有D小朋友玩遊戲輸左次次都發脾氣；
有D小朋友為左唔想出醜唔答老師問題；
有D 小朋友因為唔想整跌D積木連積木都唔敢砌，
好多爸爸媽媽投哂降！
逼迫佢，又怕有陰影同反效果，
唔理佢，又怕影響社交影響老師對佢既印象，
分分鐘連學校評估都做唔到架，唔好話去面試啦！
咁點算好呢？
其實人人都怕輸，我地大人都怕尷尬，
特別當我地唔知輸左會有咩後果既時候，
輸，的確可怕，
雖然要小朋友克服輸同尷尬的確有難度又抽象，
但係，我地可以陪小朋友輸，幫小朋友化解尷尬既場面，
又係由示範開始。
通常好怕輸既小朋友係開始玩遊戲之前已經唔想加入，
安慰同鼓勵幫佢唔到，我會比佢坐埋一邊觀察既，
（爭取時間同其他小朋友玩嘛，所以真係花唔到太多時間比佢）
所以比佢接受另類學習喇！
老師都係戲子，
除左會扮講錯野同做錯野，我仲會特登輸，
係學校咁多小朋友一齊玩遊戲總有輸贏，
第一係我輸，哈哈大笑咁輸，
第二就設計比心靈強大既精叻醒輸，再嚟個大既擁抱，強調輸左都玩得好開心，
第三就開始輕輕鬆鬆真玩喇，做戲太浮誇小朋友會識穿架。
一邊玩一邊洗腦式講：「輸左都無事架，我地繼續玩」再送個大擁抱，
老師既攬攬真係好過派糖，相信爸爸媽媽既攬攬都好吸引既。
玩到個個小朋友都識玩喇，
我會再邀請怕輸既主角，講明我會陪佢玩，
呢個時候就可以一齊開心贏，再一齊開心輸。
呢個方法係學校係萬試萬靈既，
當然每次有新遊戲，我都唔會期望怕輸既小朋友可以立即參加同積極咁輸，
但日子有功，配合同父母既溝通，
我都成功幫過好多小朋友改善怕輸呢個情況架！！
#幼稚園面試 #幼稚園面試班 #幼稚園拍片面試 #小朋友發脾氣 #小朋友遊戲 #從遊戲中學習
