關於 特別推介的話魔力可唔可以聯絡我 ，我們在網路上蒐集到這些相關的討論、資訊與評價

我唔理呢個故事真定假，但真係睇到眼濕濕。

#每個用左好多年嘅角色名後面
#都一定有一個故事
#向西大大你咁陰人？
#唔係特別推介
#特別推介的話魔力可唔可以聯絡我
#價錢可以傾
#喂

上次飲酒無女，我忍唔住扲住部手機撳撳撳，我唔記得玩緊咩Game，但阿文向我問咗句：「點解你打親機都剩係開女角？」　「開女角都算，點解全部都要改個名做『史勒緻』？」阿強幫手再問。我無解釋，只係冷冷反駁佢地，呢個名點都好過佢地兩個改個啲，一個成日叫「文ㄨ叛劍魂」，大佬你三十幾歲頭髮都開始甩唔好仲學人咁中二病啦，阿強就仲撚衰，叫「心如刀割」，仔女你都生埋，痴線仲扮乜鳩嘢失戀。

同佢地講嘢，我係激動咗少少，因為「史勒緻」呢個名已經成為一種習慣，但一時被人問起原因，就立即勾起一啲情緒。可能係飲醉，可能係宣洩，我開始同佢地講述一段往事。

十一歲讀小六嗰年，我跟屋企人搬屋，入伙之後認識到隔離單位姓史嘅一家人，佢地有個女，跟我同年，佢叫史勒緻，所以史勒緻係真有其人。史勒緻個媽咪話，佢個女住响附近嘅朋友唔多，所以歡迎我去佢屋企玩。當時考到七級鋼琴嘅佢，教我彈琴，我無乜嘢教到佢，最多都係捧住堆書同漫畫去佢屋企，同佢逐一介紹有啲咩好睇。

嗰幾個月，我地一齊出街，一齊打機，佢比我嘅感覺係真係好聰明，做咩都好有天份。我畀佢睇啲書，佢快我兩倍以上時間睇晒，就算我地玩同一隻GAME，佢進度都快我好多好多，每次同佢比較，我都懷疑自己係咪弱智。

有次，我嚴重感冒，於是請咗假，响屋企休息個陣，差唔多全日都聽到隔離屋史勒緻嘅琴聲，我病到死死吓，所以無特別理會。第二日，我未好返，仲要請假，日頭嗰陣，佢彈琴，我開始好奇，佢唔係要返學架咩？我去咗隔離屋拍門，開門嘅係史勒緻，我問佢做咩唔洗返學，佢一開始支吾以對，之後慢慢喊咗出嚟。佢同我講，佢其實已經無返學半年，因為佢驗到有腦癌。

嗰陣我得十一歲，唔知腦癌係咩概念，只係開始理解佢點解咁多時間睇書，打機同練琴。過咗幾日，佢話佢準備要跟屋企人去加拿大醫病，我話好，我會等你返嚟。

佢離開香港後幾個月，我如常咁返學，同朋友出去玩，响屋企打機。直到有一日，我阿媽話佢撞到史勒緻個媽咪，佢响加拿大返咗嚟，咁我問佢見唔見到史勒緻，我阿媽無出聲，靜咗成廿秒，再坐低同我講，話史勒緻唔會再返嚟，因為佢過咗身。

個一刻我無出聲，亦都無喊到，我知自己好似失去咗一啲嘢，但唔太識表達呢種情緒，個晚我正常咁食飯，正常咁同屋企人傾計，夜晚仲打算正常咁打機。記得當晚我登入魔力寶貝，個陣先醒起，史勒緻去加拿大前，畀晒啲魔石我，我望住我圖鑑裏嘅寵物，先發覺大部份都係我同史勒緻一齊組隊捉返嚟，當我聽到法蘭城嘅背景音樂，即刻記得史勒緻都好鍾意呢首音樂，佢好叻，合埋眼都可以用鋼琴彈出嚟，然後我發現我無辦法玩落去，我登出咗，因為我開始控制唔到自己，原來我已經喊到成面都濕晒。

嗰年開始，無論我玩咩game，我只會叫史勒緻，當作係紀念呢位朋友。史勒緻响地球上只係活咗十一年，我失去咗佢之後嘅時間，好快就會係佢壽命嘅兩倍，但我無忘記過佢...講到呢度，阿文無出聲，佢故作鎮定揚手叫多杯酒，但我隱約見到，佢同阿強都聽到眼濕濕，呢兩位朋友，一樣都要好好珍惜，因為佢地好傻，但思想好真摰，好感性。

而且仲好戇鳩。「史勒緻」三隻字我讀咗十幾次，佢地都聽唔出呢個名有咩問題。通常online game唔畀用粗鄙言詞嚟命名角色，但我細細嗰已經好想改條女個名做「Slut」，可惜好多款Game都唔比，所以我只好用音譯，叫「史勒緻」。結果呢個放蕩中帶點雅緻，低調卻有著淡淡風塵味道嘅女角色名，我真係好鐘意，一用就十幾廿年。無人可以低估我飲醉之下作故仔嘅能力, 而且我無打算講返呢個真相畀阿強阿文知，

直到今日手機版《魔力寶貝M》做緊事前登錄，佢地仲話陪我一齊搵番另一個「史勒緻」，其實不必了，因為一堆真嘅女玩家已經Mark咗我話要陪我去雙子服升LV捉寵 。

立即事前登錄: http://bit.ly/2K5gFAV

#魔力寶貝M #SquareEnix #日本聲優 #女呀 #法蘭城等 #識玩梗係玩雙子服 #原汁原味 #捉寵 #組隊升lv