［神又係佢鬼又係佢嘅孫正義］孫正義嘅Softbank （軟銀，又有人叫軟庫），其實一向多新聞，近期特別多。我都寫過幾次，但好似各不相干，呢排先全部炒埋一碟。
1. 首先講昨日（星期三），你見到股價升14%（收市好似窄啲）。因乜？其實原本應該估到，因為我根本係有寫！（http://bit.ly/2HjBC8I）。法官批准Sprint同T-Mobile合併嘛，美國第四同第三大電訊商合併，Sprint升七成—大股東咪正係Softbank
2. 但我完全醒唔起會利好股價。仲要Softbank其實渣八成！T-Mobile買起Sprint後，孫正義真係省靚招牌，因為Softbank盤數可以拎走400億美金嘅凈負債（由新阿媽T-Mobile擔起）。爽（＊）
3. 點解係省招牌？因為舊年，特別係第二三季，孫正義畀人狂插。發生咩事？WeWork IPO撻Q（http://bit.ly/2wcGFpc），估值都大跌，拖累Softbank一季蝕咗500億。因為Softbank正係主要股東。
4. 另外，Softbank亦都投資UBER，好少少，至少上到市。不過上市一路都潛水。但就係十一月左右見底，之後升返唔少—可惜仲係潛緊水，但有望上返水
5. 然後十一月後，幾樣嘢救返Softbank，首先UBER反彈，另外環球股市舊年年尾都好返。仲有就係，阿里巴巴在香港上市，Softbank都賺到啲（＊＊），股價反彈返，然後加埋而家Sprint呢單
6. 講返，Wework焦咗，但仲未死晒。早幾日先又有間Softbank投嘅公司直頭香咗，所謂嘅美國版無印（又有話係美國拼多多）Brandless（https://tcrn.ch/2SlDeVJ），直頭死咗。仲有機器人整Pizza嘅 Zume Pizza ，都半死狀態（https://reut.rs/2HetPcl）。但對孫正嘅批評唔只係幾單冇眼光，畢竟佢中幾單然後賺幾個開就夠啦。
7. 好景時就梗係投資之神，但舊年好多人質疑孫正義嘅投資風格。孫正義最出名就係「派錢」，同你傾十幾分鐘，然後問你想要幾錢，然後好快決定—仲要係塞一大舊錢，畀你要求嘅更多
8. 個原理就係好似UBER咁玩，燒錢，打殘對手，一統天下。但，有一個好大嘅問題，就係，啲公司自己打自己！一般你係買初創嘅，你唔會買啲同行業嘅公司 — 留意呢種唔係叫分散投資，而係，佢地會拎你嘅錢嚟自己打自己！
9. 邊有咁笨七？但就係發生咗。在墨西哥，直頭唔係兩間，係三間打交！Uber，滴滴打車，仲有哥倫比亞嘅Rappi。三間原本都唔係墨西哥公司，但搞搞下就互爭地盤—而三間都係Softbank投嘅公司
10. 咁你話，喂，佢地唔會傾架咩？唔好踩入我地盤喎，大家都係為阿公—係，唔得的。一來大家為自己，二來，聽聞，有樣嘢叫做反競爭。
11. 剛剛好一年前，又係Softbank業績（拿，伏線呀！），我都寫過（http://bit.ly/2tVIJBc）．孫正義嗰時就好出名地，拎咗條算式出嚟：25-4= 9 ？咩回事？佢話Softbank資產25T（日圓，唔數了），負債4T，但市值得9T—唔啱數喎。鬼唔知，但你見市面好多大折讓嘅股票。
12. 然後佢做乜？就係回購。股價即升。上上落落後，而家係12T—比當時高三份一，還不錯
13. 但，中間仲有個插曲，就係舊年WeWork撻Q，全球股市又麻麻地，孫正義被圍插時，就引嚟對沖基金了。Elliott Management就去狙擊佢，正係之前狙擊東亞嗰間。所謂的activist investor（譯維權投資者好怪，劉曉波咩）。其實亦都係叫佢回購，同埋做其他改革。留意當時（一個星期前），只係Softbank手上阿里巴巴嘅股票，已經值1500億美金，但Softbank自己市值先得1000億唔夠，仲未計所有其他嘢，可見個折讓幾咁大。
14. 不過，最後要講，就在昨日收市後，Softbank出咗業績（http://bit.ly/2SCNDLO）。基本上第四季係完全冇錢賺，盈利跌99%—仲要包埋阿里巴巴在香港上市（＊＊）嘅利潤。
15. 留意，係收市後先出。不過講真我都唔知股價會點反應，畢竟呢啲公司，根本就係創投基金，就真係唔係睇個業績賺幾錢蝕幾錢。不如睇下隻UBER會唔會真係賺到錢好過
（＊）最新有話，其實T-Mobile想反價（https://nyti.ms/2uxndmG）。因為傾嗰時Sprint仲係高位，之後已經跌唔少，業績同財務狀況都轉差。但，其實呢啲活動，當然有晒合約，個個臨時反價仲得了？有一早講明，你跌幾多就可以減價，或者業績爭幾多就可以。況且，都埋尾咯，而家搞衰單嘢，大家冇著數，照計T-Mobile會照去嘅，最多個價下調些少。
（＊＊）其實一早在美國上咗市，但上香港時阿里巴巴再發新股，Softbank被溝淡，會計上視為被動減持，會有盈利入帳。
股票折讓入帳 在 [問題]請問折讓入帳是什麼阿? - 精華區Stock 的推薦與評價
不好意思我是新手
請問各位版友
什麼是折讓入帳
買股票也一兩個月了
今天第一次看到帳戶裡多了一項這個東西不知道是什麼意思
可以幫我解答一下嗎
謝謝
--
※ 發信站: 批踢踢實業坊(ptt.cc)
◆ From: 218.164.57.95
... <看更多>