[懲罰(埋自己)系列] 佐敦 牛屋
不少人係過往1年多既時候都提起過食黃店既中伏經歷，今次我又分享下，我自己中伏中成點。
位於佐敦既黃店扒房牛屋，係ig或者Facebook上都有不少人推介，不論係KOL級數既，還是只有數十人Follow既，都大讚呢間野好食，當人在佐敦，又見到間野有不少人排隊，當然蠢蠢欲動，然後蠢埋入去。
拿，唔係話間野環境唔好，雖然衛生唔係太理想，但算喇，我當係香港舊式扒房既特色，而Waiter們既服務都唔錯啦，但係我真係要針對返個食物質素去講下。
我地叫左個黑椒牛仔骨同埋蒜蓉牛油石斑，另外加錢轉左個酥皮湯。首先呢，本身個餐湯 (忌廉湯) 已經無乜味，而多左個酥皮，完全唔脆，真心細個去大家樂食鐵板扒跟個個酥皮仲好食過呢塊，即使個扒未上，都已經做定期望調整架喇。
都好在無乜期望，舊牛仔骨係冇牛味既，除左係畚肉鋪買返屋企自己煮都好食過佢，主要佢都係靠個汁去吊味，但係$128食個咁既牛仔骨，我覺得茶樓個d大點或者特點既牛仔骨仲好食d。至於舊石斑，食落去真係石斑黎既，但口感好硬又有渣，魚既鮮味唔突出，唯一可取之處係牛油配蒜蓉既汁幾Match，所以我呢度比多半粒星佢。
埋單$345，係飽既，但真係唔好食，鋸扒 / 西餐比呢個價錢我有更多更好既選擇，所以係呢度唔建議大家以身試伏。
食物: ★☆
價錢: ★☆
環境: ★★☆
服務: ★★★
性價比: ★☆
舊式茶樓特色 在 【外遊系列】澳門懷舊系列- 大龍鳳茶樓‖ 罕有、特色粤曲茶座 的推薦與評價
澳門懷舊系列- 大龍鳳 茶樓 70年 舊式 酒樓/ 茶樓 罕有粤曲茶座，任坐任聽樂師現場奏樂、歌手演唱。 點心、小菜、炒粉麵飯全部都係平民價。 ... <看更多>