問：
師兄你好.
想問一題essay
日本戰後經濟發展多大程度上受美國影響?
我嘅大綱:
引言:大程度
內文:
(第一段)美國的指揮[盟總時期,禁止壟斷法,安保條約...]
(第二段)美國為日本開拓國外市場[三藩市條約]
(第三段)美國於冷戰的舉動[韓,越戰比哂D訂單日本]
(過度段)美國好重要,但不能忽視其他...
(第五段)日本政府[五年計劃......]
(第六段)日本企業+國民[用國貨,團結....]
(第七段)國際環境[兩次石油危機不利於日本經濟...]
總結:大程度
咁有冇問題???
我可唔可以提及不利日本經濟嘅因素(即好似上述石油危機咁)???
THX~!
答：
呢條題目而言，題目應該唔會「多大程度」作為發問，因為「多大」及「程度」分別係兩類提問字眼。如果係程度題嘅話，應該會跟「什麼程度」或「何等程度」作為提問用語。係以下講解，我會將題目修正為「日本戰後經濟發展在什麼程度上受美國影響?」
首先，呢條係屬「一果多因程度題」，你需要提及
1. 美國影響對於日本戰後經濟發展的重要性
2. 其他影響日本戰後經濟發展的因素(並提出駁論進行比較)
以下論述題大綱而言，架構基本上可以。但係，如果係架構上你想做好D嘅話，建議你可以分唔同方面去講，因為你分析美國如何影響日本經濟發展嘅時候，你嘅point無講到係屬於邊個方面。如果你可以歸納返唔同方面咁就會更加好，例如：
政治方面：美國佔領日本期間為日本提供民主改革
經濟方面(內)：美國提出多項經濟改革為日本國內打造了有利經濟復甦的環境
經濟方面(外)：美國帶動的特需景象以刺激日本經濟發展
教育方面：美國於佔領期間繼續加強日本的教育水平發展
軍事方面：美國與日本簽訂《日美安全保障條約》(1951)減低了日本軍事開支以刺激經濟發展
外交方面：美國安排日本與戰敗國簽訂《三藩市條約》促使日本工業打入外國市場
以上嘅point你都可以寫，但係當然唔需要寫晒，寫3-4個左右就已經可以，但係最緊要歸納返係屬於邊一個方面，咁樣會清楚好多。
至於其他影響日本發展嘅因素方面，由於你嘅論述題大綱裡面我睇唔到你有駁論嘅存在，所以你自己真係落筆寫Essay嘅時候記得要寫返駁論。如果無駁論嘅話，你無做到衡量美國與其他影響日本經濟發展的因素的部分嘅話，就會失唔少分。
另外，你問到應唔應該提及不利日本經濟發展嘅因素，其實你題目問係問「日本戰後經濟發展」，而經濟發展無話一定係好嘅發展，所以其實不利同有利日本經濟發展嘅內容你都可以寫。但係，如果題目係問「日本戰後經濟復甦」嘅話，由於復甦係有正面發展嘅意思，因此你就唔應該寫不利日本經濟發展嘅內容啦。
