘢。無錯呀唔係逆來順受，可惜係逆來屌完順受呢。我睇你呢句香港人有骨氣啲，幾年內可以收返。」
「哈哈哈，司機你又講得幾啱。都九點喎，你食咗飯未？」
「未呀，打個飛機先去食。」
乘客懶係有男人的默契：「係咪thisAV呀？」
「唔係呀，係即時新聞。」
一陣爆笑聲中，完成咗收錢找錢嘅指定動作。擺低車去食飯前碌一碌FACEBOOK，不知幾多飛機片彈出黎⋯⋯
「一地兩檢方案出爐」
「車主通宵輪候續租」
「撤銷MPF對沖會面未有成果」
「傳蔡若蓮擔任教局副局長」
港豬澳大橋雖然未通車，但香港人同澳門人嘅距離已經拉近咗好多，係時候留意吓澳門人點生活，相信好快就同化。
#lazytaxi
#的士
#taxi
#我的你的紅的
熊貓外貌特徵 在 大熊猫的特点 - YouTube 的推薦與評價
分辨 熊猫 主要靠以下几个 特征 ：脸盘、眼圈、耳朵、手脚、呆毛、背扣。 1.形态 特征 : 大 熊猫 体型肥硕似熊、丰腴富态，头圆尾短，头躯长1200～1800毫米， ... ... <看更多>